LE AFIOGA I LE MA'UPU IA FANO SOLINU'U SHIMASAKI
FA'ALUPEGA
Afio mai afioga i Ma'opu (Fano ma Amituana'i)
Susū mai le Nofo Fanau (Gaisoa)
Maliu mai le Launiusaelua ( Uso ma Fa'atiliga) ma le Lauti na laulelei.
Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.
‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.
EKALESIA FA'APOTOPOTOGA KERISIANO AMERIKA SAMOA (EFKAS) I FAGA'ALU
LAAU O LE OLA
PULEAGA KATOLIKO SAMOA PAGO PAGO I FAGA'ALU
ST. THERESA
VI'I O LE AFIO'AGA O FAGA'ALU
Nofo isi o'u nu'u, Faga'alu le igoa pu'upu'u, le fetu lenei ua susulu ua susulu atu i le atunu'u.
Lenei suga e lau upu tautala ai so'o lou gutu, ‘ā ‘e nofo ai i se masina e te lē toe musu.
Le lalolagi finagalo ‘ese’ese, mau le poto mau le save i le taufa'ase'e,
fai atu la'u upu ‘ā ‘e tū ma ‘e tenetene, fa'aagasala loto i alofa’aga mo oe la'u pele.
Afai e te fia talitonu, pe e te fia tofoina mai a'u sau loa ta savalivali ane i Faga'alu.
E iai le faitoto'a o le ava ma le sulufaiga o tagata, tili mai oe i le falema'i pe a tau punitia lau manava.
Le lalolagi finagalo ‘ese’ese, mau le poto mau le save i le taufa'ase'e,
fai atu la'u upu ‘ā ‘e tū ma e tenetene, fa'aagasala loto i alofa’aga mo oe la'u pele.
Ta la la ta ta la la la (x2) ta la la la, ta la la la, ta la la la la la
Ta la la ta ta la la la (x2) ta la la la, ta la la la, ta la la la la la
Le aofia e tōfā, ‘e lē fa'agaloina, e teu oe isi o'u fatu, i lo'u olaga atoa,
O le a fo'i o Faga'alu ma le susuga i le feagaiga.
I le afioaga o ma'upu, susū ai o le nofo fanau, e puipui e le la fetalaiga o Usoagalelei ma Fa'atiliga
O pa’ia na o si o'u nu'u le mamalu i le launiu saelua.
Ta la la ta ta la la la (x2) ta la la la, ta la la la, ta la la la la la
Ta la la ta ta la la la (x2) ta la la la, ta la la la, ta la la la la la
1ST GENERATION OF THE SHIMASAKI FAMILY IN FAGA'ALU
Masaichi Frank Shimasaki na usu i le tama'ita'i o Fano Solinu'u fa'ae'e le gafa o:
1. Fiapa'ipa'i(f)
2. Filimaua(m)
3. Fano Frank(m)
4. Si'uila(f)
5. Rose(Fa'aeteete)(f)
6. Virginia(Fa'aitiiti)(f)
7. Amy Fiaapia(f)