FA'ALUPEGA

Afifio mai oulua fofoga o Alataua

(Tuliaupupu ma Tuliaupupu)

Susū mai oulua le usoali’i

(Filimai ma Faletagoa’i)

Susū mai le matua o Tuliaupupu

(Atuaia)

Susū mai le teiali’i ma le alo o Malietoa

(teiali’i-Fina’i) (alo o Malietoa – Sagagaimuli)

Afio mai alo o Tuliaupupu

(Muliagatele ma Tauiliili)

Susū mai Tuisamau, i lau fetalaiga Mauletauā ma le nofo a ituāiga iā te oe Tuisamau.

Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo.

E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.

‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.

VI'IVI'IGA O LE AFIO'AGA O LETOGO

 

Tau la’ia sou sei

I tama Fau’ula e lelei

E lē fia misa pē tomumu, ae fautua lelei

Lelei ai lou ‘āiga, lelei ai lou vā ma tagata

Auā o tama ‘e ‘ese le mata ‘ata’ata

 

Aua ne’i e siligia pe sau mai fea

O a’u o le Fau’ula, oute nofo tonu i Lalotea

Ua lauiloa i Samoa uma, auā o le malae tāua

O le fa’autugatagi ‘a Tumua

 

A e ulu i totonu o le ‘a’ai

E suia vave o la’u va’ai

I le maota o le faife’au ma le falesāmoa fa’asaga mai i tai

Ona e toe tepa lea i uta, le faleā’oga oka ua ‘uma

Ae lumāfale le malaeta’alo tama Fau’ula

 

O Lalotea tonu lenei

E afio ai Tuli’aupupu

Le usoali’i, teiali’i, alo o Malietoa faapea le matua

Susū ai Mauletauā, le lagi malu ma le nofo a asu

Le atulau ma le fetalaiga iā Tuisamau

 

Sau la’ia inā sau

E talitonu lo’u mafaufau

Fetalai le Ali’i amuia e talitonu mai ae le ‘i va’ai

E ui ina tu i le toafa, o si ona ‘ea mafanafana

E te lē toe musu ai lava pe ‘ai a saili i le ta’aga