Na fa’apēfea ona ‘āmata mai o a’u ma mea ta’itasi ‘uma ‘o si’omia ai a’u?

‘O le tala lenei mai Manu’a. Fa’atasi ma lona solo, ‘ua na tu’uina mai se fa’amaumauga aupito sili e uiga ‘i talitonuga o Sāmoa anamua ‘i le tupu’aga o mea ‘uma. Sa fa’apotopotoina lenei tala e le susuga i le feagaiga o Thomas Powell o le Lonetona Misionare Sosaiete (LMS), ma sa lōlōmia i Niu Sila i le tausaga 1886. ‘A e pagā, na lōmia na ‘o le fa’aliliuga fa’aPeretania a Powell, ‘a ‘o le ulua’i tusitusiga fa’aSamoa, ‘ā tonu ‘ua lē iloa. ‘O lea ‘ua toe fa’aliliuina ai le fa’aPeretania a Powell ‘i le fa’aSāmoa.

 

‘O Tagaloa, ‘o le atua e nofo i le vateatea. Na ia faia mea ‘uma.

Na ‘o ia lava sa iai i le ‘amataga.

‘A ‘o lē ‘o iai se lagi, ni tagata, se sami, se lau’ele’ele, sa ia fealua’i i le vanimonimo. ‘A ‘o le mea sa iai lona nofoaga, na tupu a’e ai se papa.

‘O le suafa o lenei atua, ‘o Tagaloa Fa’atupunu’u, talu ai sa leai lava se mea e tasi na gaosia muamua.

Sā ia fai atu ‘i le papa, “Māvaevae!”

Ona tutupu mai ai loa lea i le fa’asologa lenei:

Papa Ta’oto, Papatū, Papa Sosolo ma Fatutū.

 

Ona va’ai lea o Tagaloa Fa’atupunu’u ‘i le itu i Sisifo, ona toe fai atu lea ‘i le papa, “Mavaevae!”

Ua taia i lona lima taumatau. ‘Ua māvaevae ai le papa i le itū taumatau, ma na tutupu a’e ai loa le ‘Ele’ele ma le Sami. ‘O le ‘Ele’ele lea na tutupu mai ai tagata ‘uma o le lalolagi.

 

Ua lōfia ai lea o Papatū e le sami, ona faapea atu lea o Papa Ta’oto, “Ua manuia ‘oe i fiafiaga o lou sami.”

‘A e sa tali atu le Papatū, “Aua ‘e te fa’a’amu’ia mai, ‘auā e lōfia atu fo’i oe e le sami, ma sā fa’apea ai ‘i papa ‘uma lava.

Ona liliu atu lea o Tagaloa Fa’atupunuu ‘i le itū taumatau, ona tutupu a’e ai lea o suāvai māgalo.

Ua toe fai atu lea o Tagaloa ‘i le papa, “Māvaevae!” Ona tupu ai lea o le Lagi.

 

Ona ia toe fai atu fo’i lea ‘i le papa, ona maua mai ai lea o le fa’asologa lenei:

Tuite’elagi, lea na tete’eina ‘i luga le lagi; Vāteatea, Vānimonimo ma Aolelea.

 

Ua toe fai atu, ona maua mai ai lea o le Lua Tāne ma le Lua Fafine, ‘o Luaō ma Luavai.

 

Ona toe fai atu lea o Tagaloa Fa’atupunuu ‘i le papa, ona maua ai lea o le fa’asologa lenei:

Aoalālā, ‘o le ‘amu magamaga, ‘o se tane;

Gaoao o le tai, ‘o le puga, ‘o se fafine

Fa’apea fo’i ma le tagata; Agaga, Fatu, Loto ma le Masalo

 

‘O le muta’aga lea o galuega sā faia ma fa’atutupuina mai e Tagaloa i le papa. Peita’i, sā na ‘o le fa’aopeopea i luga o le fogātai, ‘auā sa leai se nofoaga mau na ‘atofaina mo ‘i lātou.

Ona faia ai lea e Tagaloa ‘o tofitofiga nei:

 

‘Ua fai atu ‘i le Fatu, Agaga, Loto, ma le Masalo, “Ia ‘outou ulutino ‘i le tagata.” Na fa’aigoaina ‘o Fatu le tane, ‘a ‘o ‘Ele’ele le fafine. O le ulugali’i muamua lea.

