FA'ALUPEGA

Susū mai oe le tapaaulefano, o lau susuga Lufilufi ma lau saofa’iga

Susū mai le vainalelepa ma le mulitu’i, o fetalaiga i lo outou to’aono:

(Sele, Manuō, Fe’esago, Tomanogi, Magele, Poloai)

Susū mai le Tuiatua ma ou tu’itu’i

(Tupa’i ma Ta’inau)

Susū mai lau susuga a le nofoa sā (Tupa’i)

Susū mai le Togia’i o le Tuiatua ‘ave au malaga

Alaala mai Leausa na e itū’au ai, ma e alataua a’i

Susū maia le tapaau fa’asisina, lau afioga a le tama’ita’i Seutātia na e alaala maota i le Mulinu’ū

Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.

 

‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.

VI'IVI'IGA O LE AFIO'AGA O LUFILUFI

 

Ta te fa’atulouna le pa’ia tele o Samoa

Ae se’i lagi la’u pese o sa’afiafiga o si o’u nu’u pele

Afioga i le Tuiatua, e alaalata’i ai Seutatia

Pa’ia lava lea i le to’o ma le mamalu o le saofa’iga

O Tupa’i fo’i le nofoa sa ma Ta’inau le tu’itu’i lava ia

Afio ai Fonoti ma le mamalu i le aualuma

 

Lalelei e o Tumua, Lufilufi o si ona laufanua

Sepolata’emo i Mulinu’ū, afio ai o le Tuiatua

Se’etia i fa’aagatama, i le ta’alo fa’atausala

Le Heavy Tama, lauiloa oe i Samoana

 

Tala moni o si o’u nu’u, e matagofie o si ona ‘a’ai

Fa’afesāga’i tolotolo e lua, fa’apenā laoa o matai

Fuio’a o le vai ‘ua ‘a’ave ona tala, pe ‘a ‘e fia taumafa ai

Le falema’i tele o le itūmālō o Anoama’a e te talitonu ai

Metotisi, EFKS, Katoliko Roma ma le Mamona

Le kolisi i Piula mo se lumana’i o Samoa

 

O le susuga ua paū e tu tasi iā Atua lana lauga

Pe ‘a nofoia Lalogafu’afu’a vae o le faleātua

Le tapua’iga a Afoa ma le matua o Lefaoseu, Ki ma Tagata

Fa’apea le afifio le tapunu’u o Maugatai ma Leafa

Pa’ia ma mamalu uma nā, e mitamita ai si o’u nu’u

Lufilufi ma fuaifale o Lalomauga ma Manunu