LE AFIOGA I LE MALELEGA A LE TUIOLOSEGA MATAFAGA

FA'ALUPEGA

Afio mai Tuiolosega ma lau malelega

Susū mai usoali’i (Seumaala, Tupolo ma Vo’a)

Susū mai le nofo ao (Tagaloa, Papalauena ma Tivao)

Maliu mai oulua to’oto’o (Malemo ma Malaepule)

Mamalu mai oulua le toga, o lau toga Ape ma lou to’oto’o o Niuatoa

Ma upu iā te oe le Olosega

Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.

‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.

EKALESIA FA'APOTOPOTOGA KERISIANO AMERIKA SAMOA (EFKAS) I OLOSEGA

AO PUPULA

O LE MA'A FA'AMANATU O LE ATOAGA O LE 60 TAUSAGA O LE MALUMALU I OLOSEGA

FAIFEAU TOEA'INA IA TIMA TIMA TULIFUA O LO'O LAGOMAU I AUTAFA I LE MALUMALU O OLOSEGA

O LE FA'AMALAMA TIOATA O LE MALUMALU TAPUA'I I LE NU'U O OLOSEGA: "AO PUPULA"

Rev. Matthew Hunkin 1841-1849

Rev. Taunga

Rev. Obeda (Opeta) mai le nu'u o Mangaia(Rarotonga)

Rev. Elder Tima Tima Tulifua

Rev. Saneterini ma le faletua Maina

Rev. Setefano

Rev. Elder Lamese

MALEMO

O Malemo Matua na usu ia Patiese i Fitiuta fa’ae’e le gafa o:

Viena 1st
Aperaamo

Usu Malemo Viena 1st i le tama’ita’i o Uiga le alo e fa’asino ia Faamausili Manaia ma Noga Tuimanu’a Tauaitu lea e iai teine e to’atolu o : Fuli, Uiga ma Taeoilagi. O le tama’ita’i lenei o Uiga Faamausili na usu mai ai Malemo Viena 1st ona iai lea o:

Malemo Iosefa Viena
Saili(f)

Usu Malemo Iosefa Viena i le tama’ita’i e suafa ia Feiloa’iga Malaepule Moegu Letuli ona iai lea o tama e to’alima(5):

Moegu (Milo M. Iosefa)
Iosefa (Malama M. I) Faifeau Samoa
Nu’utai (Sauasili M. Iosefa)
Viena (Eseroma Malemo Iosefa)
Iotamo (Tu’uaga Malemo Iosefa)

Usu Moegu Malemo ia Vaela’a Sala i Ofu fa’ae’e le gafa o:

Moegu 2nd
Uso(f)
Talia

Usu Moegu 2nd ia Alofa Afalava Leo’o o Aoloau fa’ae’e le gafa o:

Letuli Moegu
Iloa Moegu(f)
Selepa Moegu(f)
Moso Talia Moegu

Usu Letuli Va'a Moegu i le tama’ita’i o Fetaia’imaali'i (Fetaia'iga) Fa’aea ona iai lea o:

Feiloaiga(f)
Petaia Levi Malaepule

Usu Malaepule Petaia i le usuga muamua ia Legalo ona iai lea o le teine e to’atasi o:

Sipuia’i(f)

Usu mai Leitufia ia Sipuia’i i le usuga muamua ona iai lea o le tama o:

Tupolo

Usu mai Simamao ia Sipuia’i i le usuga lona lua ona iai lea o le tama o:

Ave’au

Usu Malaepule Levi Petaia i le usuga lona lua ia Mafa’olo Mapu le alo e fa'asinoa ia Mu'a Mapu ma Malie Taleta Mapu fa’ae’e le gafa o:

Fa’asulusulu Malaepule(f)
Manaia Tuapo
Toeaga Malaepule(f)
Mona Petaia
Taisea Petaia(f)
Fa’aeanu’u Levi Malaepule
Suai Malaepule(f)
Feaua’i Malaepule(f)
Manaia Soa’ai Malaepule
Taisea Malaepule(f)

Usu mai Silupe Faimālō ia Taisea Malaepule ona iai lea o le fanau e to’alima o:

Taisea(f)
Soso(f)
Fale(f)
Fulu Malaepule(f)
Kirifi or Kleefi (Faifeau Samoa)

O LE SUAFA MALEMO

Malemo Viena e o’o mai ia Malemo Siagiagi (1830-1930) ua 100 tausaga.

Malemo Poto

O le ulua’i Malemo lea na amata ai ona fa’amamaluina ai le suafa sa feagai ma Tuimanu’a Lepulu

Malemo Lemusuitau

E fa’asino i le tau so’o o le afio’aga o Olosega ma nu’u o Manu’a

Malaemo Viena 1st

Malemo Viena 2nd

Na feagai ma le lotu i le tausaga 1830. Malemo Iosefa na avea ma faife’au LMS. Maliu i le tausaga 1887.

Malemo Tausaga

Na maliu i le taua e igoa o “Solone’e”

Malemo Lei’aione

Na feagai ma le afi na sosolo i le vainu’u i Manu’a

Malemo Mekuli

Na maliu i Ta’u i le fasi fua (E iai le mafua’aga)

Malemo Siagiagi Iosefa

Na feagai ma le mālō i le tausaga 1900, ae na maliu i le tausaga 1942

Moegu Malemo Iosefa na usu ia Taemosi Pa'au fa’ae’e le gafa o:

Malemo Siagiagi Iosefa
Malaki Fua’au Iosefa
Moso Eseroma Iosefa
Uperesa Malemo Iosefa
Fa’apu’upu’u Moegu Iosefa(f)
Manuolevasa Moegu Iosefa

VI'I O OLOSEGA

O Olosega o lo’u nu’u peleina

E tasi oe ‘ae afe iā ita

Oute tiu i lou igoa

Samoa ma le vasaloloa

E fai oe ma o’u sei

O lo’u pale oe i Samoa nei

O lo’u mitamitaga, tumau oe i le agaga

Afio le malelega e tasi i Samoa ma le Tuiolosega

Nofoao ma Usoali’i

Fetalaiga i to’oto’o

Malaepule ma Malemo

Susū fo’i o Ape

Fofoga Niuatoa, ma ‘upu iā Olosega

Olosega se’i tula’i maia

Alo ia i ou faiva manaia

Ia fa’atamāli’i lou sao, ma matamatanonofo le aso

Afai e galo oe iā ita, pipi’i a’e lou laulaufaiva

O oe o le Ao Pupula, i le lalolagi uma

TALA I LE NIUATOA

O Niu o le tagata Toga, o le atali’i o Tuitoga Agaga po ‘o Tuitoga Faisautele. Ua ta’ua lenei Tuitoga o le Tuitoga Agaga, ‘auā o ia lenei sa aga mai i le mana o Tuimanu’a ‘ina ua ‘a’ave atu tala i le mana o Tuimanu’a. Ona fai lea o lana mavaega i lona atali’i o Niu. O le ‘a ‘ou malaga i Samoa. Ou te fia va’ai i le mana o Tuimanu’a ua ta’ua mai. Afai o le ‘ā tuai mai le malaga, o le ‘a silia i masina o le vaito’elau, ona e manatu lea ‘ua tupu le fa’alavelave i le malaga i Samoa. Ona e sa’ili atu lea o a’u. A’o mea nei e te alu atu ma ‘oe i Samoa.

O le “to’oto’o” ma le “fue’afa”. E fa’atatau i le tu a Samoa e muamua fai fetalaiga.
O le “anava” o lona igoa o le “fa’auliulito”. E fa’atatau i le tu a Samoa, ‘afai o le ‘a i’u fetalaiga ae i’u o le ‘ā tau, ona e fa’aaogāina lea o le “anava”.

Ona malaga mai lea i Samoa o Tuitoga ma sa taunu’u i Ta’ū i le taeao po lava. Ona ō lea i uta i le ‘a’ai. Ona alu lea o Tuitoga i tagata o Ta’ū, ma tu’ufesili po ‘o fea le vaitā’ele o Tuimanu’a. Ona fa’asino lea iai le ala ma ‘ua fai atu iai o lo’ o iai le tulafale a Tuimanu’a e suafa iā “Vaitolo” na te leoleoina le vai. Ona alu atu lea o Tuitoga i le vai ‘ae tete’e mai ‘e Vaitolo, ma ‘ua lē mafai lava le Tuitoga. Ona oso loa lea o Tuitoga i le vai, ma le va’ai atu o Vaitolo ma tagata Toga ua mānusia i luga Tuitoga ‘ua maliu. Ona alu atu lea o Vaitolo ‘ua ‘aumai i luga.

Ona fetāgisi ai lea o Toga fa’apea, “Auē ta ofa ofa e, Auē ta mate mate, Ua mate Tuitoga e”. ‘Ua ‘ave Tuitoga i le fale’ula ua tu’u ai. A’o fetāgisi pea lava tagata Toga. O ona po ia o lo ‘o iai le maota o Tuimanu’a i le utafanua o Ta’ū i le mea e igoa iā “Mata’ili’ili” e lata i le ala tele e ō ai tagata e galulue.

O le taeao lenei ua usu ai le nu’u o Ta’ū e ‘aumai mea e tali i ai le malaga a Toga. Ua gasolo ma ‘ua talanoa iā Tuitoga ‘ua maliu i le vai ta’ele o Tuimanu’a. Ua fa’alogo i ai le masiofo a Tuimanu’a. Ona fesili lea i tagata, “O le a le mea ua pisa ai i lenei taeao” ona tali atu lea iai o tagata o le usuga, “Matou te talanoa i le malaga a Toga, na taunu’u ane nei i le taeao, i le ‘ua maliu ai nei Tuitoga na ta’ele i le vai o Tuimanu’a, o lo’o fetāgisi ai nei Toga”, alu loa le masiofo ua ta’u iā Tuimanu’a, ona fesili lea o Tuimanu’a i lana masiofo po ‘o ai e ana le tala, ona fai atu lea o le masiofo, “ o le tala a le usuga nei i le taeao”. Ona fai atu lea o Tuimanu’a, “Aua ‘e te tu’u i le tala a le usuga, ae fa’atali i se tala a Vai. ‘Ae taunu’u loa Vaitolo e ta’u mai iā Tuimanu’a, ua maliu Tuitoga i le vai.

Ona talitonu lea o Tuimanu’a, e moni ‘ua maliu lava Tuitoga. E mafua mai ai lenei upu: “Aua le tu’u i le tala a le usuga, ‘ae se’i sau Vai”. Fesili loa Tuimanu’a ia Vaitolo: “O le a le mea a Toga o fai, ona fai atu lea o Vaitolo, “o lo’o fetāgisi pea Toga, auē ta ofa ofa e, auē ta mate mate, ua maliu Tuitoga e. Ona fa’apea atu lea o Tuimanu’a iā Vaitolo, “alu ia e fai atu iā Toga, soia le fetāgisi fa’apēnā, ‘ae ia pepese fa’apea. “Tuimanua e, lo’u alii e, Tuimanua e, lo’u alii e”

Ona alu lea o Vaitolo, ua fai atu iā Toga, “soia toe te fetāgisi fa’apēnā, ‘a ia pepese outou fa’apea, “Tuimanua e, lo’u alii e, Tuimanu’a lo’u alii e”. Ua tu’u ai lea e Toga le latou pese, ‘a ‘ua pepese fa’apea, Tuimanua e, lo’u alii e, Tuimanua e, lo’u alii e, ona toe ola ai lea o Tuitoga. O le mea lea ua pepese ai auala o maliu, ua silafia ua toe soifua Tuitoga. Ona maliu ane lea la te feiloa’i ma Tuimanu’a. E tele aso sa fa’atasi ai Tuimanu’a ma Tuitoga ‘i ‘ele’ele o Manu’a.

Ua silia aso o le vaipalolo, ‘a ‘ua o’o atu i masina o le vaito’elau. Ona sauni mai lea o Niu ma lona ‘auva’a mai Toga e sa’ili mai lona tamā o Tuitoga i Samoa e tusa ma le la mavaega sa fai. Ua taunu’u mai i Savai’i, tu’u ai isi tagata o le ‘auva’a e sa’ili ai Tuitoga po ‘o iai, fa’apea fo’i ‘i Upolu ‘ua tu’u ai fo’i isi tagata o le ‘auva’a. Ona o’o mai lea i Tutuila ua tu’u ai isi tagata lava o le ‘auva’a latou te sa’ili ai lava Tuitoga po ‘o fea o maliu ai.

A’o Niu ma Ape ua malaga pea lava i Manu’a i le mea sa autū iai le malaga a Tuitoga. E fia asia mai le mana o Tuimanu’a. Ua taunu’u Niu ma Ape i Ta’u, ua va’ai mai Tuimanu’a ua o atu, ona fesili lea o Tuimanu’a, “po ‘o oulua o se fanau a Tuitoga, ona tali atu lea o tama, “o lea lava, ‘o ma’ua o le fanau a Tuitoga”. Fesili loa Tuimanu’a, “O fea a oulua o iai? “Sa ma malaga mai e sa’ili lo ma’ua tamā. Ona tali atu lea o Tuimanu’a, “Talofa, ua fesilia’i a outou folauga, ua oulua folau mai i le itu alofi, a’o Tuitoga ua folau atu i le itu i tuāfanua, ua taunu’u i Toga. Ae sa ‘ou fa’atali atu e tusa i le fa’aaliga a lo oulua tamā. ‘Afai lua te taunu’u mai, ia oulua nonofo e tautua a’u. Ona nonofo lea o Niu ma Ape ua tautua iā Tuimanu’a.

Ua iloa e Ape ma Niu ua lē toe fo’i mai le va’a o Toga e avatu la’ua. Ona fa’atoga lea o Ape ma Niu iā Tuimanu’a i se mea mo la’ua e nonofo ai. Ae tali Tuimanu’a e fa’apea, ua leai se mea o avanoa i le motu o Ta’ū, ‘ae omai iinā ō i le motu lea e tu mai tai (Olosega) ma fai i le tagata e suafa iā Puletainu’u ua ou auina atu oulua e tou te nonofo ma fai lo outou nu’u. Na malele fo’i Tuimanu’a, ‘ia fai oe Ape ma ali’i auā ‘e te matua, ‘ae fai oe Niu ma failauga, a’o Puletainu’u ia fai ma o oulua matua auā o ia o le tapuafanua.