 

Na ia fai atu ‘iā Vānimonimo ma Vāteatea, “Ōmaia ma fa’atasitasi i lugā, ma ‘avea Aolelea ma a ‘oulua tama.” Ona lātou ō a’e ai lea, ‘a e sā na ‘o le leai lava, sā leai se mea e mautū ‘i ai le va’ai. Sa fai atu Tagaloa ‘i a Luaō ma Luavai, “Ō ia ‘oulua ma fa’a’ainā itū o vai loloto. Ia fanafanau ma e puga ma ‘ana meaola o le sami. ‘Ia fa’atagata e Fatu ma ‘Ele’ele lenei itū o le lalolagi.” Ona fai atu lea o Tagaloa Fa’atupunuu ‘ia Tui-te’e-lagi, “Sau ‘ina si’i le lagi.”

Na si’i ai lea ‘i luga, ‘ae na toe pa’ū ‘i lalo. Ona alu lea o Tui-te’e-lagi ‘aumai le “Masoā” ma le “Teve”, ‘o ulua’i lā’au ia na tutupu. ‘O mea ia na mafai ai ona si’i le lagi, ma maua ai se nofoaga e tau atu ‘i ai le va’ai, ‘a e sā leai muamua lava, na ‘o Vānimonimo ma Vāteatea sa iai.

 

Na fānaua e Vanimonimo ma Vateatea ‘o Ao ma Po, ona tofia lea ‘o ‘i lā’ua e ‘ainā le fogā’ele’ele, ‘a ‘o Vānimonimo ma Vāteatea ‘e ‘ainā le lagi.

 

Sa toe fānaua fo’i e Vānimonimo ma Vāteatea ‘o le tasi lagi, sa toe te’e fo’i ‘i luga, ma ‘avea ai ma Lagitualua.

Na fa’apea ai lava ona fānaua ma ‘ainā fo’i isi lagi e fitu, sa si’itia ‘uma lava e Tui-te’e-lagi, ma fa’aigoa ai ‘o Lagituatolu, Lagituafā, Lagitualima, Lagituaono, Lagituafitu, Lagituavalu ma Lagituaiva.

 

Ua muta ai loa lea o le gafa o Vānimonimo ma Vāteatea. Ona nofo lea ‘i lalo o Tagaloa Fa’atupunuu ma na fa’atupuina:

Tagaloa Lagi

Tagaloa Asiasi ‘i Tagata

Tagaloa Vavao

Tagaloa ‘Avefe’au

Tulī

Logonoa

 

Ona fai atu lea o Tagaloa Fa’atupunuu ‘iā Tagaloalagi, “O le ‘ā ‘avea ‘oe ma tupu o le lagi.” Ua ia ‘auina lea o Tagaloa ‘Avefe’au e ‘amata mai le Lagituaiva ma fa’aauau ‘i le Lagituatasi ‘ina ‘ia vala’auina se fono e fa’apotopoto ‘i le Lagituaiva e fa’alauiloa ai ‘ua ‘avea Tagaloalagi ma tupu o ‘i lātou uma.

 

‘Ina ‘ia fa’ataunu’uina lava lea fuafuaga, sā ia malaga atu ‘i lagi ta’itasi. Na ia alu ifo ‘i le ulua’i lagi, le itūlagi lea o Ao ma Po. Sā ia fesiligia ‘i lā’ua po ‘ua fa’ataunu’u le fa’atonuga e fa’a’ainā atulagi. “Ioe,” ‘o le tali ane lea. “Fa’auta ‘i le vāega pogisā ma le vāega mālamalama o le lagi, fa’apea ma fetū ‘ese’ese. ‘O mā’ua na fānaua ‘uma ‘i latou, vaganā le to’afā e le’i maua ni o latou nofoaga. ‘O ō latou igoa, ‘o Manu’a ma Sāmoa ma le Lā ma le Māsina.

 

Sa fa’atonuina loa e Tagaloa ‘Avefe’au ‘i latou nei e to’afā ‘ia ō a’e ‘i le Lagituaiva ma ‘auai i le aofia a Tagaloalagi, ‘o lē ‘ua ‘avea nei ma o latou pule, ma ‘o le ‘ā maua mai ai fo’i o latou tofiga, ‘e lē gata ‘i lenā, ‘ae sa fa’atonuina fo’i ‘ina ‘ia lātou malaga fa’atasi.

