FAASUAGA LE AFIOGA I LE MA'UPUTASI IA MAUGA MANUMA

FA'ALUPEGA

 

Afio mai Mauga o le Ma’uputasi, o le tama fa'asausau, a Sua ma le Vaifanua, Fofō ma Aitulagi, Itu’au ma Alataua.

Susū mai tei ( Fanene, Uifa'atali, Lealaifuaneva)

Susū mai anoalo ( Te'o, Asuega, Atiumaletavai, Olotoa ma Leota)

Susū mai Matua ( Taito ma Pulumataala)

Susū mai Nofo Fanau ( Gi ma Vaivao)

Susū mai Anoaloifale ( Lea'oa ma Fa'afitigalo)

Mamalu mai lau tōfā Tuā’olo na faleagafulu ai le motu ma le Falefa

(Fuga, Mageo, Poiali'i ma Lago)

Maliu mai oe le Launiusaelua.

 

Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.

‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.

EKALESIA FA'APOTOPOTOGA KERISIANO AMERIKA SAMOA (EFKAS) I PAGO PAGO

PULEAGA KATOLIKO SAMOA PAGO PAGO I PAGO PAGO

FINAGALO PAIA O IESU

EKALESIA A IESU KERISO O LE AU PAIA O ASO E GATA AI I PAGO PAGO

CHURCH OF JESUS CHRIST OF LATTER-DAY SAINTS

EKALESIA ASO FITU O LE TOE AFIO MAI (SEVENTH-DAY ADVENTIST) I PAGO PAGO

EKALESIA FA'APOTOPOTOGA KERISIANO AMERIKA SAMOA (EFKAS) I ATU'U

O LE MALAMALAMA O LE OLA FOU IA KERISO

EKALESIA ASO FITU O LE TOE AFIO MAI I SATALA

SATALA SEVENTH-DAY ADVENTIST CHURCH (SDA)

VI'I O LE AFIO'AGA O PAGO PAGO

Tulouna ia le pa’ia ma le mamalu

Samoa o pa’ia mai le vavau

A e se’i o’u fa’amatala

O Pago Pago o si o’u afio’aga

Afio ai o le ma’uputasi

Afio ai fo’i tei ma anoalo, matua ma le nofofanau

fa’apea  anoaloifale

Le fetalaiga iā Tua’olo

Le na falesefulu ai le motu

Le mamalu o le falefā

Le launiusaelua

 

Le Fagaloa e, sau ia ta ō

Se’i o tatou patipatia

O se finagalo ua osia

Lenā i o tatou tua’ā

Ua ta’atitia mai i tiasā

O le motu lea o fiafiaga

Sau ta ō ‘e tafafao i le taulaga



Oute lagi ai o si ‘au pese

Amerika Samoa o la’u pele

Ua lauiloa oe i le fa’afanua

O Pago Pago o si o’u laumua

Taga’i ane i ona autafa 

E sulugia i le sami tioata

O ona mauga e lanulau’ava

Oute tiu ai i au evaga



Ua lauiloa oe i ta’aloga

Le aeto ua e fa’ailoa

Le fa’aagatama o le tai

Finafinau mo se tatou ‘ai

Pago Pago o lou afugia

Nu’unu’u i le ‘aufueloloa

I ‘upu fai o Samoa




O LE SUAFA PULUMATAALA

O le usuga a Sagapolutele i le afafine o Vāmaua i Salelesi fa’ae’e le gafa o le tama o “Pulumaukau”

 

Na toe sui lona igoa iā “Pulumataala”. O le taimi uma lava e alu ai le ali’i lea o Sagapolutele e fagota, o le faiva lea o le uaua malau i le pō, e taunu’u mai loa lava Sagapolutele ona fai loa lea o le  la mea tausami. E tunu pa’u la i’a o le faiva. O taimi uma lava e sau ai i pō uma le toea’ina, ma fai ai le la mea’ai ma lona faletua, e ala mai lava le tama lea. Ona fa’apea lea o le toea’ina o Sagapolutele: “E leai lava se aso- se pō ta te ‘a’ai ai, e lē ala mai ai le tama lea. O lea o le ‘a lē toe igoa ai iā Pulumaukau, ‘a’o le ‘a ‘e igoa iā Pulumataala.

 

O Pulumataala lenei, na usu mai Upolu i le tama’ita’i o Fua’ilelagi le alo o Le’iato fa’ae’e le gafa o le tama o Tafilele. Ua maliu Fua’ilelagi, ‘ae le’i umi lava ‘ae maliu fo’i le atali’i o Pulumataala, o le tama o Tafilele.

 

Ona toe usu lea o Pulumataala i tai i Aunu’u i le tama’ita’i o Fuatino le afafine o Umī, ona iai lea o le fanau e to’atolu. O le ulumatua e igoa iā Pulu, o le tama lona lua o Paniani ma le tama lona tolu e igoa iā Fa’ava’a.

