Tusia e:
(Sunu’itao) Mavaega Ronnie Puletasi Fuimaono
Matuaofaiva o le Gagana ma le Aganu'u Samoa
Laumua i Leone
TULOUNA LE LAGI
Ua tagi le fatu, ua tagi tutū fo’i le eleele
To mai le ua, ua lanu ai Samoa uma
Ua gatete le laueleele, ua masae le lagi
Pa le patasi, ua tapasavali
Ae pa’ū mai Pili ua tuli mai e Tagaloalagi
Ua malepe le falelagi
Lo’u gutu ma le afi
Tulouna le lagituatasi
Tulouna ia le lagi ma le ma’a o malie
Tuimanua e, lo’u alii e
Auā ua fai i lagi le tuligasi’a o Tagaloalagi ma le aiga
Ua gasetoto le masina, ua fa’alava fo’i le aniva
A asamo vai le fuialoa, ‘e asamo le taufa’alava atoa
Ua ifo ai nei le ūiō ma le alaga
Pili e, ‘a ‘e nofo pea lava ‘ae le tago i le fanā o le va’a
Ona a’e ai lea ma to ifo le fale’ula i ona vaifanua
Tulouna le lagitualua
Usu pepe i le tausuni, ae usu lupe i le mafua
Utufia le vai o Suasua, na utuvai ai Utulafalafa
E utuvai ma ona loimata. E tau pō iai tagata
E te afio mai i faleniu na, ma e to’a i epā
Ae oute fa’asau atu i fafo nei. O mata o to’ilalo e fasia nei
Lea ua to atu iina, to iinei
A’e i le ti, ‘ae ifo i le nonu
O le tagata na fai i le fa’atusa o le Atua Tasitolu
Tulouna le lagituatolu
Taligoligoa ai mauga o ao ‘ae lologo le faleselau
Ua sātia le ala i folauga ma le seuga na seu i atululuga
A folau tautai i afā, pe ‘ā sōua o muliava
Ao tautai matapalapala, e aogā i aso loulouā
Ua alu le logo i fale’ula
E sā ona lele ai o se fiaui, e sā fo’i o se manumā
Auā ua pa’ia malae, ‘ua sā
Tulouna le lagituafa
Tagaloalagi ua ati mai le niu sa fai ma pou o lauga
Ua fa’asausau le ali’i, ua malele le saunoaga
Omai inā telea’i i le lagi
Ma ‘a’ami le lātasi
Se’i taga’i i le lagi lele ‘ua ututafitafi
E! Ua fai i lagi le tuligasi’a
‘A Sā Tagaloalagi ma le aiga
Tulouna le lagitualima
Fesili Tuitoga Faisautele po ‘o fea o iai le vai
Ae tali Ta’ū: “O lo ‘o iai Vaitolo o lo ‘o leoleo ai
Tuimanu’a ma lona Vaisuatoto, na fano ai Tuitoga i le fia tofotofo
Na fetāgisi auē ta ofa ofa e, auē ta mate matē, ua maliu Tuitoga e
Ua gasolo ‘aualuma ‘ae talanoa le usuga
Aua ‘e te tu’u i le tala a le usuga, ‘ae fa’atali i se tala a Vai
Ua taunu’u Vaitolo, logo la’ia o to’oto’o
Tulouna le lagituaono
Ua lāgia ai Poulima le maota o le to’oto’oali’i
A’o le folauga a Siliaivao na maua ai le toe Tepatasi i Sili
Na usuia ai le maota o Misaalefua i Nainiuotogalei
Ae tali mai ai lau sau i le Lagituaiva ma Talāmoa, aumaia matua i nu’u lelei
Ua pogisa le fale’ula tautagata ma le fale’ula tauaitu
Ona ua agi fa’ata’uta’u uaga ma ua to fo’i le timu
Tulouna le lagituafitu
Sua ma le Vaifanua
Fofō ma Aitūlagi
Ituau ma Alataua
Sa’ole ma le Launiusaelua
E afifio ai Fa’asuaga ma Tama Matua
O le lagi o tai sua
E le o se lagi o tai papa’u
Tulouna le lagituavalu
Tulouna Samoa o le ao mamala
I le fa’asouga o ao ma le atufolasa
Fiti,Ūea,Toga ma motu uma o le atu pasefika
Fa’alologo ma savalivali lēmū auā ua sa le pa’ō, sā fo’i le pisa
Ona ua fa’alava le tama’ita’i o Sina
Tulouna le lagituaiva
Samoa ua so’ona mulu, Samoa ua so’ona fai
E mulu mai i le si’usi’u, ao lo’o nofo a’u le pogai
Samoa e, ia e va’ai i ao o atululuga
E gasolosolo uma i le afio’aga o Tuimanu’a
Ona o le lagituatasi e o’o i le lagituasefulu
O le lagi o Tuimanu’a ma ona gafa tupu
E leai ni tala, e le toe iai fo’i ni upu
Tulouna le lagituasefulu
Tusia e:
May Sinapati
Leone High School
June 01, 2023
Senior Year Class of 2023
E TATAU ONA FA’ALELEIA LE FESO’OTA’IGA I LE VĀ O MĀTUA MA FANAU
E! Le la’i e se’i agi maia
Se’i momoli atu ai lagona ua fia va’aia
Mo’omo’oga ma fa’anaunauta’iga o le loto
E fia va’ai, mafuta ‘i ni mātua ma se fanau ‘ia maopoopo
Auā e moni ai ‘upu ‘ua tusia i le Tusi
Se mea inā lelei o se āiga ‘ae nofo fealofani ma ola lausiusi.