Ona fa’apēnā lea ona fai, ua si’i ane Ape ma Niu ma feiloa’i ma Puletainu’u ma ta’u iai le poloaiga a Tuimanu’a. Ona fa’atu lea o le nu’u, ma fai atu Puletainu’u, “ia sau oe Ape o le ‘ā ‘e alu i la e te nofo ai ma tali mai ai lau sau ( O le ala ua ta’ua ai le igoa maota a Ape o le “Talisau”), o le ‘a tautua atu le nu’u ia te oe. A’o Niu ma te nonofo i “Fale’ulu” nei oute faufautua ia te ia i tu ma aganu’u o Manu’a. A’o a’u o le a fai ma oulua matua, ae tasi lava le pule i le laueleele na’o a’u auā na ou mua i fanua, ma o lo’u igoa o le a suia i le “Puletasi”.

I se tasi aso sa fagota ai Puletasi i le vainu’u ma vaaia ai se pou o le fale ua tafetafea mai. Sa manatu o ia o se tasi lea o pou o le fale’ula o Tuimanu’a na tafefea solo. Ona toso mai lea e Puletasi le pou i lona paopao ma taula i gatai o le fasi fanua e ta’ua o “Fatualoama” O le tasi aso sa manatu ai Ape, Puletasi ma Niu o le a toe fa’afo’i le pou i Ta’ū. Ona latou nonoa lea o le pou i tafaaga ma toso i Ta’ū. Ina ua taunu’u i Ta’ū sa silafia e Tuimanu’a ma le faletolu o lona ono lea o pou o le fale’ula. Ona fa’apea lea o Tuimanu’a ma le faletolu, o se “Si’itagafitā” lenei ua outou faia. Omai iinā ō ma le igoa “Pouono” ma fa’aigoa ai lo outou nu’u. Ua fa’apēnā ona fai ma ua o’o mai lava i nei aso o iai pea lenei nu’u o Pouono ua avea nei ma pitonu’u i Olosega. O lo ‘o tau’ave pea lenei igoa e latou e suli mai iā Puletasi, Ape ma Niu. Ona o le igoa muamua o le nu’u o “Fale’ulu” ae ua suia i le igoa iā “Pouono” e fa’amanatu ai le ono o pou mai le faleselau o le Tuimanu’a.

Ua usu nei Niu le Toga i Tutuila i le mea e ta’ua o Pioa, i le afafine o Moso o Sinapioa, ona iai lea o:

Paoivaoese
Laiafa

Ona oti lea o Paoivaoese, ua maliu fo’i Niu le Toga, ‘ae sui lona atali’i o Laiafa. Ua mavae Niu Laiafa, ‘ae sui lona atali’i o Asotasi. Ua mavae Niu Asotasi, ae sui lona atali’i o Tautalavaili. O Niu Tautalavaili lea sa usu i Nua i le afafine o Leulua’iali’i le teine e igoa ia Nofo ona maua lea o le tama o Faitala.

Niu Faitala sa usu ia Koke le afafine o Saileafuinu’u i Ofu fa’ae’e le gafa o:

Ta’auau
Laiafa

Ua mavae Niu Faitala, ‘ae sui lona atali’i o Ta’au’au. O Niu Ta’au’au lenei fa’ato’a maua ai le Niuatoa, ma maua ai le to’oto’o o Niu ma lana lauga ua o’o i le fale’ula i Malaetele. O le mea na ala ai ona sa tonu i le faletolu, o le ‘a fa’avaotavai le nu’u o Olosega, talu ai le taua na maliu ai le alo o Tuimanu’a Tauaveave(Tauveve), o le tama e suafa iā Fagava’a. Ua o’o ina manu’a le tama, le alo o Tuimanu’a, ona savali mai lea o Malemo ma Malae iā Niu ma Ape i Pouono. Ia alofagia le gasegase o mālō o Tuiolosega, ina ‘ia fesoasoani atu. Ona talia loa lea, ma ‘ua o loa lea o Niu ma Ape i uta i le mea o iai Tuiolosega. O le Tuiolosega na feagai ai i ia ona po o Tuiolosega Pa’u, a’o Niu Ta’au’au fo’i sa feagai ai i ia aso.

Ona fo’i mai lea o Ta’ū e tusa o le fa’aaliga a Tuimanu’a, “Ia fa’avaotavai le nu’u o Olosega”. O le uiga o le ‘upu fa’avaotavai, ia matuā fasi ‘ia fa’aumatia le nu’u. Ua taunu’u mai loa Ta’ū, ua leai lava se tagata i le ‘a’ai, ua o uma i uta, ona nonofo loa lea o Ta’ū i tai i le ‘a’ai. Ona iloa lea e Tuiolosega Pa’u, ‘e le o se taua e fia tau fa’avave na sau ai le faletolu, a’o le taua ia matuā fa’aumatia tagata uma o iai i le lau’ele’ele. Ona maua lea iai le finagalo o Tuiolosega Pa’u, e lē se taua e fia tau fa’avave na sau ai le faletolu a’o le mea e tatau ona fai ‘ia alu se isi o Malae po ‘o Malemo ‘e ave le taulaga i le faletolu ia oti ai, ‘ae ia ola le nu’u.

Ua faia lenei fa’aaliga iā Malae ma Malemo ‘ae le talia. Ua fai atu Tuiolosega Pa’u, ‘afai ‘ua lē mafai e Malemo ma Malae, ua tatala i so ‘o se isi o le nu’u, e mafai ona alu e ‘ave le taulaga i le faletolu, ‘a ua leai se isi. Ona fai atu lea o Niu ia Tuiolosega Pa’u, āfai ua leai se isi o au to’oto’o po ‘o lou nu’u e mafai ona ‘ave le taulaga e togiola ai lou nu’u, sau inā tapua’i, o le ‘ā ‘ou alu e fai ma togiola o lou nu’u i luma o le faletolu.

Ona sau ai lea o Niu ‘ae toe mulimuli mai ai ma Pasili. Ua omai lea, ua o’o mai i Pouono, o lo ‘o nofoi le faletolu, ona tu ai lea o le lauga a Niu. O le ala o le lauga, o le fa’ato’esega i le faletolu, ona tu ai lea o Tauā ua fa’asa’ai ma ua fai atu iā Niu “Se ‘ua ma’eu lou lē alofa, auā e ui lava ina tau mai nei le faletolu, ua e alu i uta iā Tuiolosega , ‘ae vase lava oe e le faletolu, ‘ae ui i lea, afai ua ‘e sau e togiola le nu’u, “O le ‘a fai ou ‘ai”. E ui i se finagalo o Tuimanu’a ma le faletolu, o le ‘ā fo’i, o le ‘ā ola le nu’u. Ona fai atu lea o Tauā, o le ‘ā nofoi pea le faletolu, a’o le a se’i logo i le afioga Tuimanu’a. Ua alu le savali e logo i le afioga a Tuimanu’a, e tusa i le taua na si’i mai ai le faletolu ma le togiola sa faia e Niu. Ona fa’apea lea o le malelega Tuimanu’a “Ia fai atu i le faletolu, ua lava fa’apea, ia talia ia le taulaga ua faia e Niu, auā ua le o se isi o to’oto’o a Tuiolosega, a’o le alo o Tuitoga. Sa tofia e nonofo ai i le nu’u, ma ia fai atu iai, o lea ua ‘atoa lana lauga i Malaetele, ma o le ‘ā au lona to’oto’o i le fale’ula. Ona fo’i mai lea o le savali mai le afioga a Tuimanu’a.

O Tauā le to’oto’o na savali a’o lo ‘o fa’atali pea le faletolu i Olosega, ona fai atu lea o Tauā iā Niu, “ua fa’afetai tele lava Niu e tusa i lou o’o mai i luma o le faletolu i le ua o’o mai nei le fa’aaliga i le afioga Tuimanu’a e fa’apenei, “o le a Niuatoa oe, ma o le ‘ā au lou to’oto’o i le fale’ula. Ona tu ai lea o Niu, ua fa’afetai i le faletolu i Ta’ū, ‘auā ua lē o’o le taua na si’i mai ai. O le mea lea na maua ai le Niuatoa ma lona to’oto’o. Ona fo’i lea o Niu i uta iā Malemo ma Pasili ma fa’ailoa i le Tuiolosega ma le nu’u o lo ‘o fa’atali pea i uta, ua fai atu Niu iā Tuiolosega “Ua uma le taulaga, ua ola le nu’u i le finagalo o Tuimanu’a ma le faletolu. Ona fa’apea lea o le malelega a Tuiolosega, “ o le lau’ele’ele, o le a pule ai e totogi ai lou toto, a’o Malae ma Malemo, sa ta’ua o a’u to’oto’o, ua leai 'ua uma, na’o ‘oe le to’oto’o e to’atasi. Ona fai atu lea o Niuatoa “ua lelei, ‘ae se’i fa’apea ai fo’i i nei aso, ‘auā sa iai le mea na manatu iai Niuatoa, e musu e fai ma fa’asoa mea ‘ai a le nu’u o Tuiolosega, ‘ae fai pea ana to’oto’o ma fa’asoa mea ‘ai. Ona fai atu lea o Tuiolosega iā Niuatoa, “ma’imau pe ana e mafai ona e toe fa’afo’i maia la’u upu i mea ua tu’uina atu ia te ‘oe. Ona fai atu lea o Niu, ona pau lea o le mea oute le talia o le to’oto’o. Ou te musu ai ona o le fa’asoa mea’ai a lou nu’u. A’o le pule i le lau’ele’ele ua ou talia. Ona malie ai lea o le finagalo o Tuiolosega ma ua toe taofi pea ana to’oto’o o Malae ma Malemo e o’o mai i nei aso e fai ma fa’asoa mea’ai a lona nu’u.

Ona toe fai atu lea o Niu ia Tuiolosega Pa’u, po ‘o le a lona finagalo ia Malemo ma Pasili sa mulimuli atu ia te ia e ave le taulaga i le faletolu, aua ona ‘ou oti ai, ‘e oti ai fo’i la’ua. Ona fai atu lea o Tuiolosega iā Niuatoa, “Faitalia oe pe āfai e te alofa iai i se mea e fai iai mo la’ua. Ona fai atu lea e Niuatoa le tofiga mo la’ua.

Pasili, āfai e malaga Olosega i se nu’u ‘ae talimālō iai, ia alu Pasili e va’ai i mea e loto iai po ‘o se isi fo’i o lona ‘āiga pe āfai e lē ‘o iai o ia. O lana lauga fo’i e tuāfono iai se fono a Tuiolosega ma o lo ‘o faia pea lava e o’o mai i aso nei.

Malemo, āfai e a’e le manū i gataifale, ia fai le ufiufi a Malemo ma la’u i lona ‘āiga. Ua toe taofia le tofiga lea e le atali’i o Ta’au’au e suafa iā Tupua Mataese. O ia lea na toe fa’auma le tofiga a lona tamā iā Malemo e o’o mai i le aso nei. Ua mavae ia aso, a’o lo ‘o ola pea le tamā o le tinā o Niuatoa Ta’au’au i Ofu. O Sai lona igoa, sa iai lava o ia i ia aso i fa’alavelave. Ona aioi atu lea o Sai iā Niuatoa, “ia e alofa ia fa’aui lou igoa i se isi o lou ‘āiga e te malie ai, ae sau e te igoa i lo’u igoa. Afai e ola lau fanau, ia au atu ai lava iinei lau fanau e igoa ai. Ona fa’aigoa lea le tagata e suafa ia Aina iā Niu, ‘ae ua igoa Niuatoa iā Sai.

O le ulua’i Sai lea na nofo i le pule i Olosega. Ua o’o i aso na alu ai le teva’aga i Tutuila, o aso ia sa nofo ai Niuatoa Aina. O Tuiolosega Ino sa feagai ai ma ia aso. Ua maliu Niuatoa Aina ‘ae leai se suli. Ona manatu lea o Sai Niu e fa’aigoa lana fanau. Ua fa’aigoa Taufagu iā Niuatoa e sui ia Aina ‘ae fa’aigoa Liupua iā Sai. Sa la nofo lua. Ona alu lea o Sai Liupua e nofo i Ofu, ae ua nofo nei ia Niuatoa Taufagu i Olosega. Ae le’i igoa matai Mataese. O le uso lea e to’atolu:

Taufagu
Liupua
Mataese
Talava(f)
Taeaga(f)
Saimu’a(f)

PESE:

Amerika Samoa e

Tumau lou fa’avae

Tautuanā ‘o le rosa ne’i te’i ua mamae

E ui lava na faigatā

Ua mamafa le avegā

Oi, oi lau Samoa

Oi, oi lau samoa

Ia manuia, o lou aso fiafia

Tutuila ma Manu’a

Mālō le soifua

Fa’amoemoe ua taunu’u manuia

Fa’afetai i le Atua

Ua fa’ataunu’uina

Oi, ua sisi lau fu’a

Ia manuia, o lou aso fiafia

PUNATALA(REFERENCE)

Siva fa'aleaganu'u & Taualuga by OLOSEGA, Manu'a, at the Amerika Sāmoa Centennial Flag Day Celebrations in 2000. Filmed by : Tuiātaga Fa’afili A.L Fa’afili t/a Video Aau

O SUAFA MATAI I LE AFIO'AGA O OLOSEGA

Tuiolosega

Tuiolosega Pava

Tuiolosega Tamai

Tuiolosega Laititi

Tuiolosega Puka

Tuiolosega Vo’a

Tuiolosega Lagisa

Tuiolosega Silifaiva 1( Ape/Ulufanua)

Tuiolosega Fatuimoana (Taele)

Tuiolosega Ulululu

Tuiolosega Amitoelau

Tuiolosega Letuli

_______________________

Tuiolosega Lua

Tuiolosega Sauā

Tuiolosega Mana

Tuiolosega Pa’u 1

Tuiolosega Taele

Tuiolosega Silifaiva

Tuiolosega Pa’u 2

Tuiolosega Ino (Saiaona’i)

Tuiolosega Matāfaga (Ve’e)

Tuiolosega Mafuainu’u (Ali’itasi)

Tuiolosega Sioeli (Tagaloa)

Tuiolosega Tu’umamao Soso

Tuiolosega (Tupuola) Lealava’a Pa’u

Ape

Ape Letoga

Ape Ti’eti’e (Atafua)

Ape Maina (Atafua)