 

Sa iai isi igoa na fa’aigoa ai Pulu, o le atali’i matua a Pulumataala ma Fuatino. O igoa nei e pei o le: 

  1. Amoamo
  2. Utaife’au
  3. Po-ma-le-Mauga

 

Usu Pulu i le tama’ita’i o Ma’akufihsai mai Toga, o le alo e fa’asino ia Tupoutele, fa’ae’e le gafa o:

  1. Gagamoe
  2. Paepaefoa
  3. Sifagaloa Fuaautoa (Si’ufaga-o-Fuaautoa)

 

O le tama lenei o Gagamoe na fa’aigoa i le igoa (Ioane). O le igoa o le faife’au L.M.S (Lonetona Misionare Sosaiete) na aumaia le lotu i Samoa nei, o Ioane Viliamu.

 

O le tama lenei o Paepaefoa na fa’aigoa i le igoa (Leka po ‘o Leta). O le igoa fo’i lenei o le isi faife’au e suafa ia Letter. Ona e leai se fa’asamoa o le igoa, lea ua mulimuli ai lava i le fa’aleoga fa’apapālagi o le ‘upu “Letter”.

 

O le tama lenei o Si’ufaga-o-Fuaautoa na fa’aigoa i le igoa (Siale). O le igoa o le faife’au e suafa iā Charlie, e to’atolu ai faife’au na omai.

 

O le tuafafine o Ioane, Leta ma Siale, o le tama’ita’i o Toso’eseletamalēmamā.

 

O le tama o Manumā e iai i totonu i le li’o lea o le fanauga.

 

O Gagamoe ma Paepaefoa e pā.

O Si’ufaga-o-Fuaautoa ma Toso’eseletamalēmamā e iai o la suli.

 

Na usu Charlie(Siale) Si’ufaga-o-Fuaautoa iā Tamasailau le afafine o Tataipu i Agugulu fa’ae’e le gafa o le teine o Sailau ma le teine o Sisifo.

 

Na toe usu Charlie(Siale) Si’ufaga-o-Fuaautoa i lana usuga lona lua i le tama’ita’i e suafa iā Toga Taipu le afafine o Foutanu i le nu’u o Masefau ona iai lea o le teine o Toga(2).

 

O lana usuga lona tolu i le uso o Toga e suafa iā Si’alei le teine la’itiiti o le afafine lava a Foutanu mai Masefau maua ai le tama o Fuaau, lea na igoa fo’i iā Mutia, na nofo fo’i i le suafa Te’o, toe saofa’i i le fa’asuaga o le suafa Mauga. E iai ma le teine o Sifagaloa ma le teine o Pogai.

 

Fuaau Mutia Te’o Mauga

 

Na usu i le afafine o Leota mai Pago Pago, o le tama’ita’i o Siafuafu Leota ona fa’ae’e lea o le gafa o:

  1. Falepopo (sa nofo i le suafa Te’o)
  2. Pulu (sa nofo i le suafa Taulago)
  3. Punitia
  4. Siale(2)

 

Na usu Taulago (na igoa fo’i ia Pulu) i le afafine o Nakoli Solovi (Iemaima) i Amanave ma Poloa fa’ae’e le gafa o:

  1. Eti (Eddie)(m)
  2. Uiva (Weaver)(m)
  3. Vaovai(f)
  4. Ima(m)
  5. Malaela(f)
  6. Falepopo(m)
  7. Filiaga(m)
  8. Eti(m)

O Pulu Taulago i lana usuga lona lua, na usu ai i Vaovai Falealili ia Ta’aga le afafine o Meleisea fa’ae’e le gafa o le teine o Amelia.

 

__________________________________________________________________________

 

O Pulumataala(Pulumaukau lea) o lona atali’i o Pulu.

 

Na sau Pulumataala ia Mauga e pei o se malologa iai, ma asiasi mai ai iā Mauga ma na aumai ai lona atali’i lea o Pulu, ‘a’o laitiiti lava. Na aumai lea ua fai ma atali’i o Mauga, le tama lea o Pulu.

Ua o’o ina matua le tama ma malosi, ua va’ai tagata i le malosi o lea tagata, ona o le malosi e amoamo. Le tagata lea fa’apea, ‘a alu le faiva o Pulu e alo, e to’alua lava tagata e avea le va’aalo. Na ‘o le tagata e i le ama, Pulu i le ogāmanava o le va’aalo ona amo to’atasi lava lea e le ali’i le va’a atoa, ‘ae na’o le ama lava e tu’u i tagata e to’alua. Ua fa’apea tagata, ‘e leaga lava lou atali’i e amo-tele, o le tagata amo a lea a lo tatou nu’u”.