Peita’i ua avea suiga o lenei talutalu fou
Ma ala ua suia ai le nofo lelei o mātua ma fanau
O le fesili e fia tulituli matāgau
Aiseā? O le a? Ae pe mai fea ua mafua ai ona fa’apea
Ta’ilo! oute lē fa’amasino oe se’ia āfea
Ae tautuanā, e toe alei atu lou sa, ua tafea.
O le tamā o le ulu o le aiga
O le tinā o le faufautua
A’o le fanau o le fa’amanuiaga mai le Atua
Peita’i ‘ā fa’aletonu mātua
Ona va’aia loa lea o se ‘āiga
Ua le ‘au fa’atasi ma le Atua.
O mafutaga a ‘āiga ua lē ‘o toe faigofie
Talu le saosaoa o le lalolagi, ua avea ma mea suamalie
Ua fai lenā ma ala, ua leiloa ai e fanau, le va tapu’ia ma mātua
Ae ua soli ai le tulafono a le Atua
Ia ‘e ava i ou mātua
Tekanolosi ma le saosaoa ua iai nei
E le gata i fanau, a’o mātua ua le maua ai se “okay”
Taumafai atu e fa’amaopoopo i ni isi o taimi
Peita’i ua fāoa e le ta lagona ma manatu i lenei vaitaimi
Aiseā ua fa’apea ai?
Ae pe mai fea le fa’apogai?
O lā le Tusi, a’oa’o le tama e tusa ma ona ala
A o’o ina matua, e le toe te’a ese ai lava
Afai ua vaivai le fautua a oe le mātua
Ona e va’aia loa lea o se ‘āiga ma se fanau ua tau fai solo i tua
Talu le leai o se fa’avae mautū
E mafua mai i mātua, o le pogai ma le ‘autu.
O le fanau o le tofi lea mai le Atua
O ē ua fananau mai
O le fa’amanuiaga lea i mātua
O lou fa’asinomaga ma lou ‘āiga
O lo ‘o tula’i mai ai ni mātua
E ola ma matata’u i le Atua soifua.
O le ta va’a e tu i matagi le ta savaliga
E lē taumate le tele o fesoua’iga
Auā ‘e lē malū pea le tai
E iai le taimi e lagona ai le i’u leo o le fa’avaivai
Ua fa’atusa i se malaga e fesuia’i ai lagona
Ma fetāa’i fa’alou le magā ai lo tatou ola
Oute tātā logo atu pea Masefau
Ae pule lava oe le mātua i lau fa’atatau
Ia fa’atāua lou vala’auina
O oe o le matua faitama e lē mapu a’oa’iga
O lau fanau ia u’u mau i ou lima
O le a le pine ona tula’i mai o se ‘āiga ua fa’amanuiaina
O nai o’u nā mafaufauga
Ni aleu o iai, fa’amagalo mai le auauna
O upu fo’i e fai i le fā’agātama
E poto le tautai ‘ae sesē le atu i le itu i ama
A tu’uama le fua ma tatala le fili ali’i
Ia ‘au fa’atasi i tatou ma le Ali’i
"FA’ATUMAU MA FA’ATĀUA LOU FA’ASINOMAGA"
Tusia e:
Aumau Peneueta Taala
Leone High School
June 01, 2023
Senior Year Class of 2023
‘Ou te tu’u atu le lima o le fa’atalofa
Auā ua pa’ia lagi, ‘ua pa’ia fo’i maota
Usi lau silasila ma lau fa’afofoga
‘Ae se’i o’u taumafai e talatala atu nai o’u lagona
Fa’atumau ma fa’atāua lou fa’asinomaga
‘E iloa ai le tama ma le teine Samoa i ana tu ma ana aga.
Tama ma latou ‘āiga, ‘āiga ma o latou tama
‘E ‘amata mai i Saua se’i o’o i Analega
Pa’ia ia Sua ma le Vaifanua
Fofō ma Aitulagi, Sā’ole ma Sale’a’aumua ma le Launiu na saelua
O Samoa ‘e lē o se atunu’u taliola pe talatau pei o Toga
Ua ‘uma ona tofi, e mavaevae ona tulaga, ‘i le soifua mai o tagata.
