Pese:

 

O le teine lea ‘o Fala o Futa

Se’i tu’u mai lau lālaga’ula

‘Ia malie mai oe le Fitiuta

Se’i fa’aeva i le atu luluga

Oi auē ua tala mai Toga

‘O le pulou-o-le-ola

Le tasi ‘ae afe ‘ua mu pito tasi

O lo ‘o teu nei ‘i le lagi

Le tamāli’i ua sau nei

‘O le ‘ula ‘o le lei selegā peipei

Ma le fono a Sā Sāvavau ali’i e

‘O lo ‘o faō mai nei

Sa ou nofo mafaufau

Ma filifili se fa’atatau

 Ma le lalaga ana lau ie i le papa

O lo ‘o teu i le vaeluaga

Sau la’ia, sau la’ia se’i ta o

Ma se’i fa’alogo i ‘upu o le vavao

‘A ‘o fea ea lau tautua lenei ua liua malo

Sole, sau ia le vai se’i e tofo

O le fala na ulua’i lalagaina e le tama’ita’i o Futa i le oga’ele’ele o Saua po ‘o Falema’o i Fitiuta o le motu o Manu’a. Sa nofo ese le tama’ita’i o Futa ma ona mātua. Ua silasila mai Tagaloalagi i le galuega a le tama’ita’i ma fai fa’amalosi le mana’o o Tagaloalagi e ‘avea Futa ma ana avā, ma i’u ai lava ina fa’aali ai uiga lē tauagafau o Futa. Ua tā’ai lana fala, tu’ua le lau’ele’ele ma ‘a’au ane lea ma lona fala i le motu o Tutuila ma fa’auma ai le lalagaina o le ‘ie i le tolotolo i Matātula i le fanua o le ali’i ma'upu o Leatutufu e ta’ua o Fagasa. Ona e iai le vai e masani ona fa’amālū ai le tama’ita’i o Futa, e sa ai ni isi ona uia lea vaipanoa o Matatula. O le sinasina ma le tulutulu ifo o lea vai na sui a’i le suafa o le tama’ita’i ia Tulutululelei. 

O le talitonuga o ni isi o le afio’aga o Tula e fa’apea, na malaga mai lava le tama’ita’i ma lalaga mai le ‘ie lea i le liu o lona va’a. Atonu o le mafua’aga lena ua fa’aigoa ai le ‘ie o le “Lagava’a”. 

E mafua ona ‘a’au ma sola mai le tama’ita’i ona ua afaina lona loto, e lē mana’o e nonofo ma Tagaloalagi. I Sasa'e o le Matatula, e iai se fanua e igoa o "Le'auanae" fai mai o 'iina sa iai le togalaufala o Futa. Ona fa’auiālatua lea ‘o le ali’i ‘o Fe’ealoalo, ‘o le ali’i mai le afio’aga o Utumea. O le masani a lenei ali'i, e aloalo si ona paopao i aso uma e fagota i lena gataifale, ona tu’u lea o le faiva, ‘a ‘ua alu ma tu’umoe i le tama’ita’i o Futa. Ona usu ai lea o le ali’i o Fe’ealoalo i le tama’ita’i o Futa. Ua ma’i tagata le tama’ita’i ma fa’ae’e ai le gafa o le teine Maofa. 

 