 

O le isi igoa o le Utaifeau. O le mea na mafua ai le igoa lea o le Utaifeau, ona o Amoamo ma Paniani na tutuli e Mauga e o i Savaii e va’ai pe o le a le mālō lea ua ifo iā Malietoa. Ona ō ai lea o Pulu lea ua Amoamo nei ma lona uso o Paniani. Ua taunu’u i le itumālō o Atua i ‘ele’ele o  Lepā, ma ‘o le po lava lea na leiloa ai le ali’i o Paniani. Ua fai‘āvā i le tama’ita’i mai Falealili.

 

‘A’o Pulu po ‘o Amoamo fo’i, ua alu e su’e se auala e alu ai i Savaii e va’ai po ‘o le a le mālō lea ua ifo iā Malietoa. Na maua lana auala i le nu’u o Amaile ma alu ai loa i Savaii. O le malaga a Mata’afa e alu fo’i e va’ai le mālō lea, ma le mea o iai tagata ia o le mālō e fa’apea ua ifo iā Malietoa. Na taunu’u le malaga i le afio’aga o Iva i Savaii, ona talimālō lea ma malōlō i le fale o Moemai, o le failauga o le nu’u.

 

Ona fesili lea po ‘o fea e sau ai le malaga, ‘ae tali Pulu(Amoamo): “O le malaga nei e sau mai i Tutuila, o a’u o le atali’i o Mauga. Ua ou sau e fia va’ai po ‘o le a le mālō lea ua ifo iā Malietoa. Ua tuli mai a’u e lo’u tamā. Ua fa’apea mai loa Moemai, “O le a tatou tofafā lelei iinei. ‘A malama loa le taeao, ona ‘e usu loa lea i Sapapali’i. Ia ‘e fesili po ‘o fea le fale o le tagata e igoa iā Mago. Afai ‘ae maua le fale o Mago, ona ‘e ulufale lea i ai. Ona e ta’u lea iā Mago le fe’au na ‘e sau ai, na sau iā Mauga, na e sau e fia va’ai Malietoa. O le tagata lenā o le ‘a lua o. Ia fa’amatala uma iai le fe’au, ona oulua o lea e va’ai Malietoa e tusa i le mea na auina mai ai oe e Mauga.

 

O le vaitami ina ‘ua Malietoa Vainu’upo, peita’i ina ‘ua talia le talalelei, o lea na suia ai loa iā Malietoa Tavita.

 

Ua uma ona fa’amatala o le fe’au iā Mago. Ona fa’apea lea o Mago: “O le a ta ō loa, se’i o ta o iā Malietoa e ta’u i ai le fe’au mai iā Mauga. Ua taunu’u i le maota o Malietoa ma fa’amatala loa lea e Mago ma fa’aali i ai le ali’i lea o Amoamo ua sau. O ia o le atali’i o Mauga, ua sau na te fia iloa pe o le a le mālō lea ua ifo iā Malietoa. 

 

Ona fa’apea atu loa lea o Malietoa, “Ua lelei”. Fa’afetai atu lava iā Mauga i le tapua’iga. O le mālō lenei ua ifo, e le ‘o se mālō fa’alelalolagi, ‘ae o le mālō o le Atua, o le mālō o le fa’aolataga. E le toe iai ni toto masa’a ia Samoa. O le mālō o le Atua. O lenei ua fiafia ai Samoa ina ua maua le mālō o le fa’aolataga. Ua fa’apea atu Pulu(Amoamo) i le Malietoa: “Ua fa’amālō fa’afetai”. Ona fa’apea mai lea o Malietoa: “Ua toe itiiti ona tatou va’ai atu lea ua omai tagata na omai e aumai le mālō. O tagata la ia, o tagata ia na aumaia le talalelei i Sapapali’i. O tagata  na omai mai Tahiti. Na filogia mai ai ma le ulugali’i po ‘o tagata Samoa o Faueā ma Puaseisei, sa la’ua fesoasoani i faife’au nei i le fa’asamoaina o tala mai le  Tusi Pa’ia.

 

Ona nofo ai lea o Amoamo ma va’ava’ai i le faigāmālō- o le fa’amatalaga o le Tusi Pa’ia. ‘Ua uma le fa’amatalaga o le Tusi Pa’ia, ona fai loa lea o le malologa. Tapena taumafataga, fai mai ua tatala pe talai ‘apa i’a ona ‘a’ai ai lea. Ai o mea ia o samani ma mea o ‘apa eleni. ‘Ua uma ona ‘a’ai, ona tufa atu fo’i lea o fasi tapa’a a le tagata. Ua tofu lava le tagata ma taumafa lana fasi tapa’a, ua fiafia ai lava iai tagata Samoa, i aso uma lava e fai ai malologa.

 

Ae o le mea muamua na va’aia e le tagata lenei o Amoamo, na ia matauina ai tagata nei na latou aumai le mālō, ‘ua vaai atu i o latou tino e ufiufi uma o latou vae, amata mai i lalo o vae, se’i o’o lava i luga i o latou ulu. Ua na’o lima lava e aliali mai, ma taliga ma mata, ae ufiufi fo’i o latou ulu. Ai o le pulou lenā, o ofuvae ma ofutino mafanafana.

