FA'ALUPEGA
Susū mai Seiuli o le alo o Malietoa
Afio mai le falefia o ali’i
Maliu mai lau tōfā Ulugia
Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.
‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.
VI'IVI'IGA O LE AFIO'AGA O VAIUSU
Lea ua susū mai Seiuli ma le falefia o ali’i
Fa’apea le mamalu o Sā Ulugia
Se’i tali fa’aaloalo i si o’u vala’aulia
Ina ia manuia lou aso fiafia
Auē le To’oa e, le manamea e,
O si au fu’a e, Peretania e,
Ua agiagia i le taulaga
Pei o vai tonu lea ma togo ola
O Fogāvaiusu e iai le afio’aga
Laauli ma le aualuma
Le ulu la’au lae tu mai i uta
Se isi ana e fa’afiaula
E musu le teine e faamaualuluga
A saga mai teine vaisua
E fa’aigoa e si au tama ula
Lou laumua e tu mai i uta e to’a le puao si ana atumauga
A oso a’e o le la, ua matafi ai mea uma
E fa’apenā, le auga ai au teuga
Tofu ane i le vai, lau ulafala
Pua’ina le manogi, ae sau le sasala
Ua so’o ai nei le teine tausala, pei o Laauli tu ma’ata’ata
Fai mai o le aitu, o le aloali’i mai Faleata
E tetele pesega, ae matua lava i le ‘ō’ō
Tala o si o’u nu’u ma le itūmālō
Tū mai i Sisifo, feagai ma Mulinu’u
E lua ona pitonu’u, o Vaigaga ma Vaiusu
O Fogāvaiusu, lo’u malae faitaulia
E tū ai le Katoliko, osi ai lau taulaga
O Vaigaga i Sisifo, lauiloa EFKS
O le la’au o le ola, fa’aleagaga.
Vaiusu ma Vaigaga alo la’ia fai ou faiva
Ua susū mai Seiuli o le alo o le Malietoa
Afio La’ulu le falefia
O ali’i o Faleata
Tōfā Ulugia ma lou ‘āiga.
O oe lava o le Itū’au malosi o Faleata
O oe o le fa’apito, i le saofa’iga
Pe ‘ā fonoa malae, Vaitagutu ma Lepea
O oe lava o le nu’u tofia
O alo o Letelesā
Le feagaiga o le Tupufia, iā Faumuina
O lou gataifale, pa’upa’u ae o’o i Lepea
Ta’oto ai le punimatātogo, ma le puniloa
E mālū lo’u vaita’ele, e te ‘au’au ai
Ma tausami sau ifo(sau ipo) e te talitonu ai.