Fai mai e tulaga ‘ese le maoa’e o le fa’ata’atiaga o lenei ‘ie i lona momosi ma le memea auā e tosi nini’i. Na lalaga e Futa ‘ae fa’auma e lana tama o Maofa. O le va’ai o Maofa i le galuega sa fai e lona tinā o Futa, ‘ua avea lea ma ala ua masani ai ona lima i le lalagaina o le fala. Sa amata loa ona fai le galuega o le sala mai o lau'ie ma tata'ai ma faaputu i luga o le Si’upapa i Vaifanua e ta'ua o Matātula. O le papa lea sa pusa ai i luga umu e tao ai tata'aiga lau'ie ona la'u lea i le vai ma fufulu mamā ai, ona la'u ane lea ua faalalā i luga o le papa ua faaigoa nei e tagata "papa o Taogalau’ie i Ma'opua." ‘0 lo ‘o iai fo’i ma le vai ‘ua fa’aigoaina ‘o Tā’aigālau’ie, ‘auā na ta’ai ai lau’ie i lenā vai. ‘0 lo ‘o iai fo’i ma le malae ‘ua fa’aigoaina ‘o Fa’alāgālau’ie, ‘auā sa fa’alā ai lau’ie i lenā  malae. ‘0 lo ‘o iai fo’i ma le fāsi fanua i lenā lava pitonu’u ‘ua fa’aigoaina ‘o Soligā’ie, ’auā o le fanua lena sa tū ai le maota na sosoli ai le ‘ie. Ma o lo ‘o iai fo’i ma le paepae ‘ua fa’aigoaina ‘o Legagā’ie, ‘auā sa fālō ma lelega ai le ‘ie i lena paepae. 

 

E faapea le tala e ese ai lava le lalagaina o lenei fala i fala uma e pei ona masani mai ai le atunuu. Ua mae'a nei le lalāgaga o le fala ona aumai lea e Maofa fulu mūmū o manu ua faafulu ai le itu pito i lalo o le fala. Faapea tala tuugutu o le atunuu o se fala e ese le aulelei, e ma'eu le momosi, ena'ena-vaivai, memea, toe vaivai e pei o se 'ie, ona faaigoa ai lea o lea fala, o le “Ie”.

 

O le tama’ita’i lenei o Maofa, sa fai ma faletua o Tuisano’e, o le ali’i tāua o le afio’aga o Tula, ona maua lea o le tama’ita’i o Sinatulauta. Ona usu mai lea ‘o le ali’i o Tuisamatatele o Lefutu(Onenoa) i le tama’ita’i o Sinatulauta le tama a Maofa, ona fa’ae’e lea o le  gafa ‘o le tama’ita’i o Ameteolepala ma le teine o Logoialise(Tagisiaealise). O Lefutu o le isi lea igoa o le nu’u o Onenoa. E tu i luga o le tuasivi i le va o Onenoa ma Tula i Tutuila.

 

O le tama'ita'i lenei o Ameteolepala na usu mai ai le tama o Fa'atoafe fa'ae'e le gafa o le tama o Lele'asapai. ( E iai le tala o le mafua'aga o lenei suafa).

 

Sa logologoā tala o lenei āiga i Tutuila atoa ona o le manaia o le ie-Samoa na lalaga e le tama’ita’i o Māofa. Na fa’alogo ai le atali’i o Le’iato e igoa iā Togiola, ona ia mana’o lea i le ie. Ma na pau le auala e mafai ai ona ia maua le ie, o lona fa’aipoipo lea i se alo tama’ita’i o Māofa ma Tuisamata. Ma o le mea lea na fa’aipoipo ai Togiola iā Logo’ialise, le alo tama’ita’i la’iti’iti o Māofa ma Tuisamata, ma na maua ai le ie. Na’o le to’atasi lo la alo, o Manalita. O Manalita, lenei na faiāvā i ai le tamāloa mai Masefau e igoa ia Lepogafaigā, ona alu fo’i lea i ai o le ie. Na’o le to’atasi fo’i le alo o Manalita ma Lepogafaigā, o le tama’ita’i lea o Manuosofusi. Na fa’aipoipo Manuosofusi i le ali’i sili o Āfono e igoa ia Tui Āfono, ma ua la mauaina ai fo’i le ie. Na’o le to’atasi fo’i le alo o Manuosofusi ma Tui Āfono, o le tama’ita’i lea o Tau’oloasi’i. Ma na o’o ina ua maliu Tui Āfono, ona nonofo lea na’o Tau’oloasi’i ma lona tinā ‘o Manuosofusi i Afono. Ma ua la tausia fa’alelei pea le ie. O Tau’oloasi’i fo’i lea na ‘ave iai le suafa taupou o Futa.