 

Ua o’o ina tolu masina o nofo pea lenei ali’i o Amoamo ma nofo a’oga e molimauina a’oa’oga e pei ona iai le taunu’u mai o le talalelei i Samoa, o lea na ia fa’apea atu ai loa ia Malietoa: “O ia ua fia fo’i mai se’i ta’u le fe’au i lona tamā o Mauga, ‘ae fa’apea mai lea o Malietoa i le ali’i o Amoamo, “Ua lelei, sau inā e fo’i ma ‘e alu ma mea nei e ‘ave iā Mauga. Ua fa’amālō le tapua’iga i le mālō. O le mālō o le Atua lenei. O le mālō o le Fa’aolataga. Sau inā ‘ave le Tusi Pa’ia lenei e fai ma fa’amaoniga o le mālō. Ma le pulou lea, o le ulu o le mālō, ‘o le ‘a ‘ave atu e fai ma fa’amaoniga o le taunu’u mai o le mālō. 

 

Ua uma le fa’amavaega a Amoamo ma Malietoa, ‘ae toe fo’i Amoamo i Tutuila. Ina ua taunu’u le malaga a Amoamo, ona fa’apea atu loa lea o Mauga: “Fa’afetai, ‘ua ‘e la’asia vasa lalata ma vasa mamao, ‘ona ua ‘e taunu’u i uta ma le fe’au na ou auina atu ai oe. 

 

A’o fea la le uso ‘o oe o Paniani? Ona fa’apea mai lea o Amoamo, “Na gata lava le ma’ua feiloa’iga i le taimi na ma taunu’u ai i le itumalo o Atua i le afio’aga o Lepā. E mā te taunu’u atu o fai le fa’afiafiaga o le malaga a Falealili o lo ‘o iai i Lepā. Ua ou taumafai e su’e, ‘a ua ma le toe feiloa’i lava. 

 

O lenei la, o le a sui fo’i ma lou igoa. O le a lē toe igoa iā Amoamo, ‘a’o le ‘a ‘e igoa iā Utaifeau.

 

Ua mavae ni nai masina talu ai ona igoa Amoamo ia Utaifeau, ona fa’apea atu loa lea o Mauga ia Utaifeau: “O ā taeao, i le afiafi, ona ‘e sau lea ‘o le ‘a ta o ta te savalivali i le ‘auala”. Ua o’o i le afiafi, ua fai le savalivaliga a Mauga ma Utaifeau. Ua taunu’u atu loa i le auala tele, i le mea o lo ‘o iai le auvai o lo ‘o i tala ane lava o le maota o Mauga. Ona fa’apea atu lea o Mauga: “O le ‘auvai lea, ‘ā ta la’asia atu le tolotolo lea e ta’u o Si’ufaga, o le nofoaga lea o le ‘a tu’u atu ia te oe.  O lou tofi lea talu ai ona ua e tautua ma le fa’amaoni ia te a’u. O lea fo’i ua ou ave atu ai le tofi ia te oe.

 

Ona toe alu lea o le savaliga se’i tau lava i tai i le mea o iai le togapu’a, ona toe tutu fo’i lea i le nofoaga lea o lo ‘o ola iai le la’au lea o le pu’a, ona fa’apea atu lea o Mauga: “Masalo ua e iloa le tagata lea- O ai le tagata lea o lo ‘o nofo mai i lea mea? Ona fa’apea mai lea o Utaifeau(Amoamo): “O Fanene”. Ona fa’apea mai lea o Mauga: “O lea nofoaga, o le tofi o Fanene mai ia te a’u. ‘O le ‘auvai lea, e tua’oi ai oe ma Fanene. 

 

Ua toe savavali fo’i lea, ma ua maua ai le igoa o le mea lea, ua ta’u o Lalopu’a. Ua o’o mai lava i aso nei, o ta’ua pea lea vaega o Lalopu’a- ona o le mea sa tutū ai Mauga ma Utaifeau.

 

Ua taunu’u i le mea o lo ‘o iai le isi tagata, o lo ‘o nofo ai, e igoa iā Sakala(Satala). Ona toe fa’apea atu fo’i lea o Mauga: “O le tasi lea tagata na aumai e le tamā o lo’u tinā e tautua ia te a’u, o le igoa o lenei laueleele o Satala. O lenei lava laueleele e i luga i le pule’aga a Mauga. O le a tā toe savavali.