 

Sa usuia le fono i le Lagituaiva, ma na fa’aigoaina ai lea nofoaga ‘o le “Malae o Toto’a”.

 

‘O lea lava aofia na tōfia ai le fanau a Vāteatea ma Vānimonimo ‘e ‘avea ma tufuga faufale, ma ‘o latou fo’i o lo’o ‘aināina le Lagituavalu. ‘E tusa ma le sefulu afe ‘i latou ma na fa’aigoaina ‘uma lava ‘i ā Tagaloa. Ona lātou fausia loa lea o le maota o Tagaloalagi ma fa’aigoaina ‘o le “Fale’ula.”

 

Ona fai atu lea o Tagaloa Fa’atupunuu ‘iā Ao ma Po, “Ia tu’u atu tama talavou nei e to’alua, Manu’a ma Sāmoa, ‘e ō ifo e ‘avea ma pule o le gafa o Fatu ma ‘Ele’ele, ma ‘o le ‘ā tu’uina fo’i o la’ua igoa ‘i le ‘āiga o lē ‘ua ‘avea nei ma tupu o le Lagituaiva. ‘O le mea fo’i lea ‘ua ‘avea ai ia ma tupu o Manu’a Tele ma Samoa ‘ātoa.

 

Ona toe fai atu lea o Tagaloa Fa’atupunuu ‘ia Ao ma Po, “Ia ‘avatu tama talavou ia ‘o Lā ma Māsina, ‘e ta’ito’atasi ma mulimuli atu ‘i tagata ta’ito’atasi o ‘oulua. ‘Ā ‘o Lā, ona soso’o lea ma Ao, ‘a fai ‘o Po, ona soso’o lea ma Māsina.” ‘O lenei to’alua, ‘e ta’ua ‘o “Ataata o Tagaloa” ma ‘ua lauiloa ai i le lalolagi ‘ātoa. Ona fa’atonuina lea e Tagaloa Fa’atupunuu ‘ia lā ō āga’i ‘i le itū e tasi o le lagi, ma ‘ia fa’a’aumea ‘i lā’ua e fetū.

 

Ona liua lea ‘o Tagaloa ‘Avefe’au ‘i le manu ‘o Tulī, ma na malaga ai loa e asiasi solo. ‘A e sa na le maua se lau’ele’ele mātūtū, na ‘o le vasa laolao lava.

 

Ua ia fa’aeaina lea o le lau’ele’ele mai le sami, ‘āmata mai le atu sasa’e. Sā ia āga’i atu pea fo’i ‘i Fiti ma fa’atupu ai ni lau’ele’ele. Ona ia lagona lea o lona vāivāi ‘i ana fealua’iga i le vasa laolao, ona ia tu ai lea ma va’ai a’e ‘i ā Tagaloa Fa’atupunuu i le lagi.

 

Sā silasila ifo Tagaloa Fa’atupunuu, ona maua ai lea o lau’ele’ele o Toga.

 

Ua toe va’ai atu nei Tulī aga’i ‘i Sāmoa(Manu’a), ‘a e sā lē mafai ona fa’aauau o lana malaga. Ona toe va’ai a’e lea ‘i le lagi.

 

Sā silasila ifo Tagaloa Fa’atupunuu ma Tagaloalagi, ona ea a’e lea o le lau’ele’ele ‘o Savai’i.

 

Ona ia taliu ai lea ‘i le lagi ma ta’u atu nei lau’ele’ele fou ‘uma ‘ua maua. Ona malaga atu ai lea o Tagaloa Fa’atupunuu i le ao uliuli e asiasi ‘i lātou. Sā matuā fiafia ai lava, ma na ia fa’apea atu, “Ua lelei.” Ona tū ai lea o ia i tumutumu o mauga ma sōlofa ifo ‘i lalo, ‘ina ‘ia saunia ai nofoaga mo tagata.