Ona maliu lea ‘o Tuiafono, ‘a e nonofo ai pea Tauoloasi’i ma lona tinā i Afono. O aso na ua i le mauga o Alava le ali'i o Fua'autoa mai Manu'a ma ona soatau o Leatoia ma Leagonia ma aumau ai i Fuiolevaga. O ia lea na ia fasia tagata Toga na i Tutuila ma tutuli i le sami. Ma o le mafua’aga na ala ai ona ō le auali’i i le fale o Tau’oloasi’i ma Manuosofusi, ona ua latou manana’o i le ie o lo’o teu e Manuosofusi. Peita’i, sa tali ane Manuosofusi i le auali’i, e lē mafai ona ave’eseina le ie, ona o lo’o fai le ie ma aluga a lana tama teine o Tau’oloasi’i. E ui lava ina sa te’ena le mana’o o le auali’i, ae sa la nonofo pea ma tauanau Manuosofusi ina ia ave atu le ie la te avea i lo la matai o Fuā’autoa.

 

 O le ‘ie e fai ma aluga ai le teine. Ona fai atu lea ‘o lona tinā:  “Sole e, e fa’apenei, o le a tatou o muamua tatou te lama i le sami, ona tatou ō mai ai lea fai se tonu i le ie.” Sa malilie ane loa le auali’i i le tonu ua fai atu ai Manuosofusi, ma ua sauni loa ma le latou lama. Sa latou savavali ifo i le matāfaga ma a latou sulu ‘aulama. Sa fai atu loa Manuosofusi i lana tama teine o Tau’oloasi’i, “Sau inā moe i le fuefue ma le ie, a o le’i matou ō e lama mai ni i’a.” Sa alu ifo Tau’oloasi’i ua moe i le fuefue, ae aluga lona ulu i le ie. A ua alu le lamaga a Manuosofusi ma tamāloloa i le sami.

 

A’o aga’i atu i le a’au le lama a Manuosofusi ma tamāloloa, o le taimi lea na taunu’u ane ai le va’a mai Toga. O le va’a lea o lo’o malaga mai ai le uso o le Tui Toga e igoa ia Lautivunia, ma lana au malaga. Na va’aia e Lautivunia ma lana au malaga le lama a le fafine ma tamāloloa e to’alua, ona fa’apea atu lea o Lautivunia i lana au malaga, “O mai tatou ō e tapu’e mai tagata ia e fai ma tatou fa’aoso i le Tui Toga pe’ā tatou toe fo’i i Toga.” Sa afe ane loa le va’a o Lautivunia ma lana au malaga i le a’au.

 

Sa latou feosofi i le a’au ma fa’atele’a’i atu loa i le mea o lo’o lama ai le fafine ma tamāloloa e to’alua. Na iloa atu e Manuosofusi tagata o lo’o aga’i atu i le mea o lo’o latou lama ai, ma sa ia fai atu loa i tamāloloa, “Sole e, tatou ō i uta ‘i si a’u tama, e foliga mai o lo’o omai tagata nei e ‘ave tatou.” Sa latou fa’atelevave ifo loa i uta, ‘a ‘ua tuliloa ane pea latou e Lautivunia ma lana ‘au malaga.

Na maua ane latou i le matāfaga, fa’atasi ai ma si teine o Tau’oloasi’i o lo’o momoe ma le ie i le fuefue. Ma o le māfua’aga lea na maua mai ai le igoa o lo’o masani ona fa’aigoa ai le ie toga o le “Moeilefuefue”. Sa faiatu loa Lautivunia iā Manuosofusi ma tamāloloa, “O mai ia, o le ‘ā tatou ō i lo matou va’a i Toga.”

 

Sa latou ō ane loa i le va’a, ma malaga ai loa i Toga. Na taunu’u le va’a i Toga, ona alu ane lea o le Tui Toga ua fa’afeiloa’i lona uso o Lautivunia ma fai atu i ai, “O mai ia, tau ina ua sao mai le tou faigamalaga, ae pe na fa’apefea le malaga?” Sa tali atu Lautivunia, “Ua fo’i manuia mai le malaga, ma o lo’o iai fo’i ma le inati mo lau afioga a le Tui Toga.” Ona avane lea e le ‘au malaga si teine o Tau’oloasi’i ua fai ma inati mo le Tui Toga. Ma ua avea ai Tau’oloasi’i ma avā a le Tui Toga. A’o le ie sa fai ma aluga o le teine, ua ave e Manuosofusi ua teu fa’alelei.