 

Toe fa'aauau lea o le savalivaliga lenei, ona tau atu lea i le mea e ta’u o “Anua”. Ua taunu’u i le pito i tai o Anua, i le va o Anua ma Atu’u, o lo ‘o iai le auvai. Ona tutū loa lea i lea mea. Ua fa’apea atu lea o Mauga, “Ua ‘e va’ai i le mauga lea e tu mai i luga? O le mauga lea sa fa’alele mai ai le lupe a le tuafafine o a’u, e igoa iā Tulimalefo’i. E iai lā le alaga’upu a lo’u tamā e fa’apea: “Na fana i le lagi le lupe a Tulimalefo’i, ‘ae ifo i Anua”

 

O le tua’oi la lenei o Anua ma Atu’u, o le fanua tau Mauga. Ma o lenei la mea e ta’u o Anua, o le tofi o lo’u tuafafine o Tulimalefo’i. ‘A fa’apea e afio mai Le’iato, o lona lau’ele’ele lava lea. Tau lava o Le’iato. A leai, e iai pea ia te oe lea lava fasi ‘ele’ele se’ia o’o lava ina iai se tagata e fa’ataunu’uina pe fa’aaogaina lea fasi lau’ele’ele, mai i totonu o le aiga Sā Leiato.

 

Ona fo’i mai lea o le savaliga. Ua taunu’u i Pago Pago i Gagamoe, ona fa’apea lea o le toea’ina o Mauga: “O le ‘a ‘e nofo la i ‘i, i le paepae a’o lo’o tu le toea’ina. Ua fa’apea atu Mauga iā Utaifeau: “Ua uma nei ona e malamalama i le lau’ele’ele, ma e nonofo ai, atoa ma lou tofi na avatu. O le a le toe igoa iā Utaifeau, ona pipi’i atu loa lea o le toea’ina ma ua tago atu i tau’au o Utaifeau ma fa’apea atu: “ O le a ‘e igoa iā Po-ma-le-Mauga. Ona maua loa lea o le igoa o Mauga Pomale.

 

Ua o’o ina maliu Mauga, ona tula’i mai lea o Mauga Pomale

 

A’o le’i alu Pomale(Amoamo) i Savai’i i le fe’au a Mauga, ‘ua uma ona iai le usuga a Pomale i le afafine a Tupoutele. O le tama’ita’i o Ma’akufihsai ona iai lea o le tama o:

 

  1. Gagamoe
  2. Paepaefoa
  3. Si’ufaga-o-Fuaautoa

 

E iai lā le tama lona fā, o le tama lea e fo’i mai Amoamo(Pomale, Utaifeau, Mauga) ua mamafa le tama’ita’i o Ma’akufihsai le faletua o Mauga i le tama o Viavia Faio mai Nu’uuli. Ua fanau mai le tamaitiiti, ua fa’aigoa lea e Mauga Pomale iā Manumā. O lona uiga o le faiga lenei  a le atunu’u e faia igoa fa’apea e fa’ailoga ma fa’amanatu ai mea na tutupu. 

 

Ona toe fanau ai lea o le afafine moni a Mauga Pomale ua fa’aigoa ai loa e Mauga  le teine lea iā Toso’eseletamalēmamā. 



Toso’eseletamalēmamā o le tamasā lea o le 'āiga o Sā Maugā

Tulimalefo’i o le taupou lea o le 'āiga o Sā Maugā.



O LE TALA I LE TOA O FUAAU

Ina ua logotala tagata Tutuila 'i le mea na tupu i Samoa i Sisifo, sa manatu ni isi ua tatau lona ona tutuli 'ese tagata Toga mai lenei fo'i motu. O Lautivunia, le uso o le Tuitoga, sa pulea le mālō o Toga i Tutuila. O aso fo'i ia, sa nofo ai i Tutuila se tagata toa, sa igoa ia Fua'au. 

O le ali’i lenei o Fua'au, sa na ia tūlia le mālō o Toga i fafo mai le motu o Tutuila. E matuā tino malosi lava ma le toa, peita’i o tagata Tutuila uma na matuā fefefe lava. Ua fai atu tagata Tutuila iā Fuaau, “Aua le tulia le mālō o Toga, ne’i maua tatou i le pologa ma le faigatā tele.

 

Na le mafai ona solomuli Fuaau. Sa ia fai atu i tagata e fa’asaga pea e tau le taua, ‘ae ‘aua le fa’avaivai. Peita’i, na fa’avaivai pea ma pala’a’ai tagata uma. Ona fa’apea atu lea o Fuaau, “Ua lelei, ‘ā fai ua outou lē mafai ona tau, tu’u mai ia i a te a’u.” O lea na usita’i ai loa tagata uma.

