LE AFIOGA AUMOEUALOGO FAOATOA NU'UAUSALA

FA'ALUPEGA

 

Afio mai Aumoeualogo o le tama a le mālō

Susū Te’o o le anavaotaua

Susū le matua iā Mamea

Susū le aloalii iā Luafalemana

Susū mai Afusia ma Samoa

Mamalu mai le to’afa

(Lavea, Olomua, Mapuolesega ma Aioletuna) ma le Fofoga o Maui’a

Alaalata’i le atimanutui e fa

 

 

Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.

‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.

EKALESIA FA'APOTOPOTOGA KERISIANO AMERIKA SAMOA (EFKAS) I AOA

SATAURO O LE ALOFA

AUMOEGAUATELE

Sa ‘aumoe Te’o i Falealili i le afafine o Leilua i Savaii. Talu ai ona o le tele o mea o lea ‘aumoega na mafua ai ona lauiloa ma sa fe’avea’i ai tala i lea ‘aumoega i le tele o mea taumafa ma isi lava ‘oloa na ‘ave mo le ‘aiga a le teine. Le teine la lea na nofo ai Te’o fanau ai le la tama, ona fa’aigoa loa lea iā Aumoegauatele, a ‘ua fa’apu’upu’u o “Tele”

Ina ua faia’ina ‘au o Malietoa iā Ātua, ona fai atu lea o Malietoa iā Ātua uma, e fai mo latou le motu lea o “Salaia” o le igoa muamua lea o le motu o Tutuila. Ona fai atu lea o le tama o Aumoegaualogotele i lona tamā, o le ‘a sau e su’e so na nu’u i le motu lea.

 

  • O le taua lea a Ātua ma Malietoa, na sola ai Malietoa ma ana ‘au ua lafi i totonu o le ana. Ua o atu loa Ātua, ua la’u ane fafie ua fau i le gutu o le ana o le ‘a susunu, ae tu ai loa Iuli, ua lauga ona o le alofa i lona afafine o lo ‘o i totonu ma Malietoa. O le lauga lea e lua po lua ao ma o le mea lea na maua ai le igoa matai ia “Luapo” ma “Luaao”. O lo ‘o fa’aaoga pea e o’o mai i ona po nei i le alaalafaga o Salanoa ma Iuli i le afio’aga o Tula i Tutuila.

 

Ona omai lea o le tama ma “Lavea” ma le isi tama e leai so na igoa. Taunu’u i Faga i Aoa, o le mea muamua na fa’alogo iai, o le olo a le manu, ona fa’apea lea o Aumoegalogotele i le tama, “ua maua lou igoa “Olomua” auā o le mea muamua lava lea na tatou fa’alogoina iai i le faga lenei.

O Lavea o le tagata pito matua o le malaga lenei ma ‘o ia lava sa fa’alagolago iai Aumoegaualogotele i mea uma. O le mea lea, ua ‘avea ai Lavea ma fofoga o Aumoegaualogotele, ma toe ta’ua ai o le “matua a Aumoegaualogotele”

 

I le taimi na tu’ua ai e Aumoegaualogotele lona ‘āiga i Falealili, sa fa’apea atu ai Te’o lona tamā, “Sau inā alu, ‘ā maua sau nu’u e te ali’ita’i ai, ona fa’aigoa lea o se isi ‘o ‘ou matai i le Te’o, na’o le igoa, ae lē ave iai mamalu ona e faigatā mamalu o Falealili.

Faaigoa lau tulaga maota o “Ana o le i’a”. O lau taupou o “Fa’asilitama’ita’i” ma fa’aaogā e oe la’u igoaipu o le “Fasialipia”. O mea na, e na’o igoa, ae le ave atu pa’ia ma mamalu o Falealili. Ae tau ina ia matou iloa ai pe ‘a matou o atu i Tutuila, o le nu’u lena a oe, lo’u atali’i. 

O le suafa lenei o Aumoegaualogotele ua masani ona tau vala’au o Aumoeualogo o lo ‘o sau ai nei lava i le afio’aga o Aoa.