 

Sa fiafia tele le Tui Toga ia Tau’oloasi’i ona o lona atamai e fai fe’au uma o le aiga. Ma ua avea lea ma ala ua feitai ai isi avā a le Tui Toga ia Tau’oloasi’i, ma ua latou taupulepule loa i se auala e fasiotia ai Tau’oloasi’i. Na o’o i le isi aso, ona alu ane lea o le tasi avā a le Tui Toga ua fa’aosooso Tau’oloasi’i, ma ua fai atu i ai, “Ua na’o oe lava, ‘ua ‘e lē mamau i le tino o Tuitoga” Na ‘o oe le avā a le Tui Toga e te le ‘o faia se mea’ai e fa’ama’i ai le manava o le Tui Toga, ina ia oulua nonofo ai na o oulua i le fale.”

Sa ata’ata le tama’ita’i o Tau’oloasi’i ma fa’apea lona manatu, ailoga e āfaina ai ia pe a na faia lena mea. O le mea lea na alu ai Tau’oloasi’i ua matuā la’u na o mea’ai lololo e taumafa e le Tui Toga, ma ua ma’i ai le Tui Toga. O le isi talitonuga e fai mai ua fa'asaga le teine o Tauoloasi'i ua fai le sama fa'asamoa. Ua tete'i Toga i le taeao e soso'o ai ua samasama atoa le tino o lo latou ali'i, fa'i o le a maliu.

Na atoa le vaiaso o ta’oto pea le Tui Toga i lona gasegase tau manava, ma ua avea lea ma ala ua masalosalo ai tagata o le mālō, ma ua latou fesilisili pe ai se a ua fa’a’umi’umi ai le gasegase o le Tui Toga. Na latou iloa mulimuli ane o le fafine Samoa o Tau’oloasi’i na ia fafaga le Tui Toga i mea’ai lololo. Ma sa latou ita uma ia Tau’oloasi’i. O le mea lea na fono ai le mālō e sa’ili se fa’asalaga mo Tau’oloasi’i. Sa maua loa ma le latou fa’ai’uga, “O le a susunu ola tama’ita’i Samoa uma o lo’o iai i Toga.”

 

“ O le a mu le foaga i tama’ita’i Samoa. Sa la’u ane loa fafie ua pusa ai le umu tele i totonu o le malae. Ma ua tapu’e ane fo’i tama’ita’i Samoa uma ma fa’ata’atitia i tafatafa o le umu. Na o’o i le taimi o le’a lafo ai tama’ita’i i le afi musaesae, ona vala’au atu lea o Manuosofusi, “Fa’amolemole, aua ne’i lafoina matou i le afi, a’o lea o le ‘ā tatala atu lo matou togiola.” Ona tatala ai lea ‘o le ‘ie toga. 

Ona fola lea i luma o Tuitoga ma le mālō o Toga. Ona fai atu lea ‘o le tama’ita’i: ‘O lo matou togiola lenei, ‘o Moeilefuefue le igoa o le ‘ie nei; ‘a e ‘afai ‘ua matou ola i lau pule, ‘ua aogā le ‘ie. E ui ina tasi, ‘a e tasi ‘ae afe. Ona igoa a’i lea o le ‘ie o le Tasiaeafe ma le Pulou o le ola.

 

O le Tuitoga e afe ma afe ana ‘ie ma fala e teu i lona maota ma ‘ua tasi lava lenei ‘ie i lana va’ai. Na ia fa’atonu ai taule’ale’a e la’u uma mai ana ‘ie o lo ‘o  iai se’i fa’atusatusa ma le ‘ie memea po ‘o le Fala o Futa. Na matuā leai se ‘ie o ana ‘ie na fa’atusatusa i le Fala o Futa.