 

Ona o’o atu loa lea o Toga i Tutuila, ua nonofo ai ma fa’asavali lo latou mālō; ao Fuaau ua nofo ma mafaufau po ‘o le a se mea ‘ā maua ai Toga. Na ia manatua vave le la’au o le toa, o lo ‘o i le fanua o “Fatugau”. Ona ia alu ai lea ma ta le toa; ‘ae fai atu le ali’i ‘o Vaoia iā Fuaau: “Afai e ta lau la’au ‘ia fa’amanifi le lau, ma 'ia pulu fo’i le 'au ina ia sasapala ai ulu o Togamamao. O le mafua’aga lea o lona igoa, o Fuaautoa. Ona toe fai atu lea o Vaoia: Fuaau e, 'ia tauane ma oe; ‘āfai 'e le tulia Toga, ‘o le ‘ā maua i tatou i se faigatā, ‘auā ‘o lou loto ‘o le a tau ai nei le taua. Ona tali atu lea ‘o Fuaautoa iā Vaoia: “Tu’u mai pea, faitalia a’u ‘o taeao, ‘o le ‘a ‘ou fa’asaga e tau ai le taua.

 

Na malama le taeao ona tau ai lea o le taua. Sa matuā tele le fasiga o Toga. Na matuā fa’ato’ilaloina lava le ‘autau a Toga mai Sasa’e e o’o atu lava i le fa’asi’usi’uga i Sisifo o le motu o Tutuila.

 

O se tasi o fetaua’iga na iloga ai le tele o Toga na maliliu, sa tupu lea i Leone i le mea tonu sa iai le ā’oga a tama(Fagalele). Na maua ai ma le igoa o lea mea o “Numiatoga”. I le fa’asi’usi’uga i Sasa’e o le motu na tele ai le fa’ato’ilaloina o Toga, o lea na tuli ai ma le ma i tai i se tasi faga ma fa’atali mai ai o latou va’a ma sosola ese ai. Na maua ai le igoa o le faga o “Matuli” o lo ‘o feagai tonu ma le motu o Aunu’u. 

 

Ona fa’apotopoto lea ‘o le itūtaua a Fuaautoa, ‘o le ‘a faitau le fasi o Toga. Ona faitau ai lea e tasi le mano o tagata. Ua i’u le taua, ‘ua tulia Toga. ‘Ua matuā fiafia tele lava Tutuila ma le fa’afetai, ‘ina ‘ua mālō Fuaautoa.

 

O LE SOLO LENEI I LE ALI’I O FUA’AUTOA

 

Fua’au e, lo’u tai ‘ua tea

Lo’u tai e lē fati se galu,

Lo’u nu’u e lē ‘olo se manu,

E matata’u ia te a’u.

 

Taia le toa i Fatugau

‘Atā la’u la’au ia manifi le lau

Ia pulu le ‘au

E sasa a’i ulu o Togamamao.

 

O a’u ‘o Fua’autoa mai Pago Pago

Ma la’u tāsolo e to’amano

Ma le tuli ‘o Toga na alu atu.

TALA IĀ LATA PO 'O RATA

O Lata sa ola po’o le tausaga e 860 A.D. O ia o le alo o Fafieloa ma Tula. O le tamā o Fafieloa o Tavai. E foliga mai sa nofo lea tagata i Pago Pago. E fa’apea le tala, na tagatavaleina Fafieloa e se ali’i sa suafa i a Matu’uta’ota’o, ma e lē iloa le mafua’aga. O lea tagata o Matu’uta’ota’o sa nofo i Fogātuli i Savai’i, i Samoa i Sisifo. Sa tonu iā Lata e taui ma sui le tagatavaleina o lona tamā. O lea na ia fausia ai se va’a. O le tala mai Manu’a e fa’apea, o lenei va’a na fausia lava e Lata , i Tafagafaga, o se nu’u i Sasa’e o Ta’ū (po’o Manu’a). Ina ua mae’a ona fausia o le va’a, sa malaga ai loa Lata i Savai’i, ma o le nu’u na taunu’u i ai, na fa’aigoa iā Lata. O se nu’u lauiloa i aso nei i Savai’i; ma e lē mamao fo’i ma Fogātuli, le nu’u sa lafi ai le tagata na fasiotia lona tamā.

Talu ai la, sa le’i maua e ia le tagata na mana’o na te fasiotia, o lea na malaga ai loa i Toga. O i’inā, e tusa i le tala a Manu’a, na maliu ai. Sa talatala ai loa e tagata Toga ma tu’u ‘ese’ese vaega o le va’a, ona o lo latou fia iloa ona fausia o so latou lava va’a e foliga i ai.

Sa fauina ai loa e tagata Toga so latou ulua’i ‘alia, ma o si fale sa latou fauina i luga o le fata o le va’a, sa ta’ua o le “Fale Fa’amanu’a”. O ni tala tu’u a Sāmoa, e sapasapaia fo’i le tala a Toga ma Maori, e fa’apea o Lata po’o Rata pei ona fa’aigoaina e ni isi, na malaga atu i Savai’i, ma na lafoia ai lona va’a i luga o le ā’au ma liu ma’a ai. Na taunu’u Lata i le matāfaga i lona fia maua o Matu’uta’ota’o, peita’i, sa ta’u ane e tagata o le nu’u iā te ia, ua malaga le ali’i i se ‘alia saosaoa tele.

