LE AFIOGA I LE ALO O SALAMASINA IA SATELE MA LE FALETUA IA EVELYN LILI'O SATELE

FA'ALUPEGA

Afio Satele o le alo o Salamasina

Susū ma’upu ia Tapopo ma Afemata

Susū mai le tama’ita’i o Tauaefā

Susū Tupuivao ma Tagaloa

Mamalu mai oulua igoamatua ia Faga ma Lealao

Ae le liua le vai o Sina i lena itūvai

Afio mai o Puaauli ma Sogimaletavai

O alo tutusa o le Tuiatua

Mamalu mai le fetalaiga ia Ava ma Tiapula

O paia na a le Samatuafaigā ma le fatuala ma upu ia te oe le Vaifanua ma le Sa’ole’auuta.

Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.

‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.

ALAO

E MĀLŌ LE MOAFANUA ‘AE LE MĀLŌ SE MOAFOLAU

O Saoluaga o se tagata e tele ana taleni. O ia o se tufuga faufale sa iloga i ia ona aso i le atu Samoa ona o lona tomai i le fausaga o le fale'ula i le nuu o Ta'ū i Manu’a. O ia fo'i o se tasi o lo ‘o tā'ua i tala lona maoa'e i le fatupese po ‘o le lagi solo, ma e lelei fo'i i le faiva o le tautai pe ‘ā o’o ina folau i atumotu o Samoa. E iai tala i ana aumoega i tama'ita'i. E tele alaga’upu sa amata mai i folauga ma faiva o le alii lenei, a'o le alagaupu ua iloga ai le ali'i lenei o Saoluaga o le a ta'ua pea i lenei tala e fa'apea, "Ua fa'apōpō a ni aso ua, a o aso folau fo'i ua le tu'ua!" O le a fana tonu le ifi o Māina se'i vaai po 'o le a tonu le mafua’aga o lenei alagā’upu.

O aso o le lologoā o tala o le Malietoafaigā i le nuu o Malie i le motu o Upolu, o aso fo'i ia o le malosi o le alii o Saoluaga. Sa mana'o le ali'i o Malietoa e fia fau so na fale matagofie e talafeagai ma lona malosi ma ona ao. Ona ave lea o lona mana'o i Manu'a e fau so na fale'ula e pei o fausaga o lo ‘o i Malaetele i Ta'ū. Ona auina mai lea e le tufuga lenei o Saoluaga lana 'au tufuga e galulue i le maota o le Malietoa e pei ona mana'o ai. Ua faatonu uma e Saoluaga i lana au tufuga tulaga o le fausaga ma le fua o le maota o le alii o Malietoa. Ona malaga ai lea o le au galulue i Sisifo.

Ua oo ina faai'u le galuega ona manatu lea o Saoluaga, o le a folau i le motu o Upolu se'i va'ai i le fale o Malietoa po ua sa'o lona fua ma lelei lona fausaga. Ua taunu'u le malaga ae le'i ulufale ona e le'i afio mai le alii o le maota. Ua taligā a'o loo fealualua'i i fafo le alii e ona le maota. Ona tatali tatali lea, ‘ua ulufale ane i totonu ua alaala i le isi tala o le fale, ae lē gagana lava i le alii o Saoluaga.

Ona fai lea o le lafofua a Sao o le a toe fo'i i Manu'a:

Agatonu Manu'a 'o fesili fua

Ma fetapa'i 'a 'ē aganoa;

Folafola a e topailoa.

Mata'utia i le sologa;

Amuia se tautama ola!

A pese, 'ua ta fia lagona,

Ma lenei tautama gase,

'A pese 'ua ou lē lagona.

'O oe Malietoafaiga e, se'i ta'u atu si ota igoa

'O a'u o Sao mai Manu'a! Na 'ou sau

'Ou te mataali'i, matasau i lau alāla.