Ape Mauga

Ape Aivale

Ape Usupo

Ape Poutoa 2

________________

Ape Ulufanua Silifaiva

Ape Uli Letuli

Ape Olo

Pa’u

Pa’u Tagaloa

Pa’u Afoa

Pa’u Tago

Pa’u Matafaga Tupuola Lealava’a

Pa’u Mekiafa Fa’amasani T. Pa’u (Tago)

Tagaloa

Tagaloa Pa’u

Tagaloa Tu’umamao

Tagaloa Lefotu

Tagaloa Suena

Tagaloa Mulinu’u Tuiolosega

Tagaloa Suaesi Tausaga

Niuatoa

Niuatoa Fautu (Puletasi, Tivao)

Niuatoa Leitufia (Puletasi, Tivao)

Niuatoa Aina

Niuatoa Lamatia

Niuatoa Siatau

Niuatoa Ta’aviliga(1881-1930)

Niuatoa Tuluiga Utagamamao

Niuatoa Moreli

Niuatoa Taufagu

Niuatoa Anetere’a Puletasi (Fale’ulu)

Puletasi

Puletasi Puletainu’u

Puletasi Fautu (Tivao, Niuatoa)

Puletasi Leitufia (Tivao, Niuatoa)

Puletasi Filifa’atali (Ulufanua)

Puletasi Anetere’a Tauaefa Ulufanua

Puletasi Tapunia Aisake

Puletasi Fa’atamala

Malemo

Malemo Manuolevasa

Malemo Poto

Malemo Viena 1

Malemo Viena 2

Malemo Tausaga

Malemo Lei'aione

Malemo Mekuli

Malemo Siagiagi(Siagigi)

Malemo Melale

Malemo Aperaamo

Malemo Lafoia Tausaga

Tauimea

Tauimea Fa’atali

Tauimea Matua Laolagi

Tauimea Lei’aione

Tauimea Ioramo

Atafua

Atafua Ti’eti’e

Atafua Maina (Ape)

Atafua Pa’u

Atafua Aivale

Atafua Tuiuta

Atafua Setu’u

Malaepule

Malaepule Tanuivaipou

Malae Misalegalu

Malaepule Levi

Malaepule Leafeafega

Malaepule Fa’aeanu’u

Malaepule (Milo) Elefane Lei’a

Malaepule (Fu’ega) Saite Moliga

Tupa’i

Tupa’i Sikoti

Tupa’i Paleali’i

Tupa’i Alava

Afoa

Afoa (Tagaloa) Pa'u

Afoa Tafeaga

Afoa Kitiona

Afoa Moa

Afoa Falepouono Sivao Ape

Afoa Mata’ese (Mati) Puletasi

Solo’ele’elelefili

Solo’ele’elelefili Eliki Ulberg

Fatualoama

Fatualoama (Logoitu’au) Maniti Fuimaono

Auvasa

Fa’avaenu’u

Lasagai(Matahele)

Ma’aoge

Maugaleo’o

Saveiolomanu

Seugasa

Tiaomanulata

Va’apu’eata

Puletainu’u

Folaugaalefuailagi

Laiafa

Ma’afa’atoga

Seugaali’i

Seugaali’i Pouono Tanu

Taiga

Taifa’ana’e

Taisouaomanu’atele

Taupeau

Tautuaialasa’o(Tautua)

Tautua Segi

Tivao

Tivao Fautu (Puletasi, Niuatoa)

Tivao Leitufia (Puletasi, Niuatoa)

Tivao Fa’aleao

Tivao Feagaiga/Uiese

Tivao Tofiga

Tivao Sio’ea (Tago)

Tivao Timali (Poloai)

Tivao Peneueta

Taua’i

Taua’i Maile

Taua’i Maina

Taua’i Ioapo

Taua’i Koria

Taua’i Ioapo 2

Poloai

Poloai Eseroma

Poloai Galo

Poloai Timali (Tivao)

Viena

Le’au

Le’au Vi’iga

Le’au Si’itupe

Le'au Keresoma Nevile

Tupuola

Tupuola Lealava’a

Leafeafega(Afe)

Afe Setu’u Alefaio

Afe Taisavali Alefaio

Afe Ierome(Jerome)

Afe Pelesasa

Tupolo

Tupolo Fagatia’i

Tupolo Auga

Tupolo Pone

Tupolo Galiti (Pasili, Fu’ega)

Seiuli

Seiuli Auiao Talaifono

Seiuli Tom Talaifono

Mali’o(Malie)

Malie Peniamina P. Apo

Tuiofu

Tuiofu Malala

Letuli

Letuli Ali’iva’a

Letuli Masei

Letuli Meau Vo'a Tuiolosega

Letuli Viliamu

Lepolo

Lepolo Galo

Tupua

Tupua Mativa

Tupua Mataese

Tupua Matāfaga Tupuola (Pa’u)

Tupua Steve Ta’ele

Moa

Moa Filifa’atali Moetului (Puletasi)

Moa Tautala

Moa Vaapulu (Vo’a)

Moa Fatu

Moa Pa’ileulu

Moa Fuanu’u

Tago

Tago Lealava’a

Tago Loe

Tago Mekiafa Fa'amasani T. Pa'u

Seumaala

Seumaala Leitufia/Tevaseu

Seumaala Filifa'atali

Seumaala Fualelei

Seumaala F. Mauga

Fetui

Fetui Matāfaga Pa’ufa’i

Fetui Tosina

Fetui Aperaamo

Fetui Malelega

Fetui Rames Molipe

Leatiota

Leatiota Tauluava’a

Leatiota Talamoa

Leatiota Puipui Leatiota

Lepulu

Lepulu Letomia

Lepulu Filipo

Papalauena(Ena)

Ena Seiuli Iulio Lualemana

Ena Fa’auma

Ena Maloā

Ena Utaga

Ena Petuelu(Lualemana)

Tinoisamoa

Tinoisamoa Autasia Fa’asauga

Milo

Milo Samasoni

Milo Moeniu

Milo Lei’a

Milo Lei’a Elu

Milo Laupepa Papali’i

Silifaiva

Silifaiva Lelauti

Silifaiva Gasese

Silifaiva Ioramo

Silifaiva Tuilape

Silifaiva La'auoleola Misili Faiai

Tiaseu

Vaieliasaili(Vaisaili)

Tulifua

Mauai

Mauai Fa’atali

Faiai

Faiai Filifa’atali (Saoluaga)

Faiai Usoali’i

Faiai Loleni

Saoluaga

Saoluaga Filifa’atali (Faiai)

Saoluaga Livi

Vaipousa

Vaipousa Komiti

La’auoleola

La’auoleola Misili (Silifaiva)

Pasili

Pasili Galiti (Fu’ega)

Muaava

Muaava Togipatauileave

Savei

Paoivaoese

Paoivaoese Amitoelau

Tamai

Tamai Fa’asa

Lualemana

Lualemana Iulio

Lualemana Saleuatogi

Lualemana Matafanua

Lualemana Sofeni

Sea

Sea Nofoaiga

Fa’aea(Fa’aeanu’u)

Fa’aeanu’u Tesio

Fa’aea Fautua

Tiuali’i

Tiuali’i Samoa

Tiuali’i Lale Samoa Viena

Moso

Moso Eseroma

Moso Agaifea

Moso Uini Mapu

Tuaoi

Tuaoi Maene

Tuaoi Luki

Afiile’olo

Afiile’olo Sitivi

Afiile’olo Koli Lokeuaina

Afiile’olo Lafoia Tausaga

To’oto’o

To’oto’o Taniela

To’oto’o Iese

Moegu

Moegu Siagiagi

Moegu Niualava Tagaloa

Moegu Calvin Tagaloa

Tavai

Tavai Ioapo

Vo’a

Vo'a Tofiga

Vo'a Tautala

Vo’a Lamatia

Vo'a Letuli Meau Tuiolosega

Vo’a Fatu Maisa/Fa'asa

Vo’a Va’apulu (Moa)

Vo’a Saiatafu

Vo’a Tato

Ulufanua

Ulufanua (Silifaiva 1)

Ulufanua Filifa’atali Puletasi

Ulufanua Tusitala

Mauga

Mauga Kolone M.

Tautala

Tautala Felafoa’i

Tautala Lemusu

Tilivala

Tilivala Peleti

Tilivala Mausali (Asoau)

Tilivala I’uvale

Tilivala Moana

Mapuatuli

Mapuatuli Tile

Mapuatuli Vailulu

Pava

Pava Tifaga

Pava Amitoelau Tautai

Talia

Talia Eseroma Moa

Talia Puagele

Tausaga

Tausaga Liupua

Tausaga Lutelu

Tausaga Lafoia (Malemo)

Tausaga Niuui

Tausaga Loa Folasa

Fu’ega

Fu’ega Sailinu’u Tausaga

Fu’ega Galiti (Pasili)

Fu’ega Saite Moliga (Malaepule)

Maluomālō

Maluomālō Fa’atagi

Alailepo

Alailepo Taufagu Lualemana

Tau’olo

Tau’olo Toloa’i Seumaala

Tau’olo Taiapisi

Tau’olo Pese

Saiaona’i

Saiaona’i Fa’anoa

Saiaona’i Trevor

Ino

Ino Laisene

Ino Maina

Fiainu

Fiainu Tu’ua’ifuaina

Tuemo

Tuemo Falemalama

Sunu’itao

Sunu’itao Tusi’ese Tupa’i

Sunu’itao Mavaega Ronnie Puletasi Fuimaono

Fale’ulu

Fale’ulu Anetere’a Puletasi (Niuatoa)

Faleseu

Faleseu Faolua Malaepule

Seuifalemua

Seuifalemua Fa’atamala Puletasi

Saoifolau

Saoifolau Popese Malemo

Folauivasaloloa

Folauivasaloloa Misitikeri Elisaia Silifaiva

Niualava

Niualava (Moegu)

O LE ATI TUIOLOSEGA I LUGA I LE OLO

O fa’alupega ia o le nu’u o Tuiolosega i luga i le Olo. E iai fo’i suiga na tutupu ‘ina ‘ua ‘ave ifo le nu’u i lalo i le Olo ma fa’atasi ma le nu’u o Ape ma Niuatoa. O nei suiga fa’ato’ā tusitusia e tagata ina ua taunuu le lotu ma iloa e tagata ona tusitusi o talatu’u.

Fa’asologa o nofo i le Tuiolosega e tusa ma talatu’u o lo ‘o mātele iai tagata o Olosega. E to’atele ua talitonu o le ulua’i Tuiolosega o Pava ina ‘ua fo’i mai le folauga mai le Atu To’elau, pe a ma le vaitausaga e 1550-1560. O le Ati Tuiolosega lenei a’o i luga i le Olo le nu’u.

Tuiolosega Pava

Na usu Tuiolosega Pava iā Sosolo le alo o le toeaina To’elau e igoa iā Tātāau fa’ae’e le gafa o:

Tama’i(m)
Tanuivaipousa(m)
Manuolevasa(m)

O le tama lenei o Tama’i sa nofo i le suafa Tuiolosega. E tusa ai ma talatu’u o le afio’aga, o le Tuiolosega Pava lenei, na tu’u iai e Tuimanu’a tofiga o le nu’u o Olosega. O le nofo lenei na tofia le sa’oaumaga o “Lagisa” ma le sa’oaualuma o “Luanu’u”. O lo ‘o taoto nei o ia i le fanua o Talāmoa i luga i le Olo.

Tuiolosega Tama’i

O le Tuiolosega lenei na usu iā Si’umalae le alo o Palapala fa’ae’e le gafa o le tama o Laitiiti. O lo ‘o taoto fo’i le Tuiolosega lenei i le fanua o Talāmoa i luga i le Olo.

Tuiolosega Laitiiti

O Laitiiti na maua lona igoa ona ua fanau lē au lona tinā. E laitiiti si ona tino ma nai ona pauna. E ui ina laitiiti lona tino, ae o se tama e maluali’i ma le malosi. Na usu Tuiolosega Laitiiti iā Fa’asagi le alo o Va’apulu i Va’aui fa’ae’e le gafa o le tama o Puka. O lo ‘o taoto fo’i Tuiolosega Laitiiti i luga i le Olo.

Tuiolosega Puka

O Puka na maua lona igoa ona o le tama e tino lapo’a. E tino laitiiti lona tamā ‘ae puka ma lapo’a le tama lenei. O le mea lea na maua ai lona igoa tauvala’au o Puka. E tolu usuga a Tuiolosega Puka:

Muamua, na usu Tuiolosega Puka iā Taisea le afafine o le toeaina To’elau o Vo’a Saiatafu fa’ae’e le gafa o le tama o Vo’a. O le tama lenei o Vo’a na soso’o ma Puka i le suafa Tuiolosega.

Lua, na toe usu Tuiolosega Puka iā Lolefua le alo o Niuatoa i Pouono fa’ae’e le gafa o le teine o Leleimalealo(f) ma le tama o Leitufia(m). O le tama lenei o Leitufia na nofo i le suafa Niuatoa, toe nofo i le suafa Puletasi, toe nofo i le suafa Tivao.

Tolu, na toe usu Tuiolosega Puka iā Paenu’usoa le alo o Papalauena(Ena) fa’ae’e le gafa o le teine ua fa’aigoa fo’i iā Paenu’usoa.

O lo ‘o taoto fo’i Tuiolosega Puka i luga i le Olo.

Tuiolosega Vo’a

Na soso’o Tuiolosega Puka ma lona atali’i o Vo’a. Tuiolosega Vo’a na usu iā Vi le alo o Tulifua i Malaetele fa’ae’e le gafa o le tama o Amito’elau ma le tama o Tulifua. O le tama lenei o Amito’elau na nofo i le suafa Tuiolosega, a’o Tulifua sa nofo i le suafa Lefiti.

Tuiolosega Vo’a na toe usu iā Uisa le tama’ita’i To’elau fa’ae’e le gafa o le tama o Lamatia. Sa nofo le tama lenei o Lamatia i le suafa Vo’a. O Vo’a Lamatia lenei na usu iā Nanuola le alo o Niuatoa Leitufia fa’ae’e le gafa o le tama’ita’i o Vaiola/Sa(f), o le teine o Fa’ane’eina(f), o le tama’ita’i o Manogi(f), o le tama’ita’i o Taliolaina/Pua(f) ma le tama e igoa fo’i iā Lamatia, lea sa nofo i le suafa o le Niuatoa.