Ona o le naunau tele o Lata e tuliloaina loa le ali’i, na alu ai i le togāvao ma maua ai ni tāmanu (lā’au) mānanaia lava se lua, na ia tu’uina ai loa i lalo. Sa saga’i loa ma galuea’iina i lona malosi atoa, ma ina ua goto le la, ua toetoe lava ona mae’a lelei itū va’a e lua. Sa ia fo’i atu i le nu’u, na fa’aigoaina fo’i o Lata, mo sana mea’ai ma mālōlō ai fo’i.

I le taeao po o le aso na soso’o ai, sa alu ai fo’i e toe galue i lona va’a. Ae pagā, e le o ni itū va’a na ia maua atu a’o la’au tamanu e lua sa tutū mai, pei lava ona ia maua atu i le aso muamua. Sa lūlū lona ulu talu ai, o lona manatu, o se miti lava lea uiga. Sa ia toe tago atu fo’i i lana mātau, ma tatu’u i lalo nei la’au se’ia o’o ina pā’u’ū. Sa toe galue loa fo’i ma fa’amae’a lelei lava nei itū va’a e lua i lea lava aso e tasi.

O lona vaivai tele lava, sa ia toe fo’i atu ai i le nu’u. O le taeao na soso’o ai na ala usu atu ai fo’i i le vao, ma lona manatu o le a mae’a lona va’a i le aso lava lenā. Ae na matuā ofo lava o ia, ina ua taunu’u atu ma va’aia, ua toe tutū lelei mai fo’i ana la’au e lua, pei e femitā’i ma ona tuā’oi.

E ui lava i lenei fa’afitauli ua toe fa’afouina mai, sa toe galue fo’i ia ma le malosi e tu’u i lalo la’au. Sa vave ma mamafa tele fo’i lana galuega; na i’u ai ina mae’a lelei ona sali itūva’a ma saunia lelei a’o le’i goto le la. Sa ia le toe fo’i atu i le nu’u; na ia lafi i se pūpūvao latalata ane talu ai, sa ia fia iloa lava po’o le ā lenei mana na mafai ai ona toe fa’atutū ma ola nei la’au pei lava e leai se mea na tupu ai.

O le aso na soso’o ua mavae le masina atoa na ia fa’atalitali ai mo si na taimi. Ina ua oso a’e le masina i le tafatafa’ilagi, sa ia iloa atu ai loa se va’aiga uiga ese. E sefulu ma le lua ni aitu na fa’afuase’i ona fotu a’i ane ma sisiva fa’ata’amilo i lona va’a; a o latou pepese e fa’apea:

“Felelei fa’atasi, saliga ma tipiga;

 Ona tutū lea i luga, oulua o a matou penina;

Fepi’ita’i ia, fepi’ita’i ia, ma mamau fa’atasi;

Tāofimau, tāofimau oulua ia mau a’ia’i!
Felelei fa’atasi, saliga ma tipiga,
Oi, tutū ia i luga oulua, o ā matou penina!”

E lē ma fa’amatalaina le māofa tele o Lata ina ua va’ai atu a’o faia pea pesepesega a nei aitu, o fasilā’au uma, saliga ma tipiga, ua toe felelei ane uma ma fepi’ita’i fa’atasi, o le fasi la’au lava ma lona la tulaga tonu, ma, a‘o le’i uma nei pesega, ua toe tutū lelei mai lava nei la’au e lua i o la’ua tulaga i le vaomatua. Ona o le uiga ese o lenei va’aiga na ia molimauina, sa le’i ita ai lava o ia. Ae na ia fa’alatalata atu i la’au ma aitu ina ua mautinoa lelei e ia e le’o se miti na ia faia a’o le mea moni lava.

Ina ua ulufale atu Lata i totonu o le li’o a nei aitu, na fa’apea loa i ai se tasi ia te ia: “Ua e tu’uina (tatipi) aiseā i lalo a matou pele? O ai na ave atu ia te oe le fa’atagaga e fai ai lea uiga? Na e aumaia ni sauniuniga e ave atu ai se taulaga iā Tane le atua o lā’au? Ona o lou fa’atamala e uiga i lea aganu’u pa’ia, o le a lē mafai ai ona e maua o nei la’au. E sili ai lou fo’i atu i lou āiga ma fa’agalo mea uma.”

Peita’i, ona o le naunau tele o Lata ia maua nei la’au, o lea na ia talosaga ma fa’atoga atu ai mo se fa’amāgaloga, talu ai lona le’i faia e tusa ma aganu’u pa’ia. E le gata fo’i i lea, sa ia folafola atu fo’i o le āia fa’amalieina lava le finagalo o Tane mo sana taulaga lelei o le a molia, pe ‘ā fai latou te fautuaina ina ia tu’uina atu nei la’au e lua e galuea’iina ai lona va’a.
Ina ua va’ai atu lenei aitu i le māfātia tele o le loto o Lata i le fa’anoanoa, sa ia fai atu ai loa e fa’apea, o latou lava (aitu) o le a fausia le va’a mo ia, ma o le a mae’a ma saunia mo le sami i le aso a taeao.

