Ua tala tua valu lau o le fo ma ua talagā pasina le asō. Ua lau i ‘ula le taeao toto’a ma le taeao manino. Ua saveioloolo fo’i le maota o le galuega ma ua malumaunu le tupua ma le la’o’ai. O lea ua nofoia ‘auoloolo ma tia mapu’epu’e, ina ua paū le tuāvao mafua malu. Ua tau fai ‘ai fo’i le ofeloa ma le matila i pa’ia lasilasi o le taeao ma le aso, ‘auā o lea ua si’i mai le fala si’isi’igatā ma fa’amalo’ulo’u mai le pa’ia tele i lena itu o le maota.

Ua atoa tupe i le taulafoga i lena tala na atoa, i le susū mai o lau susuga i le fa’afeagaiga o le ekalesia ma le autalavou i le afioaga o Fagasa, tainane le pa’ia tele o ona tulaga fa’alupe. O le pa’ia lava lea (Fa’alupega o Fagasa). O lena ua nofoia pou o lauga i sou faleupolu fetalai e tusa o le manulauti o la tatou fesilafa’iga. O lea fo’i ua atoali’o le masina i lenei talaga, i le susū atu o le susuga i le fa’afeagaiga o le ekalesia ma le autalavou o lenei nu’u. O le pa’ia tele lava lea (Fa’alupega o Nu’uuli). O lea fo’i ua nofonofo atu faleupolu totofi o lenei itu o le maota. Ua mamalu le talatuā, ‘auā o lea ua nopia’i le tausala ma le ‘aumaga latou te lu’ilu’i malie so tatou agatonu, ‘auā lenei fesilafa’iga.

Ava! – O ‘ava sa ali’itaeao mai ai le susuga i le fa’afeagaiga, ae usualele ma usufa’aaloalo le mamalu o tulaga fa’alupe o le ekalesia ma le autalavou i Fagasa. O’ava e tatala gatā, e le faigofie. O ‘ava sa fa’agaga e sua, ‘auā le galuega a le Atua. O ‘ava sa tofā i maota ae moena’i i laoa. O ‘ava sa fa’apelepele, ‘auā mālō o le ekalesia e fetaloloa’i. E ui ina faigatā, ‘ae ua tala i le asō ona o la tatou fesilafa’iga.

Ia, silaalofi maia le pa’ia tele o le faigamalaga, i lau susuga i le fa’afeagaiga ma le ma’ave eseese o lenei itu o le maota. O le lumā’ava si’i lenei sa ali’itaeao mai ai le susuga i le fa’afeagaiga, ae usualele ma usu fa’aaloalo le mamalu o le autalavou i Fagasa. O lea o le a ‘ou folafolaina atu

1.      Ua i ai lupesina e 3

2.      Ua i ai latasi e 2

3.      Unaolei’asa

4.      Matimatimaivasa

5.      O ‘ava tugase ua mamago fa’ala lelei

A ao le malae ua lava ma totoe ma ua le mafaitaulia. O lea o le a fai i ai le pule a Mavaega, ‘auā ua lava lelei lona fa’asoasoaina.

Sau se tama/taule’ale’a/’aumaga

1.      Te’a le inati lea o le tanoa e patipatia ai lo tatou taeao fesilasilafa’i

2.      Te’a le ava lea ‘auā le ipu o le talalelei i le susuga i le fa’afeagaiga

3.      Te’a le ava lea i le susuga i le peresitene o le autalavou

4.      O ‘ava o lo ‘o totoe, o le  a manoa i nei, ‘auā e umi taualumaga o la tatou aso.

Soifua ma ia Manuia.