O Tuiolosega Vo’a lea na feagai ma le susunuina o fale leoleo o le nu’u e Ta’ū. O fale sa fau i le fanua e ta’u o “Mataala” e leoleo ai le nu’u. O lo ‘o taoto fo’i Tuiolosega Vo’a i luga i le Olo.

Tuiolosega Lagisa

O le tama’ita’i lenei o Leleimalealo le alo o Tuiolosega Puka na usuia e Tuitele mai Leone i Tutuila fa’ae’e le gafa o le teine o Lagolau(f) ma le tama o Lagisa(m). Na soso’o Tuiolosega Vo’a ma Lagisa i le suafa Tuiolosega.

O Tuiolosega Lagisa na usu iā Utaifaga e pā e leai se fanau, ‘ae na fa’avaetama mai le afafine o Tagaloa e suafa iā Foaga i le nu’u o Faleasao. Ona sui lea o le igoa o le teine o Foaga, ua fa’aigoa i le igoa Lagituaiva ‘ina ‘ua ‘ave ane le teine i Olosega.

O le tama’ita’i lenei o Lagituaiva na usuia e Ulufanua mai Pouono fa’ae’e le gafa o le tama o Fatuimoana(m), o le tama o Alae(m), o le tama o Tiuali’i(m), o le teine o Fa’ataape(f) ma le teine o Taemanusa(f). Ma o le taimi fo’i lenā sa nofo ai Ulufanua i le suafa Ape i lona ‘āiga i Pouono.

O vaitaimi o Tuiolosega Lagisa na maua ai le suafa o le “Silifaiva” i Olosega e o’o mai i le taimi nei. Na fa’aigoa ai le tane a lona afafine o Lagituaiva. Na maua le igoa ona o le faiva a le tama o Ulufanua na ‘aumoe ai iā Lagituaiva i luga i le Olo. A’o fai le uō a Ulufanua ma Lagituaiva, e aumoe lava Ulufanua i ona faiva, e fagota ma la’u i luga i le Olo. O le tasi aso, ua maoa’e le tele o i’a ma figota o le faiva o le tama o Ulufanua ‘ona ‘ave lea i luga iā Lagituaiva ma lona tamā. Ua va’ai mai Tuiolosega Lagisa, ua fotu atu Ulufanua ma le amoga faiva. Ona fa’apea lea o Tuiolosega, “Se ‘ua ‘ese lava lenei aso i lou faiva, ua sili le faiva lenei i ou faiva uma. Ua ‘ou va’ai atu i figota o le taimasa ma figota o le taisua.” O le ulua’i Silifaiva lenei, o Silifaiva Ulufanua (Ape).

Ina ua mavae Tuiolosega Lagisa, ona potopoto lea o le āiga e saili se agava’a e fa’aauau le suafa Tuiolosega, ma ‘ua tasi uma i le tama’ita’i o Lagituaiva, o le ‘a nofo i le suafa Tuiolosega. ‘Ae fai atu Lagituaiva i lona ‘āiga, ‘ia alolofa le ‘āiga, ‘ia fa’anofo lana tane o Silifaiva Ulufanua (Ape) i le suafa ‘ua afu lana tautua i lona tamā. Ua malilie le ‘āiga ma fai le mea ‘ua loto iai le tama’ita’i o Lagituaiva.

O le taimi lea ua alu ai le tama o Ulufanua i lona āiga i Pouono i lalo o le Olo ‘ua tu’u le suafa Ape ma le Ulufanua i le matua iā Puletasi, ‘ae alu i le āiga o lana ‘avā ma fai lona igoa Silifaiva. Ona fa’anofo lea i le Tuiolosega i le maliliega a le ‘āiga.

Tuiolosega Silifaiva(1)

O le Tuiolosega lenei na usu iā Lagituaiva le alo o Tuiolosega Lagisa fa’ae’e le gafa o le tama o Fatuimoana(m), o le tama o Alae(m), o le tama o Tiuali’i(m), o le teine o Fa’ataape(f) ma le teine o Taemanusa(f).

O le vaitaimi o le Tuiolosega lenei, na mafua ai ona lua vaega o le aiga o Sā Tuiolosegā. O le itū i Lagituaiva ma le itū i Talāmoa po ‘o Ututoa.

O le itū i Lagituaiva o le suafa Tuiolosega, na mafua mai i le afafine o Tuiolosega Lagisa ma lona to’alua o le Toga na nofo iā Puletasi, ina ua fa’anofo i le Tuiolosega. O Tuiolosega Siliaiva ma Lagituaiva sa nonofo lava i le fanua e tā’ua o Lagituaiva i luga i le Olo, o le fanua na tu’u iai e Tuiolosega Lagisa i lona afafine o Lagituaiva. O suli uma mai iā Tuiolosega Silifaiva(1) ma Lagituaiva, ‘o latou ia ua ta’ua o le “Faletama i Lagituaiva”.

O le isi itū o le suafa Tuiolosega, ‘o latou ia ‘ua ta’ua o le “Faletama i Talāmoa po ‘o Ututoa”.

Lagituaiva ma Talamoa o igoa nei o fanua sa nonofo ai le Ati Tuiolosega.

Na soso’o Tuiolosega Silifaiva(1) ma lona atali’i o Fatuimoana i le suafa Tuiolosega.

Tuiolosega Fatuimoana(Taele)

O le masani a le tama lenei, ae le’i nofo i le Tuiolosega, e alu so’o i lalo i le sami e taele ai. O taimi uma e alu ifo ai le tama i lalo o le Olo, e tu’ufesilisili tagata po ‘o fea e alu iai, o lana lava tali, ‘ou te alu e taele. Ua mafua ai lona igoa tauvala’au o Taele.

O le Tuiolosega lenei o Taele Fatuimoana na usu iā Saofa’i i Ofu fa’ae’e le gafa o le tama o Silifaiva(2) ma le tama o Lealava’a(m). O le Tuiolosega lenei na amata ai nofo a le itū i Lagituaiva. O ia fo’i na mafua ai ona si’i ifo ai le nu’u i lalo i le Olo ma tu’ufa’atasi ma le nu’u o Pouono, lona ‘āiga, ua o’o mai i ona po nei. O le Tuiolosega lenei o Taele Fatuimoana na fa’ato’aina le fanua o Lagituaiva i Olosega Tai. Ma ‘o ia fo’i o le Tuiolosega muamua na fai lona tia i Lagituaiva i tai o le Olo.

O LE FALEPOPO I OLOSEGA

O LE AUGA TUIOLOSEGA INA UA TASI LE NU'U

Tuiolosega Ulululu

O le Tuiolosega lenei sa le’i umi lana nofoaiga ona o le afā fulifaō na afaina ai le nu’u. Na usu i le alo o To’omata i Leone e leai se fanau. O le Tuiolosega lenei na soatau i le niu ma maliu ai.

Tuiolosega Silifaiva (2)

O le Tuiolosega lenei sa feagai ma le taunu’u mai o Ioane Viliamu i Manu’a i le 1832. Na usu i le tama’ita’i o Lagi le alo o Foafoa i Ofu fa’ae’e le gafa o:

Pa’u
Saiaona’i
Togia’i
Tauimea
Mele(f)

Na toe usu Tuiolosega Silifaiva (2) iā Tumua’isili le alo o Lolo i Sili e leai se fanau. Na feagai ma Tuimanu’a Tauveve. Tuiolosega ma Tuimanu’a na nonofo i le au uso o Tumua’isili ma Launiu o le fanau teine a Lolo i Sili.

Tuiolosega Silifaiva (2) na fai lana mavaega i lana fanau.

O lona atali’i o Pa’u o lona tofi o Olosega e nofo i le suafa Tuiolosega.
O lona atali’i o Saiaona’i ma Togia’i o le la tofi o le nu’u o Ofu i le aiga o lo la tina o Lagi.
O lona atali’i o Tauimea e nofo i Olosega e tautuaina le nofo a Pa’u
A’o le teine o Mele, e pule ia i so ‘o se mea e maua ai lona nofoaga.

E o’o mai i le aso, o usita’i pea le tama o Togia’i, ma o lo ‘o nofo lava i Ofu e tusa ai ma le mavaega. A’o Saiaona’i ua toe sola i Olosega talu le fia nofo i le Tuiolosega. E alu atu Saiaona’i ia Tuiolosega Pa’u, ‘ae tutuli mai e Tuiolosega Pa’u ia toe fo’i i Ofu e tusa ma le mavaega a lo latou tama. Ae ua le fia alu Saiaona’i, o lea na ia alu ai loa fai lona falelauniu i gatai e latalata i le matāfaga.

Tuiolosega Pa’u

O le Tuiolosega lenei na usu muamua iā Tātāfele le alo o Le’i Isumama i Ofu fa’ae’e le gafa o le tama o:

Manufotumai(m)

Toe usu Tuiolosega Pa’u iā Utaiva’a, le isi afafine o Le’i Isumama i le tama’ita’i o Tauamō le alo o Savei i Olosega fa’ae’e le gafa o:

Vaogatai ( O le tama lea na nofo i le suafa Le’i i Ofu)
Mataomaile
Lelauti/Taele ( O le tama lea na nofo i le suafa Silifaiva i Olosega)
Pa’u ( O le tama lea na nofo i le suafa Tagaloa)
Taeatule(f)

O Tuiolosega Pa’u sa nofolua ma Tuiolosega Amitoelau. O Tuiolosega Pa’u o le faletama mai Lagituaiva a’o Tuiolosega Amitoelau o le faletama mai Ututoa(Talamoa). Na tuli e Tuiolosega Pa’u lona uso o Saiaona’i, ‘ina ia toe fo’i i Ofu e tusa ma le mavaega a le latou tama. Ua musu Saiaona’i e alu i Ofu, ona alu lea ua fai lona falelauniu i gatai. Na savalivali atu Tuiolosega Amitoelau i le matafaga aga’i i le Asaga ma lafo lana tili, e o’o atu i gatai o Lagituaiva o tu mai ai le falelauniu o Saiaona’i. Ua alofa iai Tuiolosega Amitoelau ma ave Saiaona’i la te nonofo i Ututoa(Talamoa). O le ala lea, ua toe o’o mai ai i aso nei, ua toe nonofo suli o Saiaona’i i Ututoa(Talamoa). O Tuiolosega Pa’u o lo ‘o taoto i Ututoa(Talāmoa). Auā o le masani lea i nā aso, a maliu le ali’i o le nu’u, ‘ona ‘ave lea taoto e latalata i le falesā.

Tuiolosega Amitoelau

Tuiolosega Amitoelau ma Tuiolosega Pa’u na feagai ma le fau o le falesa muamua o le nu’u sa tu i gatai o Malemo, i le tausaga e 1835. O le mea na tū ai le falesa, na tū ai faleva’a(tulula) a le nu’u, mulimuli ane ina ua si’i le falesā i gauta.

O Tuiolosega Amitoelau na usu i le tama’ita’i e suafa iā Iloa le alo o Moegu Letuliva’a fa’ae’e le gafa o:

Letuli(m)
Fa’aletusa(f)

Na toe usu iā Taulafoga le alo o Le’i E’e ma Finau le alo o Sotoa fa’ae’e le gafa o:

Amitoelau ( O le tama lenei sa auai i le ā’oga fa’afaifeau i Malua)

Tuiolosega Amitoelau o lo ‘o taoto i le fanua o lona tinā i le āiga o Malemo. O le alo o Tuiolosega Amitoelau ma Taulafoga o se tasi lea o tama e ātoa ai le to’atolu o tama na ave i le kolisi fa’afaifeau i Malua.

O le nofoaiga a Tuiolosega Amitoelau ma Tuiolosega Pa’u na feagai ma le taimi na fa’aliliu ai le Tusi Pa’ia e Misionare George Pratt ma Charles Wilson i le nu’u o Avao i Savaii i le tausaga e 1835. Na feagai fo’i ma le tu’umālō o Malietoa Vainu’upo(Tavita) lea na taliaina le to’ai taunu’u mai le talalelei i eleele o Samoa.

Tuiolosega Tagaloa (Pa’u)

Na usu Tuiolosega Tagaloa i le tama’ita’i o Taliuta le alo o Siaosi(George) ma Togamoevao(f) le alo o Afoa fa’ae’e le gafa o:

Elisaia ( O le tama lea sa avea ma faifeau 1860-1930).
Pa’u ( O le tama lea sa nofo i le suafa Afoa i Olosega)
Lei’aione ( O le tama lea sa nofo i le suafa Tauimea i Olosega)
Repeka(f)
Taeafa(f)

Tuiolosega Letuli

I le 1870, na filifilia ai Letuli e nofo i le Tuiolosega mai le faletama i Ututoa(Talāmoa). Ae toe nonofo le faletama i Lagituaiva ma filifili le tama o Ino i le suafa. Na i’u ai lava ina nofolua le Tuiolosega. E nofo Tuiolosega Letuli i Falesama ma Vaivai ae nofo Tuiolosega Ino i Ututoa.

Na malaga Tuiolosega Ino i Ta’ū ma ‘upuese Tuimanu’a ma le faletolu fa’apea o Tuiolosega Letuli lea e sauni e si’i taua i le faletolu. Na malaga lea o Tuiolosega Letuli ma isi matai o lona āiga i Ta’ū (Malemo, Moso, ma Lualemaga) ma isi e fia ta’u i Ta’ā e pepelo tala ia na latou fa’alogo ai. E taunu’u atu i Ta’ā ‘ae laga ane le faletolu ua fasi. Na maliu ai Tuiolosega Letuli ma ana matai, a’o isi ua sosola i Fitiuta mo se fesoasoani. Na tau le taua a Ta’ū ma Fitiuta ma faia’ina ai Ta’ū. O le taua lea na maua ai le faiā a Fitiuta ma Olosega ona o le fesoasoani o Fitiuta iā Olosega. I le 1911, na alu ai Lepulu ma isi o le āiga ua liu tofaga mai latou nei.

