LE FOFOGA O LE ALATAUA IA NOA TOGAMAU FAIMAFILI VAE

FA'ALUPEGA

 

Maliu mai le fofoga o le Alataua (Noa) o oe o le lafaaua, o le fatu ma le eleele

Maliu mai le tauto’oto’o iā Maugaotega

Ma upu ia te oe Samatuafaigā



 

Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.

‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.

EKALESIA FA'APOTOPOTOGA KERISIANO AMERIKA SAMOA (EFKAS) I ASILI/AFAO/ATAULOMA

FETU O LE OLA

PULEAGA KATOLIKO SAMOA PAGO PAGO I ASILI

SAGATO PETELO MA PAULO

SUAFA MAUGAOTEGA

MAUGAOTEGA I LE AFIO’AGA O ASILI

 

Maugaotega Ena: 

O le atali’i o Leniu Fusilaina i le usuga ia Sinave’a. O Sinave’a, o le afafine o Tuiafono, i le nu’u o Afonotele.

 

Maugaotega Palatiu:

O le tama a Gafo. O Gafo o le teine sa fanau mai fo’i i le isi teine e igoa ia Ta’eletufu. O Ta’eletufu  o le afafine o Maugaotega Ena.

 

Maugaotega Palaita:

O le atali’i o Palatiu. Sa usu Palatiu ia Lotuola (afafine o Palaita i le nu’u o Lalomanu i Aleipata) ua fanau ai le tama ua toe fa’aigoa ia Palaita (Tamā a Lotuola) O Palaita lea sa Maugaotega.

Ae le’i mautu lelei le nofoaiga a Palaita, ‘ae o le vaitaimi tonu lea o le feagaiga a Tuitele Taevai, Afui’a Siota, Leniu La’a ma Maugaotega Palatiu i se fanua o Afui’a e nofo ai Tautā ma Asaga ma si a la tama o Tagitagisolo(f).

 

Maugaotega Paniani:
O le tama a Tagitagisolo, sa usuia Tagitagisolo e Sifagaloa le atali’i o Savea i le nu’u o Amaua, ua fa’ae’e le gafa o Paniani lea sa Maugaotega. O Tagitagisolo o le tama a Tautā ma Asaga.

 

Maugaotega Samuela:

O le tama a Tale’u. O Tale’u o le teine sa fanau i le isi teine e igoa iā Poausoa(f). O Poausoa sa fanau mai fo’i i le isi teine e igoa iā Gafoai’ula. O Gafoai’ula o le afafine o Leniu La’a. O Leniu La’a o le atali’i o Leniu Ve’a. O Leniu Ve’a o le atali’i o Leniu Fusilaina. O Leniu Fusilaina o le atali’i o Afui’a I’ite.

 

O le tama'ita'i o Tale'u na usu mai  ai Tataia ona ona iai lea o lana faletama lenei e to'afitu:

1. Samuela (Nofo i le suafa Maugaotega)

2. Foe (Nofo i le suafa Leniu)

3. Namu

4. Tausilia

5. Sipa'u(f)

6. Melape(f)

7. Lafaele Siani (Na nofo i le suafa Maugaotega) e iai lana fanau teine o Makerita ma Lagi Siloi Lafaele.

 

Maugaotega La’ala’ai:

O le atali’i o Paniani. O isi nei fanau a Paniani e le’i au i le suafa:

  1. Paiē
  2. Sagato
  3. Faitasia(f)
  4. Poi
  5. La’ala’ai ( E pā e lē fanau)

 

Maugaotega Tele’a:

O le atali’i o Leniu Foe. O Leniu Foe, o le uso o Maugaotega Samuela e fanau mai ia Tale’u. E le’i uma le nofoaiga a Tele’a ae sa fa’aui iā Poi lana ula.

 

Maugaotega Faitasia Poi:

O le tama a Faitasia. O Faitasia o le tuafafine o Maugaotega La’ala’ai, o le fanau a Maugaotega Paniani. Talu ai ona o le nofo a Tele’a sa tau fa’aauau e Poi, o Tele’a fo’i sa toe fa’anofoina Tagata’ese.

 

Maugaotega Tagata’ese Tagitagisolo:

O le atali’i o Filipo. O Filipo o le atali’i o Paie. O Paie o le uso o La’ala’ai sa Maugaotega.

 

 Ga’uta:

O le atali’i o Ene. O Ene o le uso o Maugaotega Tele’a

 Paniani:

O le atali’i o Maugaotega Poi. O Poi sa fa’aauina le nofo a Maugaotega Tele’a.

 

_______________________________________________________________________

 

Maugaotega Kelekolio Siani Lafaele

Maugaotega Tomasi Tagataese

Maugaotega Tagataese  Miti 

Maugaotega Savane Tomasi Tagata’ese

SUAFA LENIU

LENIU I LE AFIO'AGA O ASILI

Na sau i lana va’a la’au, sa fau i ana pou utupoto e ono (ono pou tetele i le va’a la’au) sau loa taunu’u mai i Asili, ona alu loa lea i uta, ua tau i le vaitafe, mulimuli loa le toea’ina i le vaitafe, tau loa i le mata o le vai, ma le tilotilo atu i lalo, e iai le afuafu tele o lo ‘o iai, e tasi lava le i’a o lo ‘o i totonu. Alu atu le toea’ina fa’apā le afuafu, ‘ae aumai i fafo le i’a. Aumai loa fasi la’au, tunu ai le i’a, ona fa’apea loa lea, ua uma ona o’u ‘aia le i’a, ‘ae fa’afetai ua maua lo’u aloali’i, o le “AFUI’A o lona uiga “o le afu o le i’a”

 

Toe tasi ona atoa loa lea o lona ‘āiga, o sa na vae savali, o le tauto’oto’o. O sē e alu e tala’i mea a le nu’u. Ae tulia mai loa le tagata mai Sa’ole, taunu’u mai iā Tuitele, aumai iā Leniu, o le ulugali’i e ‘aumai e fai ana fe’au, ‘ai ua tele tagata a Tuitele. O ai le igoa o le ulugali’i? E pule oe po ‘o ā igoa? E leai ni igoa. Faaigoa loa iā Ututagitagi ma Tagitagisolo. E le o ni tau toto o le ‘āiga. Sau le fa’ama’i oti, feoti ai loa tagata o le ‘āiga o Leniu. O le a le mea ua tupu? Ua ola mai le tama a le ulugali’i lea o Ututagitagi ma Tagitagisolo. Ua mana’o Leniu o le ‘a fai le Maugaotega. Ua nofo Leniu i le Maugaotega, a’o lea e laitiiti le tamaitiiti. 

 

Ua te’a ese loa o ia ma le suafa Leniu, ‘ae nofo loa i le Maugaotega. Ma ‘ua matua le tama o le ulugali’i, fai atu loa Leniu, ‘aumai le lua tama o le ‘a fa’anofo i le suafa. Ua fiafia le ulugali’i. O Maugaotega lea o le ‘a faaigoa ai le lua tama. O le a faaigoa ia Maugaotega Tagata’ese, ona o le popoto o tua’ā na iloa ai e le o ni suli moni o le suafa.