FA'ALUPEGA

 

Afio mai le pa’ia o alaalamalae

Afio mai Laupola o le sa’ofetalai ma le to’alima o le ‘āiga o Sā Laupola (Mase, Toa, Ena, Anae ma Saomai)

Afio mai la outou tama o lou sa’otā, o le Valasi o le afioga a Tuisila

Afio mai oe Tuisila o le vaa fauese, o le tama o le faasuaga a i la’ua matua o le solosolo i savili

Afio mai Tuitogamaatoe, o le fa’auluuluga o le ‘āiga Sālevalasi

Afio mai Fagasoaia o le alo o le Tuiatua

Afio mai Lesāmatauanuu ma Luamanuvae

Afio mai oulua alii o le fono (Mainuuoti ma Sitamafuata)

Maliu mai Siu ma le Afolau ma le mamalu iā te oe Saleaaumua

Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.

 

‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.

VI'IVI'IGA O LE ITŪMĀLŌ O ALEIPATA

 

Afio maia, afio mai Fagasoaia

O le sa’oaualuma

O ia lava ua tofia, i le faiva o mānaia

Lafo i Aleipata, o le nu’u matagofie

 

O le suli o le tupu lenā ua filifilia

Malelega o le Tuiatua iā Fagasoaia

O ia lava ua tofia,tofia e le Tuiatua

E su’ea se siapo, mo Fuataga ma Tafua

 

Ua ou sau nei, se’i ta tou aleaga

I si o’u nu’u moni o Aleipata

I le ta’aloga, o le fa’aagatama

 Ma le talutalu fou, o aso ia o le malamalama

 

O Fepulea’i, ua e’e ai pāpā

O le ‘a feagai ma Tumua

A’o Fagasoaia, o le sa’oaualuma

O ia lenā, o le ‘a maua ai mea uma

VI'IVI'IGA O LE AFIO'AGA O MUTIATELE

 

E muamua ona ‘ou fa’atulou, tulouna ia le pa’ia

Ae se’i o’u pese ‘e fa’amatalaina

Lo’u mitamitaga oute tiu ai

Lo’u alaalafaga oute mimita ai

Pe oute malaga i ‘o ma ‘o

E lē mafai na galo mai

 

O ou pa’ia uma na ma ou sā

Oute nu’unu’u ia iinā

E faigatā, i ne’i sasi atu se gagana

Afio lau afioga i le sa’o, lau afioga Laupola

Alaalata’i ai ou alo e to’alima

Afifio tama Tuisila

O tama a Levalasi lea

Ae polapuipui e Siu ma Afolau lea

 

Se’i omai ia tatou o

Ta evaeva atu ‘i ‘o

O ou atufālega ua ‘ē sapi ai

O au turisi tafafao mai

E lasi mea uma i la’u va’ai

O lou matāfaga, Namu’a Island ua e lauiloa ai

 

Afio mai loa i si o’u nu’u

Oute lē faia o se tala fa’atupu

E malu puipuia lava oe i pulega a nu’u

O lo’u vai e te ta’ele ai

E uiga ‘ese lona mālū mai

Le vai o vasivasi, e tele ma’i ua manuia ai

 

O le fa’afetai  i si o’u nu’u

E lagolagosua mai iā a’u

I se taumafaiga, taumafaiga ua lē a’ua’u

So ‘o se mea lava oute alu ai

E sisi le fa’amalama ma va’ai

Lo’u fa’asinomaga, o iinei lava na fofoa ai

 

Se ‘ua fa’ai’u o si a’u pese

Mutiatele oe lava ‘ua pele

Fa’amanuiaga, oute tiu ai le taleni pese