O Tuiolosega Letuli o lo ‘o taoto nei i Ututoa fa’atasi ma isi Tuiolosega. Na usu Tuiolosega Letuli i le tama’ita’i o Logo le alo o Tufele Fauese fa’ae’e le gafa o le tama o:

Ali’iva’a (O le tama lea sa nofo i le suafa Letuli i Olosega)

Tuiolosega Ino Saiaona'i

Ina ua maliu Tuiolosega Letuli, ona nofo lea o Ino i le suafa. Na feagai ma Tuimanu’a Alaalamua ma Tuimanu’a Makerita Young. Na usu ia Malia le alo o Foafoa i Ofu fa’ae’e le gafa o:

Sioeli/Tuumamao ( Sa nofo i le suafa Tagaloa, toe nofo i le suafa Tuiolosega)

Na nofolua Tuiolosega Ino ma Tuiolosega Letuli. E nofo Tuiolosega Letuli i le fanua i Vaivai/Falesama, ‘ae nofo Tuiolosega Ino i Ututoa. Sa le’i nofo fealofani la’ua ona ua ita Tuiolosega Ino ua fa’amalosi e Letuli le nofo i le Tuiolosega.

Tuiolosega Matāfaga (Ve'e)

O Matāfaga o lona tinā o Taeatule le alo o Tuiolosega Pa’u le atali’i o Tuiolosega Silifaiva. O lona tamā o Ve’e mai Fitiuta. Sa nofo muamua Matāfaga i le suafa Ve’e. Ina ua filifili se tasi e nofo i le Tuiolosega, na matele le āiga Sā Tuiolosegā iā Matāfaga. Na tu’u lea o le suafa Ve’e i Fitiuta, ae sau nofo i le Tuiolosega i le 1890, a’o nofo Makerita Young i le Tuimanu’a. E 17 tausaga o lana nofoaiga.

Na feagai ma le tu’uina atu o Manu’atele i le mālō o meleke. Na ia sainia le feagaiga a Manu’a ma Amerika i le 1904. Na feagai o ia ma fonotaga a le itūmālō na faia i Olosega e uiga i le matā’upu o le “Ipu a Tuimanu’a”. Na maliu o ia i le nu’u o Pavaiai i le āiga o lona faletua mulimuli i lana usuga, i le tama’ita’i o Vaelagi le alo o Tuana’itau i Pavaiai, ma aumaia lona tino maliu i le manuao i Olosega. Na tali toga o lona lagi i to’oto’o sa iai i lea aso. O to’oto’o sa tali toga o:

(Malemo, Malaepule, Niuatoa, Lepulu, Velega ma Ve’e)

Na usu muamua iā Lemaui’u i Fitiuta fa’ae’e le gafa o:

Pa’ufa’i/Matāfaga ( O le tama lea sa nofo i le suafa Fetui)

Na toe usu ia Fa’amu i Aga’e fa’ae’e le gafa o:

Aimalefoa
Manu’a
Misalegalu
Nerisa
Pele
Pu’e

Na toe usu ia Leleaga le teine o le āiga o Galea’i i Fitiuta fa’ae’e le gafa o:

Atoe
Mika ( O le tama lea sa nofo i le suafa Sega)

Na toe usu ia Sapia’i le alo o Vo’a Tautala i Olosega fa’ae’e le gafa o:

Lealava’a ( O le tama lea sa nofo i le suafa Pa’u i Olosega)
Gasese ( O le tama lea sa nofo i le suafa Silifaiva i Olosega)
Leaia(f)
Tautinei(f)

Toe usu mulimuli i le tama’ita’i o Vaelagi le alo o Tuana’itai i Pavaiai fa’ae’e le gafa e pā. E leai se fanau.

Tuiolosega Mafuainu'u (Ali'itasi)

Tuiolosega (Tagaloa) Sioeli

Tuiolosega Soso Tu'umamao

Tuiolosega (Tupuola) Lealava'a Pa'u

FA'AMANUSINA I SE MALIU I TOTONU O LE NU'U O OLOSEGA

A maliu se matai i Olosega, e leai ni auala e faia. Ae fai le usu a le nu’u i le maliu. E leai se matai ese ‘e mafai ona ‘auai i le usu. Afai e si’i atu le itūmālō pe iai fo’i ni mālō mai Tutuila, Upolu ma Savaii, e iai le fale e fai ai le latou tapuaiga. Ae lē mafai ona soli le usu a le nu’u.

Afai o le a ‘āoa le lagi iā Tuiolosega, e tasi le ali’i o le nu’u e fa’amanusina na’o Ape. E lē fa’amanusina se usoali’i po ‘o se nofoao auā o latou o le nu’u o Tuiolosega. Afai fo’i e tu’umālō Ape, ua na’o Tuiolosega lava e fa’amanusina pei o le maliu o Ape Poutoa sa fa’atino ai lea tu ma le aga i Olosega lava. Afai e maliu se usoali’i po ‘o se nofoao, ua na’o Ape e fa’amanusina.

Ae afai ua usufono se to’oto’o, ua na’o Tuiolosega e fa’amanusina. Afai e fa’amanusina Tuiolosega, e tatala lafo o Niuatoa, Malaepule ma Malemo. E tatala fo’i lafo o to’oto’o pe a fa’amanusina le Toga iā Ape.

VATAU A OLOSEGA MA TA’Ū

Talu lava na toe fo’i atu Olosega i Manu’a, e lē uma lava le vātau ma Ta’ū. E mamafa pea i tagata Ta’ū le manatu o Olosega na fa’atafea ona o le ‘ana’ana ma le fa’atui’ese i le pule a Tuimanu’a. Ae lē tioa fo’i Ta’ū i amio lē pulea ma le tau ‘ana’ana o tagata Olosega auā ua fefiloi ma amio fa’a-to’elau.

TAUA I LE VAINU’U

O le tasi aso, ua alu ai le paopao o taule’ale’a a le nu’u o Olosega i Ta’ū ma fa’aāvaga nanā mai se tama’ita’i talavou i Ta’ū. Ona fa’avatau ai lea o ia nu’u e lua. Afai e alu se tagata i tai e fagota i le vainu’u, ua na’o lona paopao ua tafetafea, ‘a ua leai se isi ua uma ona fasioti e tagata o le tasi nu’u. Ua fai fai pea nei amioga ua i’u ina to’atele tagata Ta’ū ua feoti. Ona si’i taua mai lea o Ta’ū iā Olosega. Ua latou tuta i “Oge” ma taumafai e sopo i luga i le Olo. O le “Mataala” o le fanua lenā sa fa’atū ai fale leoleo a Olosega. O le ‘upu “Mataala”, o lona uiga, ‘ia ala mata i taimi uma mo le leoleoga. E taunu’u atu le ‘autau a Ta’ū i le fanua i Mataala, ua momoe le ‘au leoleo ma a latou ta’ifau. Ona susunu lea e Ta’ū fale leoleo, ae sosola i Ta’ū. Ua manatu tagata Olosega, o le mana o Tuimanu’a ua fa’amomoe ai latou ma latou ta’ifau. O le taua lea ua maua ai le gao(faifai) o le nu’u o Olosega e fa’apea: “O Olosega ulu mu, na susunu e Ta’ū.”

TAUA I TUAOGE

Ua uma atu lenei taua. Ae toe tupu fo’i le isi taua. O le taua lenei na tupu i “Tuaoge” ina ua afe ane le va’a o Mauga ma lona atali’i o Asotau i uta i Oge. O Mauga ma lona atali’i na fagogota i le vainu’u. A’o le ‘autau a Olosega o lo ‘o lalafi atu ma fa’atalitali pe afe mai i uta le la va’a. Ua fia inu tele le ali’i ma lona atali’i, na mafua ai ona afe i uta le va’a e fia toli se la niu. E ofi atu i uta ‘ae laga mai tagata Olosega ua fai le taua ma fasioti ai le tama o Asotau, a’o lona tamā ua manu’a leaga. Ona o le vave atu iai o le toeaina o Taiga ma lana fanau, ua laveaina ai Mauga. Ua ave a Taiga i lona āiga i Oge ma tausi ai. Ua o’o ina malosi Mauga, ona ō lea o Taiga ma lana fanau o Tagamanu ma Va’apu’eata ua momoli le ali’i i Faleasao. Na māvae iai e Mauga le matūpalapala iā Taiga ma lana fanau ona o le lavea’ina ‘o ia.

TAUA I MATAALA

Sa faifai pea le vatau o Ta’ū ma Olosega. Na malōlō i ni nai tausaga ma toe fai fo’i. E mafua lenei taua ona ‘o le fa’aseā lava o le faletolu i le fa’atui’ese pea o Olosega i le pule a Tuimanu’a. O le taua lenei na manu’a ai le atali’i o Tuimanu’a i Olosega. E feā’ei atu le ‘autau a Ta’ū i luga i le fanua o “Mataala”, ‘ae fa’asaga le nu’u o Olosega ua tafuli ifo ma’a tetele ina ia solo eleele ai le fili ma lavevea ai Ta’ū.

E to’alua tagata Ta’ū sa manu’a leaga ai i le taua lenei, o le alo o Tuimanu’a ma le tagata e igoa iā Tivao. Ua toe fo’i Ta’ū ma le feitai o loto, ‘ae maua atu e tagata Olosega le tagata e igoa iā Tivao i “Tuaoge”, o le ‘a fa’asaga Olosega e fa’atama’ia, ae lavea’i loa e le toeaina o Puletasi, ‘ina ‘ua fai a’e o ia e sau mai “Aualuma”, auā o le tamā fo’i o Puletasi e sau mai Aualuma. Ona ‘ave lea e Puletasi ma tausi iā Tivao. Ua ave iai e Puletasi lona fanua o “Gapu’a” e nofo ai Tivao.

Ua tu’uloto e Ta’ū le manu’aaga o le alo o Tuimanu’a, ma ua fuafua le isi osofa’iga iā Olosega. O le taimi lea ua logo mai ‘e le faletolu ia Tuiolosega ma lona nu’u, o le ‘a si’i ane le faletolu ‘ātoa e fa’atagatavaleina le nu’u ‘atoa o Olosega. O le vaitaimi fo’i lea o le to’atele o le nu’u ua si’i ifo i lalo o le Olo. Ina ‘ua mautala Olosega e tusa ma le masi’i mai a le faletolu, ona toe si’i fo’i lea o le nu’u i luga i le Olo. Ua fai le fono a Tuiolosega ma lona nu’u. Ua manatu Tuiolosega, o se fa’alavelave tele le mea o le ‘a o’o iai, ‘auā o le fa’atagatavaleina o tagata uma, lafu pua’a, lafu manu, atoa ma fa’ato’aga o le ‘a fa’aleagaina uma.

Ua lē mautonu le nu’u po ‘o le a le mea o le ‘a fai. Ona alu ifo lea o le savali iā Pouono se’i fesoasoani atu. Ua ō iai Ape, Puletasi ma Niuatoa. O le fautuaga a le nu’u o Pouono, ‘ia fai se fa’aleleiga ma le faletolu. Ua leai se isi e ofo e alu e ‘ave le finagalo o Tuiolosega i le faletolu. Ona ofo lea o Niu Leitufia (sa nofo fo’i i le suafa Puletasi ma le Tivao). O se si’itagafitā lea ‘auā e lamatia ai le ola pe ‘a lē tafa le finagalo o Tuimanu’a ma le faletolu. Atonu na manatu Leitufia, ‘o ia o le alo o Tuiolosega ma ‘ua faigofie ai ia te ia ona alu ‘e ‘ave le finagalo o le nu’u.

IFOGA A OLOSEGA MA LE MATUPALAPALA O NIU

Ua taunu’u le itūtaua a le faletolu i talafatai o Olosega. Fai mai le tala pe a ma le selau paopao na o ane ai latou. Ua nonofo i le fanua o lo ‘o tu ai nei le fale o Seiuli ma to ai latou falelauniu, e sauni ai le latou osofa’iga i luga i le Olo. Ua maua ai ma le igoa o lea fanua o “Falelauniu po ‘o Faleniu” ma le igoa maota a Seiuli ma Mauai o “Faleniu” e o’o mai i aso nei. Ona sau lea o Niu i le mea o iai le faletolu, ae mulimuli mai ai le taule’ale’a e igoa iā Pasili.

Sa lauga Niu i le faletolu ma le agaga fa’amaulalo. O le lauga a Niu e iai le solo lenei, ua ta’ua o le lauga o le ifoga a Olosega:

Usu pepe i le tausuni

Ae usu lupe i le mafua

Utufia le vai o Suasua

Na utuvai ai Utulafalafa

E utuvai ma ona loimata

E tau po iai tagata

E te afio mai i faleniu na, ma e to’a i epā

Ae ou te fa’asau atu i fafo nei

O mata o to’ilalo a fasia nei.

Tuimanua e, lo’u alii e

To maia lau pule ia lelei

Ia ola le nu’u nei

Ua talia e Tuimanu’a ma le faletolu. Ona fa’apea lea o Tuimanu’a, “Niu, ua ‘atoa lau lauga i Malaetele. O lou to’oto’o ma lou fue, ua ‘atoa fo’i lau lauga i Talāmoa. O le mea lea, ua maua ai le fa’aopoopoga i le suafa Niu i le “Niuatoa” ma lona tofiga o le to’oto’o, ona o lana tautua matavela iā Tuiolosega ma le nu’u.

Na fo’i Niuatoa ma Pasili i le Olo ma ave ane le nu’u i lalo e fai le fa’aleleiga ma le faletolu. Ua o ifo i lalo Tuiolosega ma le nu’u ma le fafaga tele mo Tuimanu’a ma le faletolu. Ona fa’apea lea o Tuimanu’a iā Tuiolosega, “O le a fo’i le faletolu, ‘ae soia le toe lu’itau mai, ae fai mai la outou tautua i le Tuimanu’a, ia la’u atu le i’ato pe a a’e i ou gataifale. A’o tala i le ifoga na si’i mai e Niu, o lea ua talia. Ua atoa le lauga a Niu i Malaetele, o le to’oto’o au.” O le ala lea ua iai le pou o Niuatoa i Talāmoa.

