FA'ALUPEGA

 

Afio mai le ‘āiga pa’ia o Sālevalasi ma le latou tama (Mata’afa)

Afio mai le sa’ofa’apito, o lau afioga Fiame, o le afioga tutasi, afio mai le sa’opāpā o lau afioga Fiame, a lafalafa tuna, o oe o le Tuiatua

Afio mai le faleagafulu a Fiame

Afio mai ē na ulua’i sa’o (Tupuola ma Seigafolava)

Afio mai Samatauā, o le na ulumatua i tofiga

Afio mai le falevalu a Seigafolava

Susū mai Amituana’i, o oe o le ali’i o le ao, o le tupu tānoa ‘ese, o oe fo’i o le tama a aitu ma tagata.

Afifio mai oulua o fa’auluuluga o le ‘āiga Sālevalasi (Teoteo ma Tumanuvao)

Maliu mai ali’imau o faleupolu (Lemauga ma Fotua’aututusa)

Mamalu maia oe le Faleatua

Susū mai le va’a taumualasi i faigamālō, o oe o le tamasā a Ituau ma Alataua, o lau susuga Sitagata ma lau fa’alauateaga, ma le ‘āiga Sā Sitagata

 

Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.

 

‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.

VI'IVI'IGA O LE AFIO'AGA O LOTOFAGA

 

Tapenapena mea uma i le va’a

Oute nofo i tuā i Lotofaga

Ae alu pea oe, o le Matā’afa i le Anapapa

Tago ane i le foeuli, o le matagi o lo ‘o ua tu’umuli

Tatou ō ia, i le tupu e o i Mulifusi

 

Na tafa’ifā, o Salamasina

Sa ‘ātoatoa iai pāpā

O le Tuiatua, ma le Tuiaana, ma le Nato’aitele, Vaetamasoāli’i mai Safata

 

Sālevalasi, o le ‘āiga lea

Tulaga mua i le faigāmea

Āiga o tupu, i nu’u uma o Samoa

Sālevalasi, na muamua i pa’ia

 

Le Tō Sua ma le Pisaga

Vaiuli mai Vaigafa

O laufanua nā o le ‘oli ‘ula pala

Le nu’u e, o le tausala

O lo ‘o teu i le valusaga

Oi Mulifusi e, Tanumāleu ma Lotofaga

 

Sa tatago le taua e Sale’aaumua

Na fa'asopo'ia i nu’u  Ātua

Fa’ato’ā laveia e le fili iā Falemua

Si’i loa le taua, toe maua o le Tuiatua

 

Ua uma ona tofi, o ‘upu o Samoa

O le atu ua vela, ua fa’asoasoa

Ua lele o le lupe, ma le mea ‘ātoa

Ma le lau olive, nai le va’a o Noa

A’o a’u nei lava, o le la’au o le toafa

E tuputupu mālie, fa’alau sasala

O nai fua o le ‘oli, ‘oli o le foaga

Lo’u ofisa sili, le nu’u o Lotofaga

 

Tatou mua ia, mua ma le fiafia

Fa’apei o le matai, āiga nai Tapuamia

Sālevalasi e, o le puao matagi e

O upu ua tusia, i le talitali e