FA'ALUPEGA
Afio mai Tuiavii ma le usoalii
Susū mai Valai ma le ta’auso (Seiuli)
Susū mai le ma’upū (Su’a)
Maliu mai le faleulu (lautinalaulelei i le faleupolu)
Maliu mai le lua nofo falelua (Fiu ma Malaesala)
Maliu mai oe Saleaaumua ma le faga o alii
Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.
‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.
VI'IVI'IGA O LE ITŪMĀLŌ O ALEIPATA
Afio maia, afio mai Fagasoaia
O le sa’oaualuma
O ia lava ua tofia, i le faiva o mānaia
Lafo i Aleipata, o le nu’u matagofie
O le suli o le tupu lenā ua filifilia
Malelega o le Tuiatua iā Fagasoaia
O ia lava ua tofia,tofia e le Tuiatua
E su’ea se siapo, mo Fuataga ma Tafua
Ua ou sau nei, se’i ta tou aleaga
I si o’u nu’u moni o Aleipata
I le ta’aloga, o le fa’aagatama
Ma le talutalu fou, o aso ia o le malamalama
O Fepulea’i, ua e’e ai pāpā
O le ‘a feagai ma Tumua
A’o Fagasoaia, o le sa’oaualuma
O ia lenā, o le ‘a maua ai mea uma
VI'IVI'IGA O LE AFIO'AGA O TI'AVEA
E mamae le tava’e i ona fulu
E fa’apenā oe si o’u nu’u
Oute nofo i tuā, i le fa’atausi’usi’uga o Upolu
Oute sau mai Aleipata
O Ti’avea o si o’u afio’aga
O lo’u fa’asinomaga, e pele oe i lo’u agaga
E afio ai o le Tuiavi’i , le matua ma usoalii
Susū ai Valai ma le ta’auso
Susū oe le ma’upū
Le mamalu i le Fale’ulu
Sale’a’aumua le falelua
O ou mamalu lenā, na aumai e ta tua’ā
Le ulugalii o Ti’a ma Vea
Maua ai lo’u igoa o Ti’avea
Na malaga mai Sasa’e
Ma nonofo i le Faga o alii
Maua ai o Tuife’ai
O ia lenā le fa’apogai
Lo’u nu’u le amataga, a’o iai i Ti’avea tai
E lima tapua’iga, i totonu o si o’u afio’aga
Lua o Metotisi, Katoliko Roma ma le Mamona
Fa’apea ma le Lotu Patipati
Auā ni manuia mai i le lagi
O nai o’u tupulaga, ia tumau i le fealofani
E mamalu pulega a lo’u nu’u
O matai lava o le ta’iulu
Fa’amalosia ‘aumaga, ia mamalu pea le afio’aga
Āfai e te masalosalo
Malaga mai i Ātua i se aso
E fa’afeiloa’i oe, e Fagasoaia lou fa’amoemoe
E! e tuāfale i le papa ae lumāfale i le sami
O la’u kirikiti o le fetuao e numera tasi i le lalolagi
O la’u i’a fo’i lea o le igaga, e sau fa’atasi i le tausaga
O lou vai mai le papa, o a’u ia fa’amaumauga