EKALESIA FA’APOTOPOTOGA KERISIANO AMERIKA SAMOA (EFKAS) I ONENOA

MALAMALAMA O LE SATAURO

ONENOA

O LE TOUFI A TUISAMATATELE

O le ali’i lea o Tuisamata o lona nu’u o Onenoa. Na usu Tuisamata i le tama’ita’i o Maofa, fa’ae’e lea o le gafa o le teine o Logoialisi. Usu mai Togiola mai Sailele i le teine o Logoialisi, fa’ae’e le gafa e lua teine ae tasi le tama. O igoa o teine o Manalita ma Fitilagipupula ma le tama o Lele’asapai i le alo o Tofaeono i Siumu. Ua o’o i le tasi aso ua gaoia o le toufi o Tuisamata e le nu’u o Alele. Nofo loa lea o le ali’i o Tuisamata ma mafaufau i le mea o le ‘a maua ai le toufi, po ‘o ai ua gaoia. Ona manatua loa lea o Tuisamata ua tatau ona ta’u lona tigaina i le tama o Lele’a-sapai o lo’o fai avā i Siumu, auā o le tama a lona tuafafine. Ona fa’aali loa lea iai. Tali mai lea o Lele’asapai, “Fai ia Tuisamata e fa’atali mai; o le a ‘ou alu atu i lona fa’alavelave, ae se’i muamua ona ou fa’aali i le aiga o lo’u tamā.”

Ona fa’aali loa lea e Lele’asapai i lona tamā, ona fa’asaga lea o lona tamā e sauni ni la o lona va’a e folau ai ma sa’ili ai le toufi o le tamā o lona tinā ua gaoia. Ona nofo loa lea o le tama o Lele’asapai, ma sauni la e lua. Su’i le la fala ma se’i le la ‘afa. Ona sau lea o Lele’asapai, fesili atu i lona tamā po ‘ua i ai ni la o lona va’a. Tali loa mai le ali’i, “o la nei e lua, o le ‘a e folau a’i, o le la fala ma le la ‘afa. ‘Ā ‘e folau o fisaga le matagi , fa’aaoga le la fala. Afai e  lutaluta le matagi, ona sisi lea o le la ‘afa.”

Ona fa’asaga atu lea o le va’a o Lele’asapai ma lana folauga i le itu i Luluga, ua taunu’u atu i lea nu’u, e tasi le fale o lo’o i ai i le nu’u. A o le nu’u lea o le nu’u o aitu. Ona afe loa lea i ai o Lele’asapai i le fale. E ulufale atu Lele’asapai i le fale, e leai se tagata, na’o le tino o le fale. Ona nofo ai lea o Lele’asapai i totonu o le fale. Si na itula pu’upu’u ae va’aia lea e Lele’asapai se va’aiga ‘ese. Ua pa’u’ū ifo vaega ‘ese’ese o tino o tagata mai le fale. O ni isi ua pa’u’ū mai o latou ulu, fa’asosolo mai o latou vae ma o latou lima, ae mulimuli mai o latou tino. Ona so’o faatasi mai ai lea o latou tino, ‘ae saofafa’i mai. A o se isi vaega sa muamua ona pa’u’ū mai o latou tino ma saofafa’i mai; ona pa’u’ū mai ai lea o latou vae ma latou lima, ae mulimuli mai o latou ulu. Ua latou saofafa’i uma mai ona latou fa’atalofa mai ai lea iā Lele’asapai. Ua latou fesili mai i ai, “Po ‘ua maliu mai le malaga?” Ona tali atu ai lea o Lele’asapai, “Ua ‘ou sau lava.” Fai mai lea o le nu’u, “O le a taumafai se ‘ava, ‘ae pagā ‘e leai o se aumaga e ‘amia le ‘ava.” Ona faapea atu lea o Lele’asapai, “A ua leai aumaga, o le a ou alu atu ou te ‘amia le ‘ava.” Ona fiafia loa lea o le nu’u, auā ua latou iloa o le ‘ā oti ai Lele’asapai. Auā o le ‘ava lea o le ‘ava e fe’ai; e fe’ai ona lau, e fe’ai ona ‘ata. Fesili atu lea o Lele’asapai i le nu’u, “Po o fea e tu ai le ‘ava?” Tali mai le nu’u, “O le auala lena e te alu ai, e te tau ai i le ‘ava.”Ona alu lea o Lele’asapai. Ua alu, alu Lele’asapai, e le tau i se ‘ava. Fa’alogo loa Lele’asapai ua vala’au le tagata ia te ia, “Sole Lele’asapai, po o fea a alu i ai lenā malaga?” Fāliu lea o Lele’asapai, na te le iloa se isi. Ona toe savali loa lea o Lele’asapai. Ona toe vala’au mai fo’i lea o le tagata, “Sole, Lele’asapai, po ‘o fea ‘a ‘e alu i ai?” Ona faliu loa lea o Lele’asapai, tali atu lea i ai, “Ou te alu e a’ami le ‘ava.” Tali loa mai le tagata, “Talofa, Lele’asapai, o le ‘ā ‘e oti. O le ‘ava lenā na ‘e sau i ai, o le ‘ava ‘e fe’ai. 