 

Na talia e le Tui Toga le ie, fa’apea fo’i ma le olega a le tama’ita’i o Manuosofusi. Ma ua toe ola ai tama’ita’i Samoa uma na tapu’e ane e susunu i le afi. Sa fa’apea atu fo’i le malelega a le Tui Toga, “O le a ola tama’ita’i Samoa uma, ma o le a puipuia lelei lo latou nonofo ai i Toga.” 

Ma o le mea lea na fa’atonu ai e le Tui Toga ana au’auna ina ia saunia ni nofoaga lelei i lona nu’u e nonofo ai taupou ma tama’ita’i Samoa uma. Na uma ona saunia o mea uma, ona o ane loa lea o tama’ita’i Samoa ua nonofo ai i le nu’u o le Tui Toga.

Na o’o i le isi aso, ona alu ane lea o Lautivunia, le uso o le Tui Toga, ua moetolo i isi taupou Samoa e to’alua o lo’o nonofo puipuia i le nu’u o le Tui Toga. Sa faate’ia le fale o tama’ita’i, ona o ane ai lea o le auali’i o Leatoia ma Leagonia e va’ai po’o ai le ua moetolo atu i taupou. Sa maua atu e Leatoia ma Leagonia le ali’i o Lautivunia, ona la ave lea ua fa’amoe i lo la fale. Na logotala le Tui Toga i le mea ua tupu, ona ia tuli lea o au’auna e a’ami ane Lautivunia i le fono a le malo. Na o au’auna i le fale ma maua atu i ai na’o Leatoia ma Leagonia, ae leai se Lautivunia. Sa fesili loa au’auna ia Leatoia ma Leagonia, po’o fea o iai Lautivunia. Ae sa tali ane le auali’i, “Ma te le iloa.” Sa fa’atonuina loa Leatoia ma Leagonia e au’auna ina ia ta’u ia Lautivunia e usu ane i le fono a le mālō i le aso e soso’o ai.

Na o’o i le afiafi, ona alu ane lea o Lautivunia i le fale o Leatoia ma Leagonia. Ma sa fai atu loa le auali’i ia Lautivunia, “Ali’i, na sau le sāvali a le Tui Toga ma le mālō, ina ia e usu atu taeao i le fono a le mālō.”

Sa faiatu loa Lautivunia ia Leatoia ma Leagonia, ”A oulua alolofa ia te a’u, ona oulua faia lea o le mea lea o le a ou faiatu ai. A o’o taeao, ona oulua fa’asaga lea e fai se umu fa’ausi; lalaga ma se ma’ilo tele e tasi, ona fu’e lea i ai o ni mafu ona oulua o lea e sa’esa’e i luma o le Tui Toga.”

Sa fa’apea lava ona fai e Leatoia ma Leagonia le fa’atonuga a Lautivunia. Sa la sa’esa’e le ma’ilo tele ua tumu i mafu ma tu’u i luma o le Tui Toga. Na va’ai ane i ai le Tui Toga, ona ia fesili ane lea, “Po’o le a lea?” Sa tali atu Leatoia, “O le ma’ilo fa’ausi e tali ai lau sua.” Sa tago ifo le Tui Toga i mafu o le fa’ausi ua tau’ai i fafo o lona fale. Na va’aia e Leatoia ma Leagonia lea uiga ua fa’aalia e le Tui Toga, ona la tu’umuli filemu lea i lo la fale.

Na o’o i le afiafi o lenā lava aso, ona tuli fo’i lea e le Tui Toga ana au’auna e a’ami ane Lautivunia i le fono a le mālō. Sa le maua atu Lautivunia e au’auna i le fale, ona la fesili fo’i lea i a Leatoia ma Leagonia, po’o fea o iai Lautivunia. Ae sa tali ane Leatoia ma Leagonia, “Ma te le iloa.” Sa fai atu loa au’auna, “A sau Lautivunia, ona fai atu lea i ai, ia vave ona usu atu taeao i le fono a le mālō, leaga ua to’atama’i le Tui Toga.” Ua o’o i le pō, ona tolotolo ane lea o Lautivunia i le fale o Leatoia ma Leagonia ma sa fai atu loa le auali’i ia Lautivunia, “Sa toe sau fo’i le sāvali a le Tui Toga ma le mālō, ina ia e usu vave atu taeao i le fono a le mālō, leaga ua to’atama’i le Tui Toga.” Sa tali atu Lautivunia, “Ua lelei ua oulua ta’u mai, ae ou te le alu i ai. A e fa’amolemole, ua toe tasi lava le mea lenei o lo’o totoe ia te a’u ou te mana’o lua te faia. A o’o taeao, ona oulua o lea e fati mai se lau fiso ma se lau tolo, ona oulua ave lea i le Tui Toga pe na te mate’ia le uiga o lenā mea ua ou avatu.”