O LE TAUA I TALAFATAI

E le mamao tele i tua le taua lenei na masi’i mai ai le faletolu, ‘ae taunu’u loa le lotu i le 1832 i Manu’a. Pau lea o le taua na tau i talafatai ‘ina ua si’i ifo le nu’u i lalo o le Olo. Pe a ma le va o le 1795-1800. Ua lē toe iai se vatau mai le taimi lea se’ia o’o mai i le tausaga e 1832. Ua maliu atu le Tuimanu’a sa feagai ma le ifoga a Olosega, ae nofo mai le isi Tuimanu’a. Ua uma atu fo’i le Tuiolosega ma Niuatoa. Ae ua toe amata fo’i ona vatau Ta’ū ma Olosega. E taunu’u atu Ioane Viliamu ia Oketopa i le tausaga e 1832 o lo ‘o vatau pea. E tusa ai ma le ripoti a Ioane Viliamu e 35 le ‘autau a Ta’ū ua fasiotia i le taua, ua matuā fa’ato’ilalo ai e Olosega le itūtaua a Ta’ū. Ua ripotia mai fo’i e Viliamu e fa’apea o se fafine Olosega na ia ‘avea le ulu o le tamāloa Ta’ū na fasiotia lona tamā ma susunu i le afi. O le taua lenei na faia ua nonofo le nu’u i tai. Ua tu’umuli le fuapaopao o Ta’ū, a’o le to’atele o le nu’u o Olosega ua toe fo’i i luga i le Olo aua ua manatu e toe sau fo’i se osofa’iga a Ta’ū.

LE AFIOGA I LE TUIOLOSEGA TAGALOA PA'U

VATAU A OLOSEGA MA OFU

O LE TAUA NA TAU I OFU

Talu mai le toe fo’i atu o Olosega mai le folauga, e lu’i pea e Ta’ū ma Ofu. O isi taua e ‘au to’alua Ta’ū ma Ofu. O le ulua’i taua ma Ofu na mafua ona o le fa’amaualuluga o Ofu. Fa’apei o Ta’ū, na tu’uloto e Ofu le amio a Olosega o le lu’i i le pule a Tuimanu’a. Ua lē lava le onosa’i a Olosega i le tau lu’ilu’i o tagata Ofu pe ‘ā o ane tagata Olosega e fagogota i “Toaga” ma “Tuāfanua” i Ofu.

O le tasi aso, ua alu le logo i Ofu o le a si’i taua atu Olosega. O le ali’i o Ofu o Tuiofu, o se tagata malosi ma le toa. Ae na faia’ina lava lona nu’u i le taua ma Olosega ona o le to’atele ma le malolosi o toa o Olosega.

Ona fa’apea lea o Tuiofu i lona nu’u, “Omai o le ‘a sauni e tau le taua, ‘ae pau le mea e to’atele atu Olosega i lo tatou nu’u, ‘ia alu se savali i le faletolu(Ta’u) e fesoasoani mai”. Ua alu le savali i Ta’ū ma talia e Ta’ū. Ua si’i ane le faletolu. Ua tu’u malie le taua ae leai se isi na faia’ina. Ona fa’apea lea o le faletolu i le nu’u o Ofu, “Afai e toe si’i taua mai Olosega, ‘aua ne’i toe alu atu se savali i le faletolu, auā e lē toe fo’isia mai le faletolu ae faitalia outou ma Olosega.”

Ua toe logo ifo iā Ofu, o le ‘a toe si’i taua ane Olosega. Ona toe auina fo’i lea e Tuiofu le savali i le faletolu ia fesoasoani mai. E alu atu le savali, ae tali mai le faletolu, “Sau ia, ‘ua uma atu le ‘upu a le faletolu, ‘oute lē toe fo’isia atu i lou lau’ele’ele.” Ua fo’i le savali ma ta’u iā Tuiofu le tali a le faletolu. Ona fa’apea lea o Tuiofu i lona nu’u, “Afai ua lē talia e le faletolu le savali, ‘ae a si’i mai Olosega, o le ‘a tu’u le Tuiofu, ‘ae ou te igoa ia “Fo’isia” oute tau ai.”

Ua si’i ifo Olosega ma tau le taua ua tuli solo Ofu e Olosega, toe tau le taua, o le mea lava e tasi. Ua iloa e Tuiofu(Fo’isia) o le ‘a to’ilalo lona nu’u, ona oso ai lea i le sami ma ‘aau i le nu’u tu mai i tai. Ua maliu fa’atupu ma’a ai ina ia iloa uma e tagata, o ia o se toa e maliu fa’atu, ae le maliu taoto auā e musu ‘ia manu’a ia i lima o Olosega. E o’o mai lava i aso nei o lo ‘o vaaia pea le fa’atu ma’a o Fo’isia i le tama’i motu i gatai o Ofu. O le motu o Fo’isia.

TAUA I TOAGA MA TUAFANUA NA TAU AI OLOSEGA

I aso anamua, e tolu nu’u sa fa’atū i le motu o Ofu.

O le nu’u o Tuiofu na fa’atū i “Toaga”. E amata mai le fanua o lo ‘o tu ai nei le malae va’alele e o’o i le “Asaga”.

O le nu’u o Asiolefolasa na fa’atu i le mea lea ua iai nei le nu’u o Ofu.
A’o “Tuafanua” o le nu’u o Siva ma Mao

E tutupu so’o misa ma taua i le va o le nu’u o Tuiofu ma le nu’u o Siva ma Mao. Ina ua si’i taua Tuiofu ma lona nu’u i Tuafanua, na muamua alu lana savali ia Tuiolosega se’i fesoasoani atu ia te ia ma lona nu’u. Ona talia lea e Tuiolosega, ma ua ‘auina mai ni toa mai Olosega e tali le savali a Tuiofu. Ua tau le taua, o le maua lava e Olosega lea tagata o Tuafanua ma tipi ‘ese le ulu ma ‘aumai tanu i le fanua ua ta’ua nei o “Muliulu”. O le mafua’aga lea o le igoa o lea fanua. Ina ua a’e le taua, ua manumalo Tuiofu. Ona fa’apea lea o Tuiofu, “O le fanua e amata mai i le Asaga Tai e o’o mai i Muliulu, o le totogi lenā o Tuiolosega ma ona tagata mo le latou fesoasoani mai.” O le mea lea ua maua ai e Tuiolosega ma lona aiga le lau’ele’ele lea i Asaga Tai e o’o i Muliulu. E o’o mai i aso nei o lo ‘o iai pea i le āiga Sā Tuiolosegā lea lau’ele’ele.

O LE IGOA MANAIA MA LE TAUPOU

SELUTOGA MA TAAPE

O Selutoga ma le Faataape(Taape) o mea totino ia o le nu’u o Pouno. Na fa’apea le upu a Tuiolosega i lona āiga i Pouono: “Malilie ia, ‘ae ‘aumai le Selutoga ma le Taape se’i tiu ai le nu’u auā ua ali’ita’i tasi le nu’u iā te a’u.” Na manatu Tuiolosega ia ‘aua ne’i fa’aluaina le manaia ma le taupou. Ae le gata i lea, na manatu le ali’i, ia fa’aaogā mea totino a lona āiga, ‘ia iloa ai lona so’otaga i Pouono. Amata mai i lea taimi, ‘o ‘augā nofo a Tuiolosega i Lagituaiva ua latou fa’aaogā pea ia measina e o’o mai i aso nei.

LE AFIOGA IA TA'APE REPEKA MALEMO TUIOLOSEGA VIENA

FAIGA O LE 'AVA O LE AOFIA MA LE ATOA A LE NU'U O OLOSEGA

O le matāfaioi a le aumaaga, o le tapenaina o le ‘ava. I aso anamua na mamaina le ‘ava e taule’ale’a. O le ‘upu taule’ale’a e sau mai le ‘upu le’ale’a, o le isi ona igoa o le “Le’a”. Ina ua fa’aaogā ma’a e tu’i ai le ‘ava, ona maua lea o le ‘upu “aumaaga”. E mafua mai le ‘upu i le ‘au ma le maga. O le ‘au o le ma’a laitiiti e tu’i ai le ‘ava, a’o le maga o le ma’a tele lea e tu’u ai le ‘ava i luga ‘ae tu’itu’i fa’amalū.

O aso nei ua le toe mamaina i gutu le ‘ava, ‘ae ua fa’aaogā ma’a tu’i ‘ava. E iai lava le ma’a tu’i ‘ava a le nu’u e teu lelei e le aumaaga. A le o lea, ua fa’aaogā pepa ‘ava ua maua mai i fale’oloa i nei aso.

Afai o le a tali ni mālō a le nu’u, ona usu mai lea o le matai ma le “Ava Le’a”. O le ali’i sili na te usu mai ma le “Ava Fa’alafi”. O le tulafale na te usu mai ma le “Ava Fa’atōfala’i”. A’o isi ali’i, e latou te aumaia “Ava Moena’i”. So ‘o se matai fa’avaipou e sau ma u’u mai le “Ava Teuteu”.

O le sauniga o le ‘ava e mana’omia mea nei:

Tanoa ‘ava, fau, vaitaulua(tauluavai) ma le ipu. So ‘o se matai tū e iai Tuiolosega, Ape, to’oto’o, nofoao ma ali’i o le usoali’i e tatau ona iai mea uma nei i lona fale. Ona avatu lea o le ‘ava ‘ua uma ona tu’i po ‘o se ‘ava mai le fale’oloa ua tu’u i totonu o le tānoa. O le palu ‘ava na te faia le tatauina(tatauga) po ‘o paluina(paluga) o le ‘ava.

E tolu vaega o le tatauina(tatauga) o le ‘ava:

Vau
Fa’apulou
Ao

Vau, fa’apulou ma ao penu ‘ava ia mae’a. Afai ua ‘uma ona vau fa’asefulu ona si’i lea i luga o le fau e fa’afeagai ma le fatafata o le tau ‘ava. Ona togi lea o le fau i tua i le ta fau na te ta ‘ese ina le penu ‘ava. Ona toe fa’afo’i mai lea o le fau i le tau ‘ava ma toe tatau le ‘ava. E fa’atolu ona ta ‘ese le penu ‘ava. Afai ua mae’a le tatauina(tatau), ona solo fa’ata’amilo lea o ‘augutu o le tanoa ‘ava ma togi le fau i le ta fau e safu ‘ese le penu. A o’o ina ua usi le alofi, ona ta’u lea i le tufa ‘ava ‘ua usi le alofi.

I le afio’aga o Olosega, o le matāfaioi a le usoali’i e tufa ina le ‘ava. E feaua’i iai latou, ‘ae pule le usoali’i pe togi tufa i se isi matai mo ia.

E le agaia le tānoa pe ‘a tatau le ‘ava. E mafua ona o le ulua’i ‘ava na fai i Sāua e Tagaloaui ma Pava sa le’i iai se isi e agaia lo la alofi.

E fa ala o le ipu ‘ava pe a tautū:

Muamua, o le igoa ipu: U’u lima lua i luga a’e o le ulu.

Fa’ata’ita’iga:

O le igoa ipu a Tuiolosega: “Mālō ua maua, ‘aumaia matua i nu’u lelei”

O le igoa ipu a Ape: “Folau i Vasaloloa, ‘aumaia fia fai āiga iā Samoa”

Lua, o le ‘ava e fa’atoso le alaga. U’u lima tasi ma tu’u aga’i i luga o le tau’au agavale, a o’o i le tagata, tu’u loa i le agavale ‘ae velo i le tagata, ia fa’afeagai ma le fusi pa’u.

Tolu, o le taumafa. U’u lima lua, feagai ma le muāulu, palasi feagai ma le fusipa’u, tu’u ai i le tagata.

Fa, o le ‘ava e alaga fa’amotu. E ta’ita’i fa’aipu vai.

Afai o se mālō ua taunu’u, ona ‘amata loa ona tautalagia le ‘ava. A tautalagia le ‘ava, e iai le fa’asologa e masani ai le nu’u:

1. Ao le Ava Usu:

O se tulafale fa’avaipou na te ao ina le ‘ava o le usu a le nu’u. O le malaga e nonofo i le tasi itu o le tala o le maota(faletalimālō/faletele), a’o le usu a le nu’u e nonofo i le isi itu o le tala o le fale.

Afai o a’u lea o le a ao ‘ava, ona fai lea o ni ‘upu pei o ‘upu nei:

“Mapu ane ia i le sao, ‘ae a’e i le ulafala pa’ia maualuga o le tatou taeao. Auā ua ali’itia fanua. Ua aloa le vao. Ua mapu’epu’e le lau’ele’ele. Ua tagi le manu lagi, ae olo malie le lupe. Ia e’eta’i maia i le tulu’ipae o le tapuaiga, le paia maualuga o le faigamalaga, ‘ae se’i o’u seu i l ofeloa ma tapa tulia i le tatā i se ‘ava e agatonu ai lou afio mai. Tula’i mai se soli tamali’i. Aumaia se ‘ava teuteu a le lautinalaulelei. Aumaia se ava moena’i a tapa’au. Aumaia se ava fa’atofala’i a to’oto’o. Amia le ava fa’alafi, le ava o le ipu a le malelega a Tuiolosega.

2. Fa’afitiga o le Ava:

Toso loa le fala ‘ava i luma o le malaga pe ‘afai e le pulea fa’afale’ula le ‘ava. Ona fa’apea lea o se ‘upu a le ao ‘ava:

“Tau ia ina o’o atu se ata iti i oulua luma i le afio mai ai le malelega a Tuiolosega ma tapa’au ia, ‘ae umia mai e to’oto’o ia. Fa’atofa malie, ‘ae ia fa’autaga le ‘avea. Ua oulua le silasila i fafo. Na ou asia le ‘ava nai Logopapa ua gase. Ua na’o na naunau fa’alupe o naumati ua leai se ‘ava ati aua le paia o fetu o le lagi. Fa’atofa malie le finagalo, ‘ae alo ia i lau fa’asoa.”

3. Folafola ma Pulea le Ava:

E toso mai le fala ‘ava ona po loa lea o le fala e le matai o le malaga ma fa’apea, “Ava!!! O le galuega muamua e fai, ‘ia liliu le fala, ‘ia ui ulu o ‘ava i le nu’u, ‘ae ui i’u o ‘ava i le malaga. Ona folafola loa lea. O le folafola ‘ava na te le sufia paia o le feiloa’iga ma le taeao, na te le sufia fo’i le alofa o le Atua. Na te le ‘a’apa i le autu ma le faia o le malaga, ‘ae na’o upu lava i ‘ava e tautala ai.

