FA'ALUPEGA

Afio mai lau afioga a le aloalii (Muagututi’a)

Susū mai Tufugafale ma Seugaalii

Maliu mai le faletolu ma le lauti na laulelei

Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.

‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.

VI'IVI'IGA O LE ITŪMĀLŌ O FALEALILI

Falealili uma, i o ma o

Ta fia faalogologo i sou leo

Ua a’ave tala o le mālō

Ua leai se manu e toe olo

Falefitu e, Falealili ma Aleipata

Faapea ma le Atu Safata

‘A ‘e fia faatau moa lafo ane sau ‘afa

Ae soia lava le fetui ala

E aogā foi fa’aga tama

E masani i le tupulaga

{ TALI }

Fa’amāne’ene’e, ‘aua le minoi tele

Ae teu le ta’alo ma le loto maualalo

Olioli malie, ‘aua le pisa ō

Faato’ā vivini o le moa/toa ina ua mālō

Satalo e, o le uso na totō

Teuteu ia le itūmālō

Falealili e, ia maopo’opo

O le mea sili lea e malie ai lou loto

Lata penina o le auro lea

Oi lata pululipano e po’o fea

Oe la’u manamea e lē fa’agalo i aso fai pea

O lo’u fiafia e, ua le gata mai lea

Aloalo malie lau va’a Samoa i lou sami lanu moana

Ua e ofi atu i le ava ma e pesepese le taulaga

Ua tuanai o le atu vasa ua fetaiai i le ava fatafata

Samoa e, amuia oe, ua taunuu ma le manuia lau faamoemoe

VI'IVI'IGA O LE AFIO'AGA O UTULAELAE

O Utulaelae lo’u nu’u moni

Oute pese ai ma olioli

E to’afilēmū, o si o’u nu’u

E mamalu pulega a matai

Leai se tasi e fia ulavale ai

O le i’uga o oe, le auala lava e te savali ai

E o’o i le itūvai o tinā

E ese lona manaia

O le maopoopo, o le komiti tumamā

I le fa’amamaina o le ‘a’ai

Tafā ala ia manaia i le va’ai

Auā turisi, ma mālō fegasoloa’i mai

Afio mai lau afioga i le aloalii

Afio mai Tufugafale fa’apea fo’i Seugaalii

Le ‘āiga Sā Alaalatoa faapea alo o Samalā’ulu

Maliu mai le faleono

Le faletolu mau mai lau nofo

Ta te lē fa’agaloina

Le galuega a le ‘aumaga

Le fale o matai, fa’apea o tuāmaota

I le gagau ina o le vao ma le fa’aa’eina o le tai

Auā se manuia, o tupulaga o lo’ o aga’i mai

E lima ekalesia, o lo ‘o tapua’i ai i le Tamā

E lua o Metotisi, fa’apea le EFKS

Fa’apotopotoga a le Atua

E lē mamao tele i ga’uta

Ma le Light of Life, le malamalama o le ola

Pati la’ia ma po, mua ia mua ō

Utulaelae lo’u nu’u e pele i le loto

Sāga’i ane ‘ai o le tai

O le Atua e fa’amanuia mai

I si o’u nu’u, o oe fo’i e te ta’ita’i ai