FA'ALUPEGA

Susū mai lau susuga Asomua

Susū mai le fanaualii a Asomua

Afifio maia ‘āiga e lua (Tapusalaia ma Talaepā o fa’auluuluga o le fanauga a Asomua)

Afio mai Tofaeono ma lau falefā

(Misatauveve, Taneala’epa, Atuaia ma Taufaga’afa)

Afio mai Atanoa ma lau falefā

(Su’a, Leatigaga, Tevaseu ma Luatoloa)

Susū mai Nonu, o le ulumatua a Asomua ma le ‘āiga Sāmatua

Afifio mai le faletolu (Masi, Tonumailau ma Asuao)

Susū mai lau susuga Fa’alogo o le ma’upū o Tevaseu

Susū mai lau susuga i le sa’o Lutuiloa ma ou alo tutusa (Po’e, Tiumalu ma Afoa)

Susū mai oe le sa’olua ia Tutagailevao ma le matua o Taliaivao

Susū mai alo o Taleta (Suifa’atau, Toloāfā ma Liulevaega)

Susū mai oulua o matua o Tapusalaia (Fitiao ma Fatani)

Susū mai lau susuga Tafilipepe, o le ma’upū

Maliu mai Tu’u’u ma le ‘āiga Sā Tu’u’u, o le na itūfā i ai Atua, na tu’u i ai le fanauga a Asomua

Maliu mai Li’o, o le limamatua o Alataua, o ia fo’i o le fofoga o Alataua

Maliu mai le falelua o tulafale (Manō ma Faoagali)

Maliu mai Uta’ileuo ma le faletolu

(Le’au, Talalegogo ma Fusia)

Ma le mamalu iā te oe le Alataua

 

 

 

 

Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou.

 

O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.

 

‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.