 

Ona ia fo’i atu ai lea ‘i le lagi ma fai atu ‘iā Tagaloa Avefe’au, “Taliu atu ia ma ‘ave le “Fuifuilua ‘o Atu ma sasa’e, lā te fa’a’ainā le itū ‘ātoa i sasa’e.” Mai lenei lā Fuifuilua a Tagaloa, na maua ai le igoa “Atu Sasa’e.”

Sa ia toe ‘auina atu Tagaloa ‘Avefe’au, fa’atasi ma Atu ma Fiti, ‘e gaosia tagata o motu o Fiti ma fa’aigoaina ai ‘o le “Atu Fiti.”

 

Sa fa’apea fo’i ona ia ‘auina atu o Tagaloa ‘Avefe’au mo lea lava galuega, fa’atasi ma Atu ma Toga, ma fa’aigoaina ai ‘o le “Atu Toga.”

 

O le poloa’iga a Tagaloa Fa’atupunuu na toe taliu ai Tagaloa ‘Avefe’au ‘i Manu’a, ‘i ā Fatu ma ‘Ele’ele, ma ‘o la’ua gafa na filifilia ai Valu’a ma Tiapa e ‘auina atu e fa’a’ainā ai se motu, sa le’i maua so na igoa. 

 

O lenei lā ulugali’i, na fānaua se teine na igoa ‘i ā I’i ma se tama na igoa ‘iā Sava. ‘O ‘i lā’ua ia na fa’a’ainā lea motu, ma fa’aigoaina ai ‘o Savai’i.

 

‘I lona taliu mai Savai’i, na pupula fa’anaunau atu ai Tagaloa ‘Avefe’au ‘i le lagi. Sa silasila ifo Tagaloa Fa’atupunuu, ona ea ai lea mai le sami le motu ‘o ‘Upolu. Sa toe pupula atu fa’anaunau Tagaloa ‘Avefe’au ‘i le lagi. Sa toe silasila ifo fo’i Tagaloa Fa’atupunuu, ona maua ai lea ‘o Tutuila.

 

I lona taliu atu ‘i lagi, na fa’apea atu Tagaloa ‘Avefe’au, “Ua iai nei ni lau’ele’ele se lua e mafai ona faia ma mālōlōga.”

 

Sa tali atu Tagaloa Fa’atupunuu, “Ave nei le Fue Fa’atupu Tagata ma totō. ‘Ia suluia e le lā. Tu’u ai pea se’i ola lelei ma fua, ona logo mai ai lea o a’u.”

 

Sā totōina lenei fue i le pito i sasa’e o ‘Upolu, i le lau’ele’ele sa ta’ua ‘o le “Malae o le Lā” ‘Ina ‘ua asiasi atu ‘i ai Tagaloa ‘Avefe’au, sa ia iloa ai, na fānaua mai e le fue ni meaola nini’i ‘ae leai ni foliga. 

 

Sa ia logoina atu Tagaloa Fa’atupunuu ma ta’u atu ‘i ai, ‘ua fua le “Fue” ‘ua fānau. Ona alu ifo lea o Tagaloa Fa’atupunuu, ma ‘ua na iloa ‘ua fānaua mai e le Fue le anoano o ilo. Sā ia fa’atā’oto’oto ‘i lātou ma gaosia ai o lātou ulu, foliga, lima, ‘ogālima, ma ‘ua maua ai fa’atinoga o tagata. Ona ia tu’uina atu lea ‘i ā ‘i latou ta’ito’atasi le loto ma le agaga.

 

Na fa’apea ona ia gaosia ai o tagata ola e to’afā ma fa’aigoaina ‘o Upolu, Tele, Tutu ma Ila. 

 

O ‘Upolu ma Tele na tu’ua e fa’a’ainā lea motu ma ta’ua ai o “Upolu Tele”.

O Tutu ma Ila, na tu’ua e fa’a’aina le isi motu ua ta’ua nei o Tutuila.

 

‘O lea Fue, ‘o le alo tama’ita’i o Tagaloa. ‘E lua ona igoa, ‘o le “Fue Tagata” ma le “Fue Sā.”

 

‘O le māvaega a Tagaloa Fa’atupunuu ‘iā Upolu Tele ma Tutuila, ‘ia ‘aua ne’i lā sopo-tuā’oi ‘i ā Manu’a, ‘a ‘ia gata lava le pule a le motu i ona lava laufanua.