Fa’ata’ita’iga Muamua:

Ava!!!! Ua pau le tuāvao, ae liligo le tuāau mafua. O lo ‘o ua tatala vaiola, ae tapunia vaieli i lo tatou taeao fesilafa’i. O le ‘ava sa leoleosa’i i le maota ma le lao’ai o le aiga Sā Tagaloa. O le ‘ava e taufe’ai ona ata ma ona lau sa taufetuli iai Telemū ma Teleaai e ati mai. O le ‘ava o ipu ma ‘ava fa’atofala’i, ‘ava moena’i ma ‘ava teuteu lelei. A aofa’i le luma’ava, ua iai ‘ava e ___.(E fua lava i le va’ai a le pule’ava). Ua lava ma totoe aua le pule ia i la’ua to’oto’o. Te’a le tugase lea i le inati o le tanoa e agatonu ai lo tatou taeao. Te’a le “Latasi” lea i le ipu a le malelega a Tuiolosega. Te’a le “Ava” lea i le Toga iā Ape. O ava o totoe, o le a manoa i luma/tua nei.

Fa’ata’ita’iga Lua:

Ava!!!! O ‘upu i ‘ava. O le ‘ava sa tu i Logopapa. O le ‘ava sa toto e Pava ae velevele e Ui ma Luama’a. O le ‘ava na taufetuli iai aitu o Manu’a e ati mai. Na ati i le tafa o ata ona o le filisama. Ava sa tōfā i maota ae moena’i i laoa. Ava sa fa’anānāsua auā le mālō o le Atua ma mālō fegāsoloa’i. Ava ua ali’itaeao mai ai le malelega a Tuiolosega, Ape ma tapa’au ia. Ava na usuālele mai ai to’oto’o ma la’ua le Olosega. A faitau le luma’ava, ua iai le “Latasi”, ua iai le “Lupesina”, O le “Vaitinasā” ma “Tugase” ua lelei ona teuteuina. Ua lava ma totoe, ma o le ‘a fai iai la’u pule.

SELUTOGA MA LE AUMAAGA I OLOSEGA

TU LAU'ELE'ELE LE TALALELEI I LE MOTU O MANU'A

O MEA NA TUTUPU MAI 1800-1900 (O LE MOTU MAI 1800-1900)

FA’AMAUTŪ LE NOFOAGA I LALO O LE OLO

Ua mautū le nu’u i le nofoaga fou i talafātai i lalo o le Olo. Ua mautū fo’i le tu’ufa’atasiga po ‘o le fa’aofi o le nu’u o Pouno i Talāmoa. Pau o le mea ua toe lagalaga mai fo’i e Ta’ū le taua. E lē uma lava le ita o Ta’ū i amio lē pulea a Olosega i le pule a Tuimanu’a. Ua toe amata fo’i ona lamatia ola o tagata Olosega pe ‘ā fagogota i le vainu’u. E o’o mai i le 1830, ua fa’ateteleina le vatau se’ia o’o i le 1832 na taunu’u ai le va’alotu o Ioane Viliamu i Manu’a. O le tele o mea na tutupu i le va lea mai le 1800 i le 1900, o mea tau i le fa’atūina o le lotu i le nu’u.

A’o le’i taunu’u Ioane Viliamu i Manu’a ia Oketopa, 1832, na maua e Olosega se tala ‘ese mai Ta’ū e uiga i ni tagata Rarotoga ma latou tala’iga e uiga i se Atua ese mai iā Tagaloalagi. Na taunu’u ane ia tagata Rarotoga i le 1828 ma nonofo ai e o’o i le 1829, na toe malaga ese atu, vaganā ai le to’alima o latou na maua atu e Ioane Viliamu i le 1832 o iai pea i Ta’ū. O nei tagata ina ‘ua feiloa’i ma Viliamu na ta’ua latou o “Atali’i o le ‘Upu”. Auā ua latou fa’asalalauina le ‘Upu a le Atua.

O le to’alima(5) lea o:

Hura ma lona to’alua
Paraifea
Patia Haavalua
Teurakau

Fai mai le tala o se vaega mai le motu o Raivavae ua afea Ta’ū ma tala’i le Atua e silisili ese i atua uma o le lalolagi. Ina ua latou feiloa’i ma Viliamu, sa fa’amatala iā Viliamu le mafua’aga ua latou iai i Manu’a. Fai mai latou, sa latou iai i le motu o Tubai. Ina ua toe fo’i latou i Raivavae, ua lelea le latou va’a i le malosi o le matagi i le tolu masina. E to’aluasefulu(20) ua maliliu ai. Ua mavae ni aso, ua tafea le latou va’a i se tasi motu tu’ufua pe a ma le 70 maila i Sasa’e o Samoa. Sa latou ola i popo ma i’a a’o iai i lea motu. Se tasi aso, ua afe atu se tasi va’a i le motu ma aumai ai latou i Manu’a, lea sa nonofo ai mo le tolu masina.

Fai mai sa tu’utaula le va’a i gatai o “Tafagafaga” i Ta’ū ma o ane i uta i ni paopao na ō atu e fa’afetaui latou. Sa talileleia latou e Tuimanu’a ma lona nu’u. O le ‘upu a Tuimanu’a iā Viliamu, “Ua talia e Tuimanu’a ma le nu’u Iesū ona o ē na muamua mai.” Ae tali Viliamu, “Ua fa’aalia iinei, ua muamua atu le talalelei iā i matou.” I le talitonuga o tagata Manu’a, na mua’i taunu’u lava le talalelei i Manu’a.

O le mea lenā, na faigofie ai ona talia le taunu’u atu o Ioane Viliamu ma latou na mulimuli ane. E masani failauga a Manu’a ona fa’alagi le “Taeao nai Tafagafaga” na to’a ai le au ae tafa manino le ata”. O le taeao lea e fa’asino i le taunu’u o le talalelei na aumai e tagata Rarotoga, ma o le ulua’i taeao lea o le talalelei.

TAUNU’U MISIONARE O IOANE VILIAMU

I lana malaga fa’alua mai i Samoa i le 1832, na ui mai i Manu’a ma taunu’u i Ta’ū. Sa talileleia o ia e Tuimanu’a ma le nu’u. Na feiloa’i ma ulua’i ‘avefe’au o le talalelei i Manua, o tagata Rarotoga ia sa tafefea ma afea le motu o Manu’a. Sa le’i āfea Olosega ma Ofu e Ioane Viliamu.

O Novema, 1838, na toe malaga atu ai Ioane Viliamu i Manu’a i le va’a lotu e igoa o “Camden”. E to’alua faiā’oga Rarotoga o Anania ma Nehemiah sa tu’u ai i Ta’ū i le taimi lea. O le taimi lea ua uma ona fau o le malumalu tapua’i i Ta’ū. Na toe fo’i Ioane Viliamu ae tu’u ai faiā’oga Rarotoga ia i Ta’ū mo le galuega. O si ali’i o Ne’emia na galue i Ta’ū mai le tausaga e 1838 se’ia o’o ina maliu ai i le tausaga e 1864 ma lagomau ai o ia. A’o Anania sa le’i umi ona nofo i Manu’a ae toe fo’i i lona nu’u i Rarotoga. A’o Olosega na Ofu i ia taimi, sa fa’atalitali pea mo ni misionare papālagi po ‘o ni faiā’oga Rarotoga. E ui ina iai Ioane Viliamu i Manu’a, ae na’o Ta’ū lava sa tu lau’ele’ele ai.

ULUA’I MISIONARE I OLOSEGA

Na taunu’u le ulua’i misionare i Olosega i le tausaga 1840. O suafa o ia misionare o Misi Ite ma Misi Pukana. Na malaga atu i le va’a sa igoa o le “Samoa” na fausia e Ioane Viliamu. Na muamua afe i Ofu le va’a ma feiloa’i ma le nu’u. Sa faia se sauniga lotu ma o Misi Ite sa lauga. Ina ua uma le sauniga, sa fai le taumafataga ma tufatufa ai ni mea alofa mo ali’i o le nu’u.

O se ripoti a se faiā’oga sa galue ai i Ofu e fa’apea: “ O le faitau aofa’i o tagatanu’u o le nu’u e 114. O tagata ua liliu i le lotu e 109, ae totoe ai na’o le to’alima o lo ‘o ola fa’apaupau pea. Fai mai se ripoti a Misi Ite, “E ui ina foliga ‘aivao ma vaogata tagata o le motu, ‘ae amio lelei ma alolofa ia i matou.”

Na taunu’u atu misionare i Ofu o lo ‘o iai se vaega Rarotoga e 23 mai le motu o “Mangaia”. Na tafea le latou va’a ma a’e ane i Ofu. Na feiloa’i misionare ma ia tagata ma ave latou i Tutuila. E to’afa(4) sa ‘ave e Misi Ite i Upolu.

Ina ua tu’ua Ofu, ona malaga atu lea i Olosega. Na feiloa’i ma tagata o le nu’u, ma faia fo’i sauniga e pei ona faia e le motu o Ofu. Na feiloa’i ma Tuiolosega ma ali’i o le nu’u. Na vaaia e misionare Tuiolosega e leai se ofu, ae na’o le ‘ie ma lana ula nifo. Fa’apea le ‘upu a Tuiolosega i misionare: “O lo’u agaga ua tōsina atu i le tou tala’iga, ae pau o lea, ‘ae oute le’i liliu i le lotu, se’i talanoa muamua i lona āiga.” Na alu le ali’i ma talanoa i lona āiga. Na fo’i ane , ua leai se ula nifo, ae ua fai lona ofutino lelei. O le faailoga lea ua talia e Tuiolosega ma le nu’u Iesu ma le tala’iga e uiga ia te ia. Na ave atu iai e misionare ni mea alofa o ‘ie lavalava ma to’i i le taimi o le latou fa’amavaega ma le nu’u.

Mai se ripoti fa’amaumau a misionare, o le faitau aofa’i o tagatanu’u o Olosega e 390. O le aofa’i o tagata ua liliu i le lotu e 344. Ae 54 tagata o lo ‘o pipi’i pea i tapuaiga fa’apaupau i le latou atua o Tagaloa Fuailagi, o le pusi sami po ‘o le fe’e i isi taimi. E tusa ai ma ripoti, o le malaga muamua lenei ua āfea uma ai motu o Manu’a ‘e se vaega tala’i o le LMS.

FA’ATU LE FALESA MUAMUA

O le galuega muamua na faia ina ua liliu Tuiolosega ma le nu’u i le lotu, o le faia lea o le fale tapua’i po ‘o le falesa. O le falesa muamua lenei sa faia i gatai o le fale o Malemo e latalata i le sami. O le fale e fa’atafagaloa ae leai ni puipui, e leai fo’i ni pola. O lo ‘o iai ni isi na tatanu ai e latalata i le falesa. E to’atasi(1) le Tuiolosega o lo ‘o taoto ai ma e o’o mai lava i ona po nei o lo ‘o iai pea tu’ugamau i lea mea. Ae ua si’i le tulaga o le falesa i gauta ona o le latalata tele i le matāfaga ma le sami. Ua tu le falesā, pau o le mea, sa le’i ave atu ina se faifeau mo le nu’u i lea vaitaimi. Ae sa fa’atonutonu le gasologa o le lotu mai le faifeau sa nofo i Ta’ū. Na’o tagata nu’u sa tofia e ta’ita’ia galuega o le ‘ausa’ili’ili ma ‘aufaipese.

O le tausaga e 1841 na tofia ai se papālagi e tausia le galuega i Manu’a. O lona igoa o Matthew Hunkin(Mataio Hanikini).

MATAIO HANIKINI LE MISIONARE NOFOMAU MUAMUA I MANU’A

O le tausaga e 1841 na taunu’u ai Matthew Hunkin i Manu’a ma tofia e tausia le galuega i motu uma o Manu’a. Na galue mai o ia i le 1841 e o’o i le 1849 ina ua gasegase o ia ma tu’ua ai le galuega i Manu’a. Na nofo lava ia i Ta’ū ae asiasi ane i tai i Olosega ma Ofu. E ui ina fa’apea sa le’i nofomau o ia i Olosega, ae o ia lava sa amata le galuega fa’afaifeau i le nu’u.

O Mataio Hunkin o se papalagi o se va’a folau na taunu’u i Tutuila. Na fa’aliliuina o ia i le lotu e Misi Panetene ma fa’au’u o ia e ‘avea ma fesoasoani fa’amisionare.

Fai mai se ripoti a misionare e uiga ia Mataio Hanikini, “O se ali’iva’a mai Enelagi(England) na taunu’u i Tutuila. Na tu’ua lona va’a, ae liliu ane i le tala’iga. Ina ua mae’a lelei ana ā’oga, ma fa’aalia amio kerisiano ma le fa’amaoni, na tofia loa o ia e Misi Mare e fai ma faiā’oga i le nu’u o Vaitogi. O le vaitaimi lea ua faigatā ona toe maua mai ni faifeau misionare papālagi mai Lonetona. Ae ua maua tonu lava Mataio Hanikini i le taimi ua matuā mana’omia ai e misionare se fesoasoani. Auā o lo ‘o augani mai pea Manu’a mo se latou faifeau papālagi mai Lonetona.

O le mea na fa’amālosia e Mataio i lana galuega i Manu’a o a’oa’oga tau i le Tusi Pa’ia, aemaise le a’oa’oina o le faitau o le Tusi Pa’ia fa’apea le tusitusi. I le 1842, na auina ai se ripoti iā Misi Mare i Tutuila e fa’apea ua sefulu ā’oga ua fa’atū ma ua iai faiā’oga. O ā’oga e fa o lo ‘o faiā’oga ai tagata Rarotoga, ae lima ā’oga o lo ‘o faiā’oga ai tagata Samoa, ae o le ā’oga autū o lo ‘o faiā’oga ai Mataio.

Ianuari 1849, na fa’amavae ai Mataio mai le galuega i Manu’a. Atonu o se tulaga i lona tino ua afaina i ni ma’i po ‘o ua matua fo’i le soifua ua mafua ai ona fa’amavae. Na toe fo’i Mataio i Leone i le āiga o lona faletua ma fa’aauau ai le tautua i le LMS ma le galuega fa’a-misionare.

TAUNGA O LE MISIONARE LONA LUA I MANU’A

Na suia Mataio e se misionare mai Rarotoga sa faiā’oga i Malua. Na tofia le faiā’oga Rarotoga lenei i Manu’a ina ua siliga lava le leai o se misionare mo Manu’a mai Lonetona. I le tausaga 1850, na taunu’u ai le faifeau Rarotoga i Ta’ū. O lona suafa o Taunga. E to’alua tama mai i Olosega na ave e Taunga i le ā’oga fa’afaife’au i Malua i le tausaga e 1857. Sa le’i ta’ua mai e Taunga igoa o tama ia e to’alua. O le igoa o le va’a na malaga ai Taunga i Ta’ū o “Ioane Viliamu” (John Williams). O le tasi o vaega muamua lava na fai e Taunga i Ta’ū o le faitau lea o le aofa’i o tagatanu’u o Ta’ū ma ripoti mai ia Misi Mare i Tutuila. O le aofa’i o tagatanu’u o Ta’ū e 820.