 

Sa usiusita’i lava Leatoia ma Leagonia i mea uma na fai atu ai Lautivunia. Ma ua la fa’apea fo’i ona fai e pei ona fai atu ai Lautivunia. Ua malama le taeao o le aso na soso’o ai, ona usu lea o Leatoia ma Leagonia ua fafati mai le lau o le fiso ma le lau o le tolo. Ma ua la o atu loa ua avatu na lau i le Tui Toga. Sa tago ifo le Tui Toga i na lau ua saei ma tia’i i le tafuna’i. Ona ia fesili atu lea ia Leatoia ma Leagonia, “Po’o fea Lautivunia?” Ae sa tali atu le auali’i, “Ma te le iloa.” Sa toe fo’i ane Leatoia ma Leagonia ua nofonofo i lo la fale. Na o’o i le po, ona alu ane fo’i lea o Lautivunia i le fale o Leatoia ma Leagonia, ma fesili atu, “Po ua fa’apefea mea na oulua ave i le Tui Toga?” Sa tali Leatoia, “E leai se mea na talia e le Tui Toga, auā sa lafoa’i i fafo mafu o le fa’ausi, ma saei fo’i le lau fiso ma le lau tolo na ma avatu.”

 

Sa fai atu loa Lautivunia, “Ua lelei, ae a toe sau le sāvali taeao, ona oulua fai atu lea i ai, lua te le iloa le mea o lo’o o’u iai. Ae a malama le taeao, ona oulua eli lea o se lua. Eli ia lua gafa lona umi, gafa lona lautele, lua gafa lona maualalo.

A uma ona eli le lua, ona oulua ave lea i ai o ni tao e fa’atutū ai. Ia ū i luga mata o tao. A’o a’u, o le a ou alu ou te eva i a’u uō, ona ou fo’i mai lea ou oso i le lua. Ae a uma ona fai na galuega ua ou fa’atonu atu, ona lua o lea e pu’e mai se tifitifi mai le sami; aumai ma ni uso o ogafa’i, ma ni fatu o ulu Manu’a. O na mea ia lafo atu uma i o’u luga pe a ou oso i le lua. Ona tanu lea o a’u ia lilo lo’u tino atoa, ona fa’atumu lea o le lua i palapala. Ma le isi mea ia tautuana ma oulua, ia aua lava ne’i oulua ta’ua a’u i se tasi. Auā a lua ta’ua a’u i se tasi, ona tou le o’o lea i Samoa. Ae fa’atali se’i tou o’o i Samoa ona fa’ato’a ta’u lea o a’u.”

Sa fa’apea lava ona faia e Leatoia ma Leagonia e tusa ona fa’atonuina ai laua e Lautivunia. Na o’o i le afiafi o le aso na soso’o ai, ona fo’i mai lea o Lautivunia ma oso loa i le lua. Sa o ane loa Leatoia ma Leagonia ua lafo i luga o Lautivunia le tifitifi, ma uso o ogāfa’i, ma fatu o ‘ulu Manu’a. Na uma lea, ona la tanu lea o le tino o Lautivunia, ma ua fa’atumu le lua i palapala. Ua uma ona tanu o Lautivunia, ona o ane lea o Leatoia ma Leagonia ua nonofo i lo la fale e pei lava e leai se mea na tupu. Sa le utuva fo’i ona o ane pea savali atu le Tui Toga e fesili mo Lautivunia, ae sa tali lava Leatoia ma Leagonia, la te le iloa.