Sa fa’afetai atu Lata i aitu e tusa ma le latou folafolaga o le fesoasoani mo ia, ona fo’i atu ai loa lea i lona āiga. Ae o le mea na tupu, sa tau lē mafai ona moe o ia talu ai nei mea ofoofogia na tutupu sa ia molimauina. O lea, i le taeao po lava, na ia ala usu atu ai i le vaomatua ma mafaufau po’o le mea ua māe’a ona fausia e aitu lona va’a, po’o se tasi fo’i o a latou fa’atausuaga ua fai mai ia te ia.

Peita’i, na matuā maofa lava ma le fiafia tele ma le malie atoa fo’i o lona loto, ina ua va’aia e ia se va’a matagofie tele ua ta’oto mai le mea tonu lava sa tutū ai la’au e lua, ae ua leai nei se aitu e toe iloa atu.

Sa ia toe fo’i loa i le nu’u ma fa’atalanoa fa’atasi ma le taulaitu, mo se taulaga lelei ma le matagofie e feagai ma lana moliaga. Ina ua mae’a nei aiaiga, sa tu’uina loa lona va’a i le sami. Auē! na fa’amaonia lava le manaia o le va’a. Sa ia fa’aigoaina iā Pualele (“Pua”, e fa’amanatu ai lona tua’ā, ma “Lele” ona ‘o le saosaoa tele o le va’a (pei e lele)).

Sa tau lava lona fiafia i lenei va’a folau manaia tele, talu ai, ua mautinoa e ia o le a vave ona maua atu ai lona fili o Matu’uta’ota’o.

O le aso atoa lava sa ia sauniuni ai mea uma e aogā mo lana faigāmalaga umi. Ona ia malaga loa lea mai le tasi motu i le isi, i le sā’iliga lava o le na fasiotia lona tamā. Mulimuli ane, na maua atu o ia i le tasi motu la’itiiti o le Atu Toga.

Sa lu’itau loa o ia e Lata mo sa la taua i ni uatogi. Sa vevela tele lea taua peita’i, na pu’upu’u fo’i; talu ai o Lata, e sili mamao lona malosi ma na ia fasiotia lava lona fili i se tā malosi i lona ulu. Ma, ina ia fa’ailoa atili lona lava malosi i lea taua, na to’ese e Lata lona fatu ma ‘ai. Ona o lenei mea na tupu, sa fa’aigoa ai o ia e tagata Maori, o “Rata-aitu.” O le ate o se tagata ua fasiotia, e lē tagofia e se tasi ona o le talitonuga, e na te fa’atupuina le pala’ai. O lo’o fa’aaogāina pea e tagata Sāmoa i aso nei ia upu: ate’ai, atesū, ma le ‘ai ate; o fa’ailoga uma lava ia o le ‘ai ate, ma o lo’o fa’amaonia pea lea talitonuga.

A’o le’i uma le ola o Matu’uta’ota’o, sa ia fetu’uina le va’a o Lata, ona o le aumaia o Lata ma maua mai ai o ia. Ona o lea fetu’u, na lafoia ai ma malepe le va’a manaia o Lata a’o le’i tu’ua e ia Toga. Peita’i, sa u’una’ia pea o ia i lenei mana’o lē malie o le sa’ili i ni mea fou, o lea na ia toe fausia ai loa se isi va’a, sa ia fa’aigoa ‘o Riwara.’

O lenei la va’a, sa ia sopo’ia ai le Pasefika i le sa’iliga o ni lau’ele’ele fou, ātoa ma ni mea fou e tutupu. E tele ni uiga ma ni amioga o lona loto tele sa feagai ma ia i motu ‘ese’ese na ia asiasi atu i ai.

E fa’apea se tala, sa mafai e ia lava ona liua o ia i so’o se itu’āiga o manulele. Tusa o le tausaga 875 A.D., na ia taunu’u atu ai i Niu Sila, ma talu ai lona fiafia i lea atunu’u, ma nofo mau ai loa lava. Ātonu o ia o le ulua’i Polenisia na fa’a’aināina le Motu i Saute o Niu Sila.

Usu Pua iā Sigano(f)

  • Tafa’i
  • ‘Ālise
  • Ifiifi

Usu Tafa’i (Usuga 1) iā Sinataeolelagi

  • Lā
  • Matiu(f)
  • Sa’asa’a(f)

Usu Tafa’i (Usuga 2) iā Hinepiripiri

  • Fafieloa (Wahieroa)

Usu Fafieloa iā Tula

  • Lata



Puna'oa o fa'amatalaga: https://samoanmythology.org