“E tāua lou fa’asinomaga” oute iloa e fa’amaonia lenei fa’amatalaga
Auā so ‘o se tagata lava i lalo o le lalolagi lenei, e iai lona fa’asinomaga
E lē taumate le tele o fesoua’iga ua fetuleni mai o le olaga
Ona ‘o Samoa e taofi mau i ana tu ma ana aga
Ua tagi ai nei le fatu ma le agaga
La ta aganu’u ua tauau ina māgoto i le sausau o le moana.
O le ta fa’asinomaga na pululima e nai o ta tua’ā
Le measina ia malu ma fa’apelepele ne’i tōlegā
Ia fa’atumau ma fa’aolaola o tatou gafa
O a tigā, e tali le Atua i mafatiaga
Lo’u tupu’aga, lo’u fa’asinomaga, o lo’u mitamitaga
E le galo, e le mavae i aso uma o lo’u olaga.
‘Ou te fa’apelepele ma tausi i lo’u fa’asinomaga
Auā e pei o le ‘upu masani, e uō i aso uma ‘ae sili lava le ‘āiga i lo’u olaga
O se asoa e ‘ula, o se pale i lou ulu
Ia tau’ave ma u’umau ne’i mamulu.
E teu e pei o ni ‘auro ma ni penina ‘i’ila
Po ‘o fea lava le mea e te aga’i iai, e iloa lava tama a tausala i o latou uiga.
Ioe, e mo’omo’o lava iai ma le loto naunau
E pei o le mana’ona’o o le mutia i le sau
O ‘upu a le atunu’u
“E mamae le tava’e i ona fulu”
“E lele le toloa ‘ae ma’au lava i le vai”
La ta fa’asinomaga, le ala na ta soifua ai.
E lē mafai ‘e se tasi ona ‘autalaina
Po ‘o se poto fo’i e na te fa’amasinoina
Ia fa’atāua la ta aganu’u fa’a-Samoa
O le tofi mai le Atua, o le meaalofa foa’i fua mo tā’ua
Ia ta ola ai ma fa’apelepele
Le Atua mamana, ‘o ia lava na fa’amati’e.
Lou pale ‘ia ‘aua ne’i melea
O le sei ‘ia ‘aua lava ne’i lelea
Ua laulauvivilu lanu ma gagana
Fesuisuia’i fo’i uiga ma taga o le olaga
Ua fetuleni mai le tele o suiga
E le gata i totonu o nu’u, ‘ae fa’apea fo’i ‘āiga.
E lē tauilo lou fa’asinomaga
Ona e iloa gofie ai oe i lau savali ma lau tautala
E tāua ia te a’u le manatu a le Tusi o Fa’ata’oto
Lau gagana e teu i lou fatu ma lou loto
Tupulaga e, le fa’a-Samoa ne’i lualuagia
Lo ta fa’asinomaga, aganu’u ma le fa’aaloalo, ‘ia fai ma mea e vi’ia.
Ia lafoa’i le tuana’i, ‘ae sa’ili punoua’i mo le lumana’i
Fa’apei o ‘upu o Paulo i lana apoapoa’i
O le Isaraelu moni e susu’e pea lona fa’amalama
Ne’i galo tua’ā na asaina le gasū o le ala
O lagona lenā o le fatu solo e tu’u atu pea i ou autafa
Mata’itū ma fa’atāua lou fa’asinomaga.
"POLOGA I LE ALOFA"
Tusia e:
Nazareth Misipati
Leone High School
June 06, 2023
I le lotolotoi o le vevesi ma le misa
Pe ‘a magumagu ma mamate mea uma o lo ‘o si’omia ai i tatou
E tasi le mea o totoe
Le alofa, le afi mumū ‘e lē ‘uma
E sili atu nai lo ‘o le fiafia pu’upu’u o le olaga
Ma tumau i tua atu o fa’anoanoaga
A o to’ulu lau ma fuga o la’au
E fa’avavau le alofa o le tagata fa’avauvau
E tumau le alofa ma le faamaoni
O le fa’atinoga ma le fa’ailoga e iloa ai le moni
E sili le iai o se taimi e fa’aavanoa
E maua ai le mafanafana ma le alofa tunoa
E fesuia’i tala o le tau, ma aga’i i luma le suiga o le olaga
A’o le alofa e lagona ai le mafanafana
Fa’atino le alofa i le amio tausa’afia
E maua ai le fealofani ma le fiafia
O le Samoa e a’oa’o ona o le alofa
A’o le usita’i e maua ai se fa’ai’uga maofa
O se taunu’uga matagofie e fotua’i mai ai
Pe ‘afai e taumafai ina ia ola ma usiusita’i iai
E tele ma anoanoa’i uiga o le alofa
Ae mo si na taimi fa’atauva’a e te foa’i ai fa’a meaalofa
Oute fa’amamafa i lea ‘autū
Ona o se vaega ua mana’omia ona fa’amautū
E pologa le alofa
E iai fo’i ni isi ua fa’apologaina i le alofa
Ae o le alofa o se vaifofō ‘i ‘āiga
O se puna e fa’amaopoopo i ni loto ua fa’aleagaina
E avea le alofa ma ua na’o se upu
A’o sē ‘e tausi ma fa’atino, ‘o sē lava ‘ua pei o le la’au ua toe tatupu.