Ua fa’ato mai oe e le nu’u ina ia e oti ai. ‘A e sau, ‘aua ‘e te fefe. O a’u o Salevao, o le a ‘ou fesoasoani atu ia te oe. Inā ‘ave ia mea nei e lua e te alu ma oe, o le to’oto’o e igoa ia “matagisilifa’i” ma le “fusi”. ‘A ‘e alu atu ‘e te tau atu i se puloulou o tu mai i le auala, ona sasa loa lea i le fusi, ‘ona o le ‘a ‘ava’e oe i luga i le lagi tuafa o i ai le ‘ava i Siva. A e tu vae atu loa i luga, ona e va’ai loa lea i le ‘ava, o le a va’ai, mai fo’i le ‘ava ia te oe. O le a amata loa ona fe’eli mai lau ‘ava ia te oe. A uma lau o le ‘ava, o le a sau ona ‘ata. Ae tago loa i le to’oto’o, tu’u i ou luma e tali ai lau o le ‘ava ma ona ‘ata. A uma loa mai lau o le ‘ava ma ona ‘ata, ona e oso atu lea, tutu’i le tino o le ‘ava i le to’oto’o. A fai mai le ‘ava, ‘Lele’asapai, fia ola ‘, aua lava ne’i e fa’aolaina , ae tutu’i pea lava i le to’oto’o. Sua loa , sau loa ma le ‘ava.

O le ‘ava lena o le a e alu atu, ona fai ai lea o lo outou ‘ava ma le nu’u. O le ‘ava e ‘o’ona. A fa’apea e fai mai le nuu e tanoa selau le ‘ava, ona e fai atu lea i ai ‘e le mamalu le tanoa selau a e mamalu le tanoa tasi. A tufa la le ‘ava, a e muamua lau ‘ava, ona e fai atu lea i ai e sui le taulagi. A tali mai le nu’u ona pau lava lea o le ipu e tasi, ae o le a si’i mai le tanoa, tau ina fa’apoi le ‘ava i lou gutu, ae sasa’a i tua. Faitalia a’u ona inu le ‘ava.” Ona alu loa lea o Lele’asapai. Tau atu loa i le puloulou, ua sasa loa le fusi ia mau. Tatā loa Lele’asapai i luga o le fusi. Tu atu loa Lele’asapai, va’ai loa i le ‘ava. Ia, ‘ua amata loa ona sau lau fe’ai o le ‘ava. Fa’aaogā loa le to’oto’o e tusa ma le poloa’iga. Ua uma mai lau fe’ai o le ‘ava, ‘ae amata ona sau ‘ata fe’ai o le ‘ava. Ua fa’aumatia ona fasi e Lele’asapai i le matagisilifa’i, ona oso atu lea i le tino o le ‘ava. A e fai loa mai le ‘ava, “Lele’asapai e, fia ola.” Tu’i loa e Lele’asapai le ‘ava i le to’oto’o, ma ‘ua mate ai loa ma le ‘ava. 

Ona tago atu loa lea o Lele’asapai ua ati le ‘ava, ae alu atu ma ia i tai i le nu’u. Va’ai atu loa le nu’u ua sau Lele’asapai ma le ‘ava, ua ofo le nu’u. Fai loa le ‘ava. Fai atu loa le nu’u, “Tanoa selau le ‘ava.” Ae fai atu Lele’asapai, “E le mamalu le tanoa selau, a e mamalu le tanoa tasi; ia fai loa le ‘ava e tanoa tasi.” Tufa le ‘ava, fai atu loa Lele’asapai e sui le taulagi , e laitiiti. Fai mai lea le nu’u, e tasi le ipu o le nu’u , ae si’i le tanoa. Si’i loa le tanoa, fa’apoi le gutu o Lele’asapai, ae sasa’a i tua. Ae o lo’o fafa mai tua le ali’i o Salevao, ‘ua na inu ‘uma le ‘ava. Ona faia lea ni talatalanoaga a le nu’u ma Lele’asapai. Fesili ai loa le nu’u, “Po o le a le tulaga o le masina i le aso a taeao?” Tali atu Lele’asapai e matofitofi le masina. Fiafia le nu’u, o le ‘ā ‘ai Lele’asapai auā ua sesē lana mate. Ona fa’apea lea o le nu’u, “Ia tatou malōlō ia, tatou tālia le masina taeao.” 