Tū mai se la'i 'o malie mola'i a'e Saoluaga,

Tū vae i Manu'a ma To'aga moeala i Fale'ula

Gagana se malama, 'o fana'e tua o Sāua,

'O suluia ona vaifanua;

Ua mae'a atu ana upu ia ona fa'afeiloa'i lea e le alii o Malietoa e faapea, "Ua e sao mai i le atu vasa ma le atu ava, se'i e maliu mai, se'i o ta'ua faafesaga'i ma fai le ava fatafata." Ua faasino i le isi tala o le fale e agai tonu mai i le tala o loo afio atu ai le Malietoafaiga. Ua faafeagai tonu o la nofoaga. Ona iai lea o upu, o le tufuga o ia o le agai o tupu. Ua faalagi ai lava faapea i soo se tufuga o le atunuu, o le agaiotupu. Ua iai fo'i le upu, "Ua feiloa'i i le ava fatafata." Ua vavao atu e le Malietoa se'i o la'ua mafuta ma talatalanoa.

Ae tali atu Saoluaga, Malietoa e, ua e fetalai mai fua a ua fa'apōpō a ni aso ua, a'o aso folau fo'i e le tuua. Ua fia fo'i Saoluaga i ona fanua. O lana malaga lea na afea ai le motu o Tutuila i le nu'u o Aoa.

O le tupua sa taumate i le papa filigatā o le Tuimanu’a. A’o faiva vale sa tanumia i le fafā o sauali’i. Na momoli mai i le auau ma le taetafe ma to’a i le oneone le ufitia. O le ‘a ta’oto lā e pei o ti’a o le tautiaga nai le Si’u o Amoa o Oloamalie ma Matofa. A’o le aso ma le filiga, o le aso fo’i ma le mata’igatila.

O Saoluaga e mai le motu o Ta’ū i Manu’a. Na malaga e maimoa i le sau a le Malietoafaigā. Ina ua ma’ea le la feiloaiga ma le Malietoa, ona toe taliu mai lea ma taunu’u mai i Aoa i Tutuila nei. Ua fa’alogo le ali’i, o lo ‘o iai se tama’ita’i lalelei tele, e suafa ia Sinaialao i le nu’u o Alao. Ua momo’o o ia, i le fia pa’i i le vai o le tama, ma se’i feiloa’i atu ia Sina. Ua fa’alogo le tama’ita’i o Sina, o le a si’i atu le faletautu a Saoluaga i lona nu’u. O lea na alu ai le tama’ita’i, ua sama moe, ma ua lalelei lava. Ua fa’alogo iai le ali’i o Matuai’au o Alao. Ona sama fo’i lea o ia. Afai ‘ae taunu’u atu Saoluaga, ona ‘i’ite lea, o lona uiga, o Matuai’au o le tane a Sina.

Ona malama lea ‘o le taeao, ‘ua alu atu le malaga i le nu’u o Sina ‘o Alao. Ona afe lea o le malaga ‘i le fale o Sina, ‘ae tau le va’a i gatai. Ona alu ane lea o Sina i le malaga, ‘ua la nonofo fa’atasi ma Saoluaga. Ua va’ai atu Saoluaga, ua samasama Sina ma ‘ua lalelei lava. Ona fai atu lea o Sina: “O le ‘a fai lo tatou ‘ava” ona fai lea o le ‘ava. Ona va’ai atu lea o Saoluaga, ua sau ia Matuai’au, ‘ua samasama uma fo’i lona tino, ua tusa ma le tino o Sina. Ona masalo lea o Saoluaga, o le tane lea sa momoe ma Sina i le po. Ona fa’apea lea o Sao: “Ua lelei, ona alu lea o le malaga, auā ua musu e toe vaai iā Sina. Ona ‘uma lea o le ‘ava, ona fa’apea atu lea o Saoluaga: “Sina, o le o’u toe fo’i”. Ona tu lea i fafo Saoluaga ma fa’apea ana ‘upu: “Ua fa’apōpō ni aso ua, ua le tu’ua fo’i aso folau, o le ‘ā toe fo’i Saoluaga i ona vaifanua”.

Ona tali atu lea o Sina:

Sao e, tu mai, tali mai

Se’i fai ni ‘oso mo tautai

Ua gaga fo’i Matuai’au

Ua sama ia, ua sama a’u

A na te le’i tali le pua, e le’i tau

O i luga le fau e sama ia

A o i lalo le fau manaia

Tutuila ma Manu’a. O upu a le atunu’u: “E mālō le moafanua, ‘ae le mālō se moafolau”