O le isi mea na fai e Taunga o le fa’atinoina lea o ni tulafono sa pasia i le misiona i Tutuila.

Tulafono Muamua:

O le tulafono e fa’asā ai le ta tatau(pe’a), e lē o se tū fa’a-kerisiano lea

Tulafono Lua:

O le tulafono e fa’asā ai le ulaula.

E le gata i Ta’ū, ae fa’apenā fo’i ona fa’atino o ia tulafono i Olosega ma Ofu.

O le tasi mea tāua na fa’atino i taimi o Taunga, o le faiga lea o le falesa fou i Ta’ū. O le ata na fai e Taunga, ma pulea le fauga o le fale. O se fale muamua lea i Manu’a ua faia i ni ‘amu/namu (coral). E susunu le amu e fa’aliu fa’anamu ona palu lea ma fa’amau fa’atasi ma lapalapa(papa mai le sami), ae fai ai puipui ma le fola o le fale. O se faiga fou ma e masani ai tele motu i Sasa’o o le Pasefika.

O se tasi galuega tāua na faia e Taunga, o le taumafai e fa’amuta le vatau pea o Olosega ma Ta’ū. Ina ua malilie le faletolu ia fa’amuta loa le taua, ona auina ane lea o Taunga ma ana faiā’oga i Olosega i le 1866 e fai ma o latou sui i le fono mo le fa’aleleiga. E fa(4) tausaga ua lē toe tupu ni taua talu mai lenei fonotaga. I le 1870, ua toe tupu fo’i le vatau o Ta’ū ma Olosega ma fa’aauau i le 1872. Fai mai le ripoti a Taunga:

“E 20 tagata maliliu, ae 18 tagata manunu’a. Na fa’anoanoa Taunga ma fa’apea lana upu: “Ua tagi lo’u fatu ma alofa mo le to’atele ua maliliu i latou agasala auā ua uma ona a’oa’oina o latou a’o lenei ua fa’aleagaina latou i latou agasala. Ua vaivai fo’i le mafaufau i tagata o lo ‘o soifua, e to’atele na latou auai i taua sa iai i le lotu, o isi o a’oa’o ma faiā’oga a’o lenei ua sili ona leaga i lo ‘o isi, ua avea latou ma poutū o le fale o Satani. Ae peita’i, a ‘ou manatu i le alofa o le Atua i tagata agasala, ona mapu filemu lea o lo’u agaga. Oute tatalo ia o’o mai vave le aso o le ‘a fa’ataunu’u ai le ‘Upu a le Ali’i: “Na te taofia taua e o’o lava i le i’uga o le lalolagi.”

FAIFEAU NOFOMAU MUAMUA I OLOSEGA

Na tofia se faiā’oga Rarotoga ina ia nofomau i Olosega ma Ofu e va’ava’aia le galuega i nu’u ia e lua. I le masina o Me, 1857, na taunu’u ai i Olosega le faia’oga Rarotoga lenei. O lona suafa o Obeda(Opeta), o se misionare mai le motu o Mangaia. Na fa’anofo o ia i Vaiapi i Olosega, ma tau savali i Ofu. O Opeta na fetaui ma le fauga o le falesā ofe o Olosega i le tulaga lea o lo ‘o tu ai nei le falesa simā. O le falesā ofe, e puipui i ofe, ae fola i oneone, ona ato lea i lau o le tolo.

Na galue Opeta i Olosega ma Ofu i tausaga e 13. Na auina tama e to’atolu i Ta’u mo le sauni ai mo le ulufale i Malua. E to’aono tama mai Manu’a na auina atu i Malua i lea vaitaimi. O tama fanau muamua ia o Manu’a na ave i le ā’oga fa’afaifeau i Malua. Sa le’i ō sa’o latou i Malua, ae na nonofo i le misiona i Tutuila mo ni ā’oga e saunia lelei ai latou. Na solosolo manuia le galuega a Opeta i agaga o tagata mo le lotu kerisiano. O le galuega a le faletua o Opeta o le fai o ā’oga faitau tusi a fafine fa’apea ma fono tatalo i vaiaso. E le gata i lea, ae na a’oa’o i fafine le su’isu’i o lavalava ma le lalagaina o pulou. Na fa’atino fo’i e Opeta tulafono i le fa’asāina o le ta tatau(pe’a) ma le ulaula tapa’a pei ona fa’atino e Taunga i le motu o Ta’ū.

So ‘o se mea lava e iai le lelei, e iai fo’i ma le leaga ona o le tiapolo. I le 1870, ua pa’ū le faifeau i fa’aosoosoga o le tiapolo. Sa fasi e Opeta lona to’alua ma toe itiiti lava ‘a maliu ai le faletua. Ua mafua lea tulaga, ona ua to(ma’i) le teine o le nu’u iā Opeta ma ua fai ma mea ua fa’asoesā ai le faletua iā Opeta ma ua i’u lava ina la nofo eseese ai. Na tu’ua e Opeta le nu’u o Olosega ina ua valaauina o ia e Misi Paueli e fo’i atu i Tutuila. Na suia Opeta e lana uō mai Malua.

TAMA A’OGA MUAMUA A OLOSEGA I LE A’OGA FA’AFAIFEAU I MALUA

I le vaitaimi o le faifeau Rarotoga o Opeta, e to’atolu tama Olosega na ave i le ā’oga fa’afaifeau i Malua. E ui ina le’i fa’ailoa mai igoa o ia tama i le ripoti a misionare na ave i Lonetona, ae o se talatu’u o lo ‘o i le nu’u e fa’apea o i latou nei sa auai atu i le ā’oga fa’afaifeau:

1. O le tama o Iosefa Malemo. O le alo e fa’asino ia Malemo Viena ma Uiga(f) le alo o Faamausili i Ta’u. O lona faletua o Feiloaiga, o le alo e fa’asino ia Letuli Va’a Moegu ma le tinā iā Fetaiaiga Mauai.

2. O le tama o Amitoelau. O le alo e fa’asino iā Tuiolosega Amitoelau ma Taulafoga le alo o Le’i E’e i Ofu ma Finau le alo o Sotoa.

3. O le isi tama ua le maua lona igoa ma lona āiga.

TAUA I TAIMI UA FA'ATU LE LOTU 1866-1872

O le taua lenei na tele tala na tusitusia e faife’au Rarotoga sa tausia le galuega i Manu’a. O le tele o ia tala o lo ‘o maua i fa’amaumauga a le Lotu o lo ‘o i Lonetona. E le gata fo’i i lea, a’o tusitusiga a papalagi folau i lea vaitaimi o lo ‘o mafai ona maua. O nei tusitusiga ua fa’amaonia ai talatu’u a tua’ā i mea na tutupu i le nu’u i lea vaitau.

E tusa ai ma le ripoti a se faife’au Rarotoga sa nofo i Ta’ū, na toe tupu fo’i le isi taua i le va o Ta’ū ma Olosega i le 1866-1872. Na ripotia mai fo’i e Thomas Powell, o se misionare, i lana malaga i Manu’a i le vaitaimi lava lea o le malosi o le taua i le va o Olosega ma Ta’ū i le 1867. Na mafua lea taua ona ua taumafai Laolagi e fa’aaogā le aganu’u, ua na’o Tuimanu’a lava e aiā iai. Afai e alu Laolagi i se faigā ‘ai po ‘o se fa’atasitasiga faitele, ua fa’atonu le taule’ale’a muamua i luma ma ili le foafoa. O le aganu’u lea na’o Tuimanu’a lava e faia. O le ala lea ua pupuna ai le toto o tagata Ta’ū ma toe si’i taua iā Olosega. E tusa ai ma le ripoti ia e lua, ua matuā faia’ina lava Olosega. E 15 tagata Olosega na maliliu ai, ae na’o le 9 tagata Ta’ū. Ona sosola lea o tagata Olosega i Tutuila, ae tia’i le latou nu’u e sa’oloto ai Ta’ū. I le 1869, ua toe fo’i mai Olosega i le latou nu’u ma filifili le isi Tuiolosega. Na latou filifili le tama o Letuli le atali’i o Tuiolosega Amito’elau. Ona nofo lea o Letuli i le Tuiolosega.

TAUA NA FASIOTI AI TUIOLOSEGA LETULI I TA’Ū

Na malaga Tuiolosega Letuli ma ni isi matai o Olosega i Ta’u. O le autū o le malaga ia ta’u iā Tuimanu’a e pepelo tala fa’apea o Tuiolosega e mafua ai ona lu’i e Olosega le pule a Tuimanu’a. Ae le gata i lea, ua logotala Ta’ū e fa’apea o le Tuiolosega fou ua taumafai e si’i taua i le faletolu.

E taunu’u atu Tuiolosega, ‘ae laga ane le faletolu ua fasi. Ua maliu ai Tuiolosega Letuli ma ni isi o matai na latou ō, a’o isi tagata Olosega ua sosola i Fitiuta mo se fesoasoani. Na osofa’i e Ta’ū le nu’u o Fitiuta ia Ianuari 1871, ma e 8 tagata Ta’ū sa fasiotia ai, e to’alua na tipi ‘ese o la’ua ulu. Ae leai se tagata Fitiuta na malaia ai. O le taua lenei na maua ai le faiā a Fitiuta ma Olosega. O le faiā na maua i le toto masa’a. O lo ‘o fa’atino pea lea faiā i le taligatoga o se saofa’i po ‘o se fa’aipoipoga po ‘o se isi lava faigā mea pe ‘ā fai i Fitiuta po ‘o Olosega. E o’o mai lava i aso nei o fa’atino pea lea faiā e to’oto’o o nu’u e lua.

I le 1862, ‘ae le’i tupu lenei taua, o le faitau aofa’i o tagata i Manu’a ‘atoa e 688 fafine ma teine, ae 780 tamāloloa ma tama. O le ripoti lea a misionare Powell(Paueli) ina ‘ua uma ona teuteu lelei le va o Ta’ū ma Olosega e le aufaigaluega (faife’au Rarotoga) e to’alua o Taunga i Ta’ū ma Opeta i Olosega, fa’atasi ai ma Powell(Paueli) i le tausaga e 1872. Ona o le tala’iga a faife’au LMS ua mafua ai ona fa’amuta le vatau so’o o Ta’ū ma Olosega.

TU'UFA'ATASI OLOSEGA MA POUONO

O le tasi aso na a’e ai se tofa fa’atupu ia Tuiolosega Taele Fatuimoana. Ua ia lagona ua tatau ona fa’atasi lona aiga i Pouono ma lona nu’u i le Olo. Ona alu ifo lea o Tuiolosega i lalo i lona aiga i Pouono ma fai ia Ape, Puletasi ma Niuatoa ua fia omai lona nu’u i lalo e fia fa’atasi ma Pouono. Ua malilie fo’i iai toea’i’ina iā Tuiolosega Taele Fatuimoana e ave ane lona nu’u i le itū i Sisifo o Pouono. E pau le fasi fanua na fa’atotoe mai e Puletasi i le lau’ele’ele na tu’u atu iā Tuiolosega, o le fanua o lo ‘o iai nei le fale o le faife’au, ma le fanua i “Lemati” e gata ai le nu’u. O le fanua o lo ‘o tu ai le fale o le faifeau e aofia ai ma le fasi fanua ua tu’u iā Malemo, o le tofi o le fanau a Puletasi Niuatoa iā Saili le alo o Malamo Viena. Na ‘ave fo’i e Malemo lona fanua i luga i le Olo e ta’u o “Laumea” iā Puletasi e ala i le fanau a Saili. E o’o mai nei o tumau pea ia fanua e tusa ma le fesuia’iga ona o le fanau a Saili.

Ina ua sauni Pouono mo le tu’ufa’atasiga o nu’u e lua, na fa’apea ai le tala a Puletasi iā Ape ma Niuatoa, “O a’u o le ‘ā ‘ou fa’agalutua, ‘ae o ‘oulua ‘e ‘ave le tatou nu’u i Talāmoa, o Moegū o le ‘ā fai pea lona usoali’i i le nofoaga o usoali’i o Tuiolosega, auā e na’o le tasi lava le matānofo o le usoali’i. Ae ua lava a’u e fai ma a oulua “matua i fale”.

O le Tuiolosega Taele po ‘o Fatuimoana na feagai ma le tu’ufa’atasiga o nu’u e lua. O le tele o suiga na fai i le nu’u na feagai ma le nofo lenei. O le Tuiolosega fo’i lenei na feagai ma le ali’iva’a Farani o La Peruse lea na afe i Aasu i Tutuila ma fasioti ai ni isi o lona auva’a e tagata Aasu i le 1787. O le vaitaimi fo’i lea ua amata ona nofoia Samoa e papālagi.

ALI'ITA'I O LE NU'U

ALI’ITA’I O LE NU’U

Ua mautū fuaiala. Ona usu lea o le fono i Talāmoa. Ona fa’apea lea o Tuiolosega, “E tasi le ali’ita’i o le nu’u ua na’o le Tuiolosega. O Ape, o le ali’i o Pouono, o le ‘a fa’agalugalutua e nofo i lo’u itū aga’i i luma. Afai e lē nofoia le Tuiolosega, o Ape e fa’aaloalo iai le nu’u, ma o lona nofoaga e pito mai ia te a’u i le pou pepe aga’i i le talāluma.

TOE TOFI NOFOAGA FONO I TALĀMOA

O le tala o le maota i le itū i Sasa’e, o le pou matuātala o le pou lenā o Tuiolosega. O le pou pepe aga’i i le talālumaga o le nofoaga lenā o le Falepouono ma Ape e pito mai ia te a’u. O Niuatoa e nofo i luma i le nofoaga o “Nofoāpule(to’oto’o). O le va o Ape ma Niuatoa, e nofo ai Puletasi ma le fuaiala o Pouono.

O le pepe aga’i i talātuaga, o le nofoaga lenā o usoali’i auā o latou e nafa ma le alagaina o le alofi. O ali’i o le usoali’i e pito mai ia te a’u (Vo’a, Seumaala, Tupolo, