FA'ALUPEGA
Afio mai le Tuiatua fa’anofonofo (Fuataga) o oe o le matua
Afio mai le falefia o ali’i ma o outou ma’upū
Falefia (Aulaumea, Lutau ma Lefale)
Ma’upū (Poloaali’i, Alailesulu ma Maeataanoa)
Afio mai Amituana’i o le ma’upū o le Tuiaana
Susū mai suafa o Letalu ma Le’ula
Maliu mai outou to’oto’o, o fofoga o le Fuataga
(Satama, Tiatia, Seuala, Mauu)
Maliu mai le igoamatua o lau tōfā Leifi
Maliu mai le mamalu iā te oe Sale’a’aumua
Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.
‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.
VI'IVI'IGA O LE ITŪMĀLŌ O ALEIPATA
Afio maia, afio mai Fagasoaia
O le sa’oaualuma
O ia lava ua tofia, i le faiva o mānaia
Lafo i Aleipata, o le nu’u matagofie
O le suli o le tupu lenā ua filifilia
Malelega o le Tuiatua iā Fagasoaia
O ia lava ua tofia,tofia e le Tuiatua
E su’ea se siapo, mo Fuataga ma Tafua
Ua ou sau nei, se’i ta tou aleaga
I si o’u nu’u moni o Aleipata
I le ta’aloga, o le fa’aagatama
Ma le talutalu fou, o aso ia o le malamalama
O Fepulea’i, ua e’e ai pāpā
O le ‘a feagai ma Tumua
A’o Fagasoaia, o le sa’oaualuma
O ia lenā, o le ‘a maua ai mea uma
VI'IVI'IGA O LE AFIO'AGA O LALOMANU
Le Tuiatua, le falefia, Amituana’i ma suafa
To’oto’o e fā ma le mamalu iā Sale’a’aumua
Oi Lalomanu e, o ou gafa e maualuga
E so’o ai Sāmoa, so ‘o ai ma lenei vasa
O ou laufanua lanulauava ua manaia
Malaē ma Lata fa’apea fo’i Lefaga
Matāutuna’a’ai e afio ai le Tuiatua
Tasi mai Saua lua, loa iā ita
Tama Lalomanu e, alo ane ia i ou faiva
Ta’alo fa’atausala, ua tetele faigāmea
E pei oe o le lupe, ae atamai pei o le gata
O ou faiva masani, e masani e fa’afiafia
Le ‘upu fa’asāmoa, e feagai Vini ma Tapaga
O le tolotolo lauiloa iā Samoa
Le mauga o le Atua, ua maoa’e lona manaia
Ua fa’atauata ai nei o le la ma le masina
Fa’alogo i le leo o le pu, savali loa ma le filemū
Tu loa le komiti ma le pepa ua laulau o matā’upu
E muamua fai le taupulega, po ‘o fea a alu ai le aumoega
Le ‘ula teuila, sulu loa ma si au toniga
O Fagasoaia o si o’u sei lea
Oute tiu ai i le vāteatea
Oute lē vi’i vale pe fai upu lasi auā ua tasi
Ua salalau solo au tala i lenei lalolagi
Si la’au manaia sa i totonu o le fa’ato’aga
Tui Aleipata, o Fagasoaia lona suafa
O le la’au e mafalā, e paolo ai Samoa
O lau teuteu fa’aaloalo
Ua malie pule, ua malie mālō
Na ‘ona ‘ou tali ta’oto le gase o malōlō
E o a’u e agatonu ai
Na ona ou tali ma sapasapai
O nā mea uma i le suafa o lo ta Matai