Fai atu Lele’asapai, Ua lava lea.” Toe fesili mai le nu’u po o fea e tōfā ai. Tali atu Lele’asapai “O a’u, ou te moe i lalo o le lapaga.” Tu’ua loa , ta’itasi le nu’u ma alu. Toe alu ane loa Salevao iā Lele’asapai, Fai atu lea o Salevao, “Ua ‘e oti auā ua sesē lau taumasina. Sau, aua ne’i ‘e moe i lenei po ‘atoa. A lata i le itūlā e tafa ai ata, ‘e alu uma lava le nu’u i tai e su’e oe i lalo o lapaga e ‘aia oe. Ae a o’o i le itūlā e tafa mai ata, o le a ou alu ou te tu fa’amasina mai i le itulagi lea. Ona e sau loa lea, pāui mai le nu’u, “ala mai e va’ai i le masina.” O le a manatu lava le nu’u i se togafiti, ae latou te toe sa’ili i se ala e te oti ai . Auā ua latou mautinoa o Salevao lea e fa’atasi i la’ua ma Lele’asapai.” (O le mea lea ua maua ai lenei upu fa’asamoa: E le taumasina se tagata ma le aitu.)

Toe fai atu Salevao iā Lele’asapai, “O le a ta ō ta te to’alua i lau fa’alavelave na e sau ai. O le toufi o le tamā o lo’u tinā ua gaoia e le nu’u o Alele.” Ona ō loa lea, ua taunu’u i Alele Lele’asapai ma Salevao. Tau, tau, ua tigaina tele le nu’u o Alele i le taua. Faapea loa lea o le nu’u o Alele, “Sē, Lele’asapai, sau ia, ua ‘e mālō. O ona tau o le a toe fa’afo’i atu le toufi o le tamā o lou tinā na ‘e sau ai.” Fai atu lea o Lele’asapai, “Iā, o le a ‘ou muamua, ae o ane outou ma le toufi, o le a ‘ou alu ‘ou te fa’atali mai.” Ona sau loa lea o Lele’asapai, ae sau fo’i Alele e momoli mai le toufi.

Ona liu i’a manu ai lea o tagata Alele. Ona fai lea e Lele’asapai le poloa’iga, e fa’apea, “A outou tata’a, tata’a fa’atasi , po o lea le itulagi po o lea itulagi.” E i ai ona tata’a fa’atasi pea o i’a manu. O tausaga uma lava ua taunu’u mai i latou i Onenoa, e peiseai ua toe fa’afo’i mai le toufi a Tuisamata. A o Tuisamata fo’i ua maua lona igoa ipu e fa’apea, “O ta’a itulagi le nu’u o Alele. ‘Aumaia le ipu a Tuisamata tele.”

TO'OMALATAI LEATUVAI 

To'omalatai Leatuvai o Onenoa na usu i le tama'ita'i o Taeauga Leota mai Pago Pago fa'ae'e le gafa:

1. Tumatalili To'omalatai(f)

2. Ameteolepala To'omalatai(f)

3. Patu To'omalatai(f)

4. To'omalatai Faitasi So'i'aimoa(m)

5. Pulenu'u To'omalatai(f)

"A iai ni ou alofa fo'i i Futu"

O Tuisamatatele sa fai lona nu’u anamua i luga a’e o le afio’aga o Onenoa o lo ‘o iai i le taimi nei. Na igoa lea nu’u o Futu, ona o le tele o futu sa ola ai. O le matāfaga i lalo ifo o le nu’u tuai sa fai ma lo’ilo’i, lea ua iai nei le nu’u fou. O le masani a le toeā’ina o Tuisamatatele o le to’aga lea i lana fa’ato’aga e fai ana toufi. O ufi sa fai ma to’omaga e tuli ai vaitau o le oge, pe a o’o ina mūgāla ma tuiefu le tau. E tele ‘upu e fai i ufi, e pei o le manunu le to’au o ufi pe a afu lelea; tulimatāgau le ufi a Sina; naunau i le ufi ae fefe i le papa; ‘ai ulu tuana’i ta’isi ufivao ma le tele o isi ‘upu e fa’atatau i ufi. O lona uiga, o se matai’ai le ufi i aso anamua.