Ua tele aso o sa’ili pea po’o fea o iai Lautivunia, a ua leai lava ma se tasi na te iloa le mea o iai. Na o’o i le tasi aso, ona fa’apea lea o le Tui Toga, “Talofa e, i si o’u uso o Lautivunia, ua tele aso o le iloa.” Ma sa ia fai atu loa i ali’i totoa o Toga, “O mai ia inā ō ‘i Fiti ma isi motu uma o Toga e su’e mai lo’u uso o Lautivunia.” Sa si’i loa le fua i Fiti ma isi motu uma o Toga e su’e mai Lautivunia. Ae talofa, ua le mafai lava ona latou maua ai Lautivunia. Ma o le mea lea na latou fa’aauau ai loa le su’ega o Lautivunia i Samoa. Sa taunu’u le latou fua i gatai o Falefā, ona tuli lea i uta o le isi tamaloa e utu mai ni vai. Na alu ifo le tamaloa i uta ua utu ana vai i le vai o le ali’i sili o Falefā ’e igoa i ia Leutelele’i’ite. Na fa’alogo ane Leutelele’i’ite o asa ane le tagata i lona vai, ona fa’apea lea o lana saunoaga, “O le vai o lo’o utu, ua le tauilo vai-folau.” Sa leai se tali a le tagata o lo’o utuvai, ae sa utu pea ana vai, ona ia toe asa fo’i lea i le vai aga’i i le isi itu. 

Na toe fa’alogo mai fo’i iai Leutelele’i’ite, ona fa’apea lea o lana saunoaga, “Ua le tauilo tapuvae folau, ua asa sasa’e le vai.” Sa leai lava se tali a le tagata sa utuvai, ae sa ia savali pea ma alu loa i lo latou va’a o lo’o fa’atali mai i gatai. Na ia taunu’u i le va’a, ona ia ta’u lea i le auva’a fa’amatalaga a le tagata na fai ane ia te ia i le vai. Sa latou feinu i vai na utu atu i le vai o Leutelele’i’ite, ona toe fo’i ai lea o lo latou fua i Toga. Na latou taunu’u i Toga, ona fesili ane lea o le Tui Toga, “Po’o fea o iai lo’u uso o Lautivunia?” Sa tali le ta’ita’i o le aumalaga na o e su’e Lautivunia, “Ia fa’amalie lau afioga a le Tui Toga, matou te le’i maua lou uso o Lautivunia, ae na’o fa’amatalaga na fai ane e le tagata o lo’o iai i Samoa.” Sa fai atu loa le Tui Toga, “Ua lelei, ae o mai e toe fo’i i Samoa i le tagata lena na fai ane fa’amatalaga ia te outou. Ma ia outou fesili i ai e ta’u ane po’o fea o iai lo’u uso o Lautivunia.”Sa toe fo’i loa le fua i Samoa ma taunu’u i gatai o Falefa. Ma sa o ane loa i uta le aumalaga ma fesili  ia Leutelele’i’ite, pe na te iloa le mea o iai le uso o le Tui Toga e igoa iā Lautivunia. Sa tali Leutelele’i’ite, “Ō muamua e ‘aumai tagata Samoa uma o lo’o i Toga, ona ou fa’ato’ā ta’u atu lea o le mea o lo’o iai Lautivunia.”Sa fo’i fiafia loa le aumalaga i Toga, ma ua latou aumai tagata Samoa uma o lo’o iai i Toga. Na taunu’u i Samoa tagata Samoa uma sa i Toga, ona fai atu loa lea o Leutelele’i’ite i le aumalaga a Toga, “Ua lelei ua fa’aolatia mai le faigamalaga a tagata Samoa sa i Toga, a’o le a ou ta’u atu nei le mea o lo’o iai Lautivunia.”

Sa mālōlō la’iti’iti Leutelele’i’ite mai lana fa’amatalaga muamua, ona lagi ai lea o lana solo po ‘o le lafofua a Leutelele’i’ite e fa’apenei:

E to’ie! La to’ie! ‘O mulioaiga

Sa foua (nei) e le Lautivunia

Se pa niu na ia sopoia

Se pa filimoto na ia la’asia

O tuna ma ula ‘o pi’ia le pola

O puga ma one ‘o taea le otaota!

