FA'ALUPEGA

Susū mai lau susuga Satele ma ou alo (Ala’ifea ma Faleāfaga)

Afio mai alo o Leilua (Fonoti ma Sialegā)

Afio mai lau afioga a le aloalii (Paitomaleifi)

Susū mai le alo o Taulapapa, o lau susuga Leota

Maliu mai le mamalu o lo outou to’afā o le ‘āiga talimalama (Leleimalefaga, Lalau, Tauaefā ma Tagitagiapua)

Maliu mai upu i le ala o usoalii (Mali’o) ma le tama a malae e lua (Faleāfaga)

Maliu mai upu i le tuānu’u ma le nofoala

Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.

 

‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.

VI'IVI'IGA O LE ITŪMĀLŌ O FALEALILI

 

Falealili uma, i o ma o

Ta fia faalogologo i sou leo

Ua a’ave  tala o le mālō

Ua leai se manu e toe olo

 

Falefitu e, Falealili ma Aleipata

Faapea ma le Atu Safata

‘A ‘e fia faatau moa lafo ane sau ‘afa

Ae soia lava le fetui ala

E aogā foi fa’aga tama

E masani i le tupulaga

 

{ TALI }

Fa’amāne’ene’e, ‘aua le minoi tele

Ae teu le ta’alo ma le loto maualalo

Olioli malie, ‘aua le pisa ō

Faato’ā vivini o le moa/toa ina ua mālō

 

Satalo e, o le uso na totō

Teuteu ia le itūmālō

Falealili e, ia maopo’opo

O le mea sili lea e malie ai lou loto

 

Lata penina o le auro lea

Oi lata pululipano e po’o fea

Oe la’u manamea e lē fa’agalo i aso fai pea

O lo’u fiafia e, ua le gata mai lea

 

Aloalo malie lau va’a Samoa i lou sami lanu moana

Ua e ofi atu i le ava ma e pesepese le taulaga

Ua tuanai o le atu vasa ua fetaiai i le ava fatafata

Samoa e, amuia oe, ua taunuu ma le manuia lau faamoemoe

VI'IVI'IGA O LE AFIO'AGA O SALESATELE

 

E manatua pule, ae galo lava fa’alaeō

E fa’apea fo’i Afi’a i si ona vao

E mamae le tava’e i nai ona fulu

E faapenā fo’i ita i si o’u nu’u

O le ‘ā pale oe i lo’u ulu

 

Tu’i mai pea la le mulipapaga

O le a ‘ou aloalo i moana

Auā lava lau tapua’iga

O le a tā mau i si o’u lima

Tōfā, e lē galo lava oe i le agaga

Le Isaraelu, e susu’e pea le fa’amalama

O le a sisi la’u kitara e sefulu ona manoa

Ae faitalia oe ma le olaga

 

Ta te nene’e, auā o lau tōfā ua se’e

Leai se fa’afiti, e fia ola fa’ataute’e

Auā e mamalu pulega a matai

O le aumaga e fa’alagolago uma iai

Leai se fa’asaga tau mai

 

Malaeoletalu le nofoaga lea o lo’u to’oto’o

Ma si o’u fue lafo, e agiagia i le sami loloto

Tula’i mai se’i e va’ava’ai

Talitonu Toma, ina ua tago i le fa’ailoga

E lē toe iai se nofo pologa