O ‘upu a le aganu’u ‘ou te manatua
O le alofa o le ala o le pule o le tautua
E afua mai le alofa i le loto o le tagata
O lea fo’i tatou te iloa ai lē sa feagai ma fautua ‘e lē gata
O le alofa e lē sauā
Auā o le ola o le tagata e taugatā
Leitioa ‘ā fia gagana Faitolo
Ona o le loto ua tu’imomomo
E leai se faiva e ‘asa ma se ma’umau
I lau Susuga i le faiā’oga i le peni, a’o a’u i le fa’amalau
Ua e tu i lou tiute ona o lou alofa i fanau ā’oga
O le ‘ā ‘ou usita’i ma fa’alogo a’o ‘ē fogafoga
E pei o ao ma po e sau ma toe mou atu
Ae tumau pea le alofa i lo’u fatu
A liliu le la i lona tauafiafi
Ma goto atu i tafa’ilagi
O le tama poto e fiafia ai le tamā
A’o le tama valea e fa’anoanoa ai le tinā
Oi talofa i le fanoga ‘a sē ‘ua fai ma le lē alofa
O le a ia lē maua se sa’olotoga
O le a sola manatu ma ona lagona
Ona o le fiafia i le fa’apologa
Avea ma se a’oa’oga le taofia o le sauāina o le alofa
Ona e fa’ai’u lea i se taunu’uga fa’alēalofa
Ua fa’ai’uina la’u solo
Ou te mana’o e teu mau ‘upu nei i lou loto
Upu o le pese: “A iai i le ‘āiga le alofa”
“E matagofie mea uma, fiafia leo uma
Viiga lenā mai le ‘Au Pa’ia a Iesu Keriso o Aso e gata ai
Ina ‘ia fa’amāmā ai se avega i sē ‘ua fa’avaivai
Faafetai fa’afofoga, o le a ou fo’i i le itumālō o Alataua, e leai ai se alofa ‘e pologa
"USITA'I"
Tusia e:
Oscar Junior Harmon
Leone High School
June 06, 2023
Na faia e le Atua le lagi ma le lalolagi
Sa tu’u ‘i ai le ulua’i tagata ma le poloa’i
“Ia usita’i”
‘Ae peita’i ua la’ua fa’atuatuana’i
Ua fa’apea ona tusia
Tala ‘ese’ese o le Tusi Pa’ia
Tele o tagata sa lē talitonu ma lē usita’i
Sa fesiligia vavega ma le fa’amalologa o tagata mama’i
O le fa’atamala o le ulua’i tagata
O le lē usita’i ma lē fa’alogo
O le pogai lea o le mau fa’aosoosoga o le ti’āpolo
Le lalolagi faigatā, le tagata ua fia pule ma le fia poto
Ua o’o mai lava i lenei vaitau
Le vātau o mālō ma le tele o le mau
Ua lē usita’i i lana toe fetalaiga
Ia maua le fealofani o tagata ma ‘āiga
Ua lē na’o mālō ma ‘āiga
‘Ae fa’apea fo’i i le tele o tala’iga
Ua fa’avae i le ‘oa ma le tele o le tupe
‘Ae galo ai le fa’aaliga na molimoli mai ‘e le lupe
E faigofie lenei olaga
Ma e manuia fo’i le tatou faigāmalaga
Pe ‘āfai e usita’i
Ma tumau i le Atua e tapua’i
Ua tatou pologa
Ua lē mautonu fo’i lagona
Le tele o fa’aosoosoga
Ma le mau tofotofoga
‘Ae ‘ia tatou manatua
Fa’atuatua ma tumau i le Atua
Auā o ia na faia le lalolagi
O tagata uma i lalo nei ma le lagi
O le usita’i e sili i le ga’o o le mamoe po’a
O oe ma a’u o lo ‘o feagai ma a’oa’oga
O lo ‘o tapua’i mai o tatou mātua
Ia manuia faiva ma tiute o feagai ai ma le olaga
Usita’i i le Atua
O le ava fo’i lea i mātua
E manuia mea uma, auā o faiva e tapua’i
O le tali mana’o ma le fiafia, ‘e mafua nei mea uma i le usita’i.
