FA'ALUPEGA
Susū mai oulua tapunu’u
(Maugatai ma Leafa)
Afio mai le fuaifale o Sālevalasi (Ilimatogafau)
Susū mai oulua matua (Tai ma Fonotia)
Susū mai le pa’ia iā te oe Lufilufi
Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.
‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.
VI'IVI'IGA O LE AFIO'AGA O MANUNU
O le ‘ā faga tonu le malama ma tuli a tasi pea i’a o le moana
Le fa’amoemoe lea sa lupe pale, ua titi, ua faigatā lava
E seu tafilia ai o le na’a, ‘ae ‘ou seu pea i matāto’aga
Tau ina ‘ou sāua i le va, ta lili’a ne’i sala o se fa’amatalaga
Ua tini pa’ō o le uto, ua maualuga ai le aso
Fa’alupega ia o si o’u nu’u o Manunu, e lē galo i le loto
Afio tapunuu ma fuaifale i la’ua matua tala o le fale
Tagata o le Tuiatua
Susū Lufilufi o le Tumua
O sā na ma pa’ia, o si o’u alaalafaga
E lē mafai ona galo atu e manatua pea oe i le agaga
O oe lava oute tiu ai, tepa taula’i ai la’u va’ai
Laufanua lanulau’ava tama saumālū e sili oe i le vasa
VI'IVI'IGA O LE 'A'AI O SAUNIATU
A ‘e faimalaga i Sasa’e ona ‘e tu lea i le ala ma tepa a’e
O lo ‘o iai ona atumauga, o vanu ma ona vaitafe
Oi ona si’omia Etena i le vaitafe o Eufirate
E fa’apenā, Sauniatu lo’u laumua
E! Sauniatu e, ese le lalelei
Ua sui lava ona foliga i ona po nei
Ta te fia fa’aeaina oe
Ia tumau pea lou aulelei
E! Sauniatu e fai oe ma ou sei
A e savali ane i le auala, ma e taga’i lea i le laupapa
O tulafono o si o’u nu’u ia malamalama
Sa o le ulaula tapa’a fa’apea fo’i ma le inu ‘ava
Sa ‘o le le ofu pe ‘a ‘e savali i le ala
Sauniatu o si a’u penina
Lo’u sei, lo’u ula tifa
Ua sili lava oe i atumauga o le Pasefika
E iai le ‘a’ai o McKay, e iai ma le afu i le vai e te ‘au’au ai
Aua le manumanu, aua le mana’o mai iā ita
O Sauniatu o si a’u laumua peleina
Sau loa ‘e va’ai, e te talitonu ai
Si’omia e vai, e fa’amālū ai
ZPONKEY PRODUCTION 1. (2022, May 12). “Sauniatu Lo’u Nu’u” | Bonita Brown ft. Anitele’a Brown |. YouTube. https://www.youtube.com/watch?v=hq5RYrpwgAQ
“Samoa Tourism | Apia Samoa.” Facebook.com, 2022, www.facebook.com/SamoaTourismAuthority. Accessed 14 Feb. 2025.
Sa matou masani e nonofo i Salāfai
Taunu’u loa le tusi ia nonofo ma sauni
Sa fa’asino mai le mea e ō iai
Le nu’u lalelei o le tofi o Samoa
Sa taunu’u mai le malaga muamua
Ma malōlō i maota o Tumua
Sa fa’asino mai le mea e tele ai vai
Gauta o Lufilufi la le 'e tu’u mai ai
Sa taunuu mai le malaga mulimuli
Ma malōlō i maota o Lufilufi
Ua tagi mai fo’i ia totogi atu fale
Ua manatua nei le mativa ausage
O aso puupuu sa nonofo i Manunu
Momomo o le loto pe ‘a manatua o upu
Ia totogi atu fa’i, talo, popo ma ulu
Ma tauemu mai fai ma o mata o lulu
Ina ua amataina le fa’ato’aga
Novema aso 8 i le tetele o uaga
Talofa Misi Kota ua e fia tausami
Pe a fa’apefea nei ua le mumū se afi
Maligi loimata ma momoe i le vao
I le fale muamua e ato i le laufao
Sa le ma moe lava i le tetele o le namu
Ma le malūlū e tata’e lota fatu
Fa’afetai tele i lo outou taumafai
I le galuega lea sa outou milosia ai
Tuu ai pea ia le ‘ua vaivai
E lele fua le pato ae ma’au i le ‘auvai
To’ai lata pele le fafine lototele
Ua iloa oe funa i lou le fefe
Ia avea oe ma matua o le to’atele
Ia manuia oe mai le Silisiliese
Ua fa’afetai i le Tupu i le lagi
Ua fa’asino mai le fanua laugatasi
Tatalo ia tutupu pea mea tausami
Matua pea talo ma ia pula pea fa’i
Le fuifui vine ‘ua uma na to’ulu
Ua malōlō mai i tu’ugamau
Ua itiiti vine o totoe i le la
Talofa, iā Opapo fa’apea ma Elisala
Tali:
E ioe lo’u nu’u e manogi oe
Ua lē galo lava i le fa’amoemoe
E manatua pea le suafa tāua
O Sauniatu i aso o le soifua
Tali:
E ioe se mea e faigatā
Ua lē mautonu pe totogi ea i ni ā
Ua lē mau tupe le Mamona
Totogi loa ‘i ofu ae tau le lavalava
Ina ‘ua fa’alogo le alii Aposetolo
Le leo o le pu ua tau fonofono
Liliu mai loa ma le loto ootia
Sisi’i ona ‘a’ao fai le fa’amanuia
Talofa iā Makei o ia lava o se toa
Le alii Aposetolo na mua mai i Samoa
Ua mae’a o maota ua fa’atūina i Sauniatu
Ma ou ma’a e lua ua fai lea ma fa’amanatu
O folafolaga ua uma ona fai
Sa e saunoa i ai i totonu o le ‘a’ai
Ia amiotonu ne’i tafe o le vai
Le vai sua uliuli ne’i outou tafefea ai
Tali:
Oi auē talofa e oi le alofa e
E lē galo lava ou foliga e
E manatua pea lou suafa tāua
E Sauniatu a’o lo ‘o e soifua
Fa’amālō ma fa’afetai Kamauoha i lou taumafai
Le ala laupapa ma le afu i le vai
O moli uila ua susulu i le ‘a’ai
Galue fa’amaoni o oe o le Isaraelu moni
Tali:
Oi talofa e, pe ‘a tatou toe tete’a e,
E manatua pea au galuega
A o’o i se aso tatou te fa’amavae
Ia tōfāina ia soifua e
Kamauoha e ese lou poto ma si ou faifai mea ofo
E te tino laitiiti ua paso ulu ai aualii
Ou te lē toe tau fai atu ae fai pea o lou manatu
Teu ia lelei si o ta nu’u o Sauniatu
Tania “Tanzlicious” Saga. (2021, May 3). SAUNIATU. YouTube. https://www.youtube.com/watch?v=P-ju8qT1ZOo