FA'ALUPEGA
MOATA'A-VAIALA-MAGIAGI
Afio mai lau afioga a le matua (Tofaeono)
Susū mai Asi ma Pātū
Afio mai Āiga e tolu
(Āiga Savae- O le Tofaeono lena)
(Āiga Luamanuvao- O le Pātū lena)
(Āiga Falanaipupu- O le Asi lena)
Afio mai le usoali’i (Luafau, Tuiono ma Lupetaliaami)
Maliu mai oulua na ta’i (Tamapua ma Manogiamanu)
Maliu mai le mamalu i le nofo a itūaiga iā te oe Fuata
Maliu mai Ataga ma Sāataga.
![](https://primary.jwwb.nl/public/t/m/r/temp-jnovhvmeknbcpvukhpxv/samoan-flag-medium-high-ma5m81.png?enable-io=true&enable=upscale&crop=600%2C300%2Cx0%2Cy0%2Csafe&width=430&height=215)
Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.
‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.
VI'IVI'IGA O LE AFIO'AGA O MAGIAGI
Se’i usi maia lau fa’alogo
Ae se’i o’u tala ‘oto’oto
Si o’u nu’u ua numera tasi i si o’u loto
O le muā’autau lava a’u
Na tofia e le ‘o se tala fatu
Faleata ma le Vai ua ‘atoa ia te a’u
Le usoali’i alo maia i la’u sa’asa’aga
Ae ‘aiuli mai gafa o le lupe o le so’aga
Sāataga e ma Fuata
Alo i lau sausaunoaga
E ‘ātoa ia te oe to’oto’o o le Tuamasaga
Le fe’e ua ta’atia mai tai
Pei se amu mu lona tino mai
Ua soso’a lona ala i ga’uta e ui atu i le vai
Ua fau lona fale i le papa
Ua fai mātua i tagata
Le fale o le fe’e ua lauiloa iā Samoana
Sē o Magiagi aso lā
E tu’ua’i mai mea leaga
Ae oute ta’u atu ua suia a’u tupulaga
Le Metotisi ma le LMS
A.O.G ma le Mamona
Ua taulamua i mea lelei mo le Atua
Nofonofo ita i le ma lele lele
Magiagi lo’u nu’u pele
Va’ai le mafola o le taulaga tele
O Vaimauga lo’u ‘ele’ele
Le lupe o le So’aga o lo ‘o fa’alelelele
Le kalapu fa’apelepele
O le kalapu lea sa ou fa’avaeina iā Aperila i le Aso lima
Fasefulu valu o le tausaga, tagata luafulu ma le fa
Amata loa la’u ta’amilosaga
Se’i sa’ili so’u tulaga
Le lupe sa tausia i le so’aga i le maota o Fe’etagata
Le toa manumanu o le Tuamasaga sa pou lona fale i va’a
Lenei ua lele i le Tuamasaga
E fai ma fa’amata’u i le taulaga