O Leatoia ma Leagonia

‘O fono o le ‘ava o Tuitoga na lua molia

‘O le lau o le fiso ma le lau o le tolo na ia ‘aumaia

Na tago i ai le Tuitoga ma ia saeia,

Na ia nutinutia ma togi i fafo. Pe ni a ia?

‘O  fatu o ‘ulumanu’a na ia lomilomia,

Ma se tifitifi na ia ‘atiatia,

Nai au toe evaga i le laufanua pisipisia,

Le Tuitoga e, ua e fa’asulu lava nai ana moliga e le’i talia.

 

Na uma ona lagi le solo a Leutelele’i’ite, ona ia toe fa’apea atu lea, “O mai ia inā toe fo’i i Toga, ona outou o lea e eli tafatafa o le fale sa nonofo ai Leatoia ma Leagonia. O i’inā o lo’o tanu fa’atū ai le ali’i o Lautivunia i le vaiva’a o le “Aniva”.

Sa toe fo’i loa le aumalaga i Toga. Sa latou taunu’u i Toga ma eli loa tafatafa o le fale sa nonofo ai Leatoia ma Leagonia. Ma o i’ina na latou maua i ai le tino o Lautivunia. Sa latou ta’u lenei mea i le Tui Toga, ona fa’anoanoa ai lea o le Tui Toga, ona sa na lē amana’ia fa’amaualaloga a lona uso o Lautivunia. Ae ui i lea, o le mea na fai e Lautivunia, ua fai lea ma auala ua mafai ai ona toe fo’i tagata Samoa sa nofo pologa i Toga.Sa faigatā ona galo i ni isi o tagata Toga a latou mafutaga ma tagata Samoa a’o iai tagata Samoa i Toga.

Ua maliu le Tuitoga na ifo ai Tauoloasi’i, ‘ae nofo mai le Tuitoga Tuiafitu. O ona po na sa ‘a’ave ai tala o le manaia Amoa o Amoaletoa Naisaafa, ona folau mai ai lea o le alo tama’ita’i o le Tuitoga e fia fai tane i le ali’i Samoa, ae musu ai le manaia. Ona femulimulita’i lava lea o le tama’ita’i. Ua le toe fia fo’i i Toga. Ua fia lelei i tuafafine o Amoaletoa ona fai lea i ai, o lo ‘o i le maota o lona tama le ‘ie e lalelei tasi na avatu i Samoa. Ona fai lea i ai o tuafafine o le ali’i manaia, o tama’ita’i o Matuau’u ma Matuasa’asa’a, e poloa’i i Toga e aumai le ‘ie, ao le a la fa’asaga e taumafai lo la tuagane ‘ia la nonofo.

Sa fa’apenā ona fai, ma aumai ai le tooga taunuu i le laulelei o Amoa. Ona nonofo lea o le manaia ma le tama’ita’i, malaga i Toga ma nonofo mau ai. A ua fa’asaga tama’ita’i Samoa ua tala le ‘ie ma fa’aa’oa’o lona gaosiga. Sa fa’apotopoto loa le ulua’i fale lalaga i Samoa, i le laulelei o Amoa. E o’o mai i le aso nei, o le tama’ita’i matua e fa’auluulu i ai se fale lalaga, e ta’u o le “Matuau’u.

Ma ua ou auina fo’i ni isi o la’u aumalaga e latou te aumaia le ie.” Sa auina loa e le afafine o le Tui Toga ni isi o lana aumalaga i lona tamā e aumai le ie. Ma o le mafua’aga lea na ala ai ona toe o’o mai le ie i Samoa. Ma ua fa’aigoa ai loa o le ietoga, auā o le ie mai Toga. Ua fa'apu'upu'u- o le ie toga.

 

Na taunu’u mai le aumalaga ma le ie, ona fa’aevaeva lea o le ie i le nu’u atoa o Āmoa. Na va’ava’ai i ai le aualuma a Āmoa i le matagofie o le ie, ona latou fa’atu lea o le falelalaga i Āmoa e fa’aa’oa’o ai i le lalagaina o le ietoga.