O se tasi aso a’o asiasi atu le toeā’ina i lana fa’ato’aga, ae fa’ate’ia ina ua ia iloa ua leai uma ni toufi. E foliga ua satia ‘atoa le fa’ato’aga ma ua segia toufi uma sa iai. Sa iai le atali’i o le toeā’ina e igoa ia Lele’asapai, sa masani ona fesoasoani i lona tamā i le fa’ato’aga. Sa iai fo’i se tasi o toea’ina e igoa iā Lolo, e fa’apea le tala ua iloga lana tautua iā Tuisamatatele. Na tau ‘i’ite Lolo i le mea ua tupu ona ia fai lea ia Lele’asapai la te o i le aitu vavalo o Salevao, atonu e ono maua ai se tali o le fa’afitauli. Ua tali mai Salevao, o aitu mai le nu’u o Alele ua latou segia toufi. Ae fa’apenei, a o’o i le po, ona alu lea o oe Lele’asapai e lafi i le ‘auala o le vai e masani ona ta’e’ele ai aitu. O ai lava le aitu e alu atu e ta’ele, ia e matua ta le fuataua i se ‘aupega.

Ua o’o i le tuneva o le po, ona lafi ai lea o le tama i le ‘auala o aitu aga’i le vaita’ele. Ua toa lona loto. Ua ia fia tagolima i aitu nei. Ua tiotio solo ma le mata’alia, ina ia aua ne’i iai se aitu e sao i lea po. O se mea mata’utia, o aitu uma na o atu e ta’e’ele i le vai, na matua fasi mate uma e Lele’asapai. O nei uma āitu sa tautua i le tupu o Alele. Ai ua fiu le tupu e fa’atali mai aitu, ona ia tula’i lea ma sa’ili. Na fa’ate’ia le tupu i lona va’aia o le fola o aitu i le vai ae ona iloa ai le tama o Lele’asapai o lo ‘o nofonofo ai. Ua fai atu le tupu iā Lele’asapai, ua e manumalo. A iai ni ou alofa, sau ina toe fo’i i Futu. O taeao a’ena, o le a momoli atu le tau o toufi a lou tama. Ua toe fo’i mai le tama i lona aiga ma ia fa’asoa le tala fiafia i lona tama.

O le afio’aga o Alele, o se nu’u sa iai se i’a a’e. E fa’apea le tala ‘ai o le matai’ai lea a le nu’u i latou fo’i tala o le vavau. Na tonu i le manatu o le tupu, o le a ‘aumai le i’a lea e fai ma totogi o le toufi a Tuisamatatele. Ua malaga mai le tupu ma le i’a i le afio’aga o Futu, e tusa o la tu’ugatala ma Lele’asapai. Peita’i, ua le ‘aumaia e le tupu le i’a i uta i le matafaga, ae ua ia tia’i i tai i le moana sausau. E iai le talitonuga, o gatai atu o papa o Onegase, Onenoa ma Onefao, lea e matauina sa tia’i ai e le tupu o Alele le i’a a’e na malaga mamao mai ma ia, e aunoa ma le momoli aloa’ia i uta ia Tuisamatatele. ‘A ‘o gauta teisi atu o le afio’aga o Onenoa o lo ‘o iai nei, e iai se laufanua sa ola ai se afi ua ta’ua o le “Afimuao”. O le pine o lea mea, o lo ‘o va’aia pea e le afio’aga o Onenoa i le asō se i’a manu tele lava iā Oketopa o tausaga ta’itasi. E sau le i’a ma tātā mai lona si’usi’u i le gataifale o le afio’aga, ona toe mou ‘ese lea. E foliga mai, e le’i lelei ona osi le feagaiga a le tupu o Alele ma le ali’i o Lele’asapai. Pe atonu ua fuā le loto o le tupu i le mamate ai o ana aitu tautua, ona tala’ole ma talapelo i le feagaiga na osia. Atonu fo’i na toe sui le manatu o le tupu ina ia tauimasui le mea a Lele’asapai ua fai.

Ua Tālā le Ta’ui

Lomiga Tolu

Tuufaatasia ma Lomia

Ofisa o A’oa’oga ma Su’esu’ega Samoa

Kolisi Tu’ufa’atasi o Amerika Samoa

Mapusaga Fou, Tutuila

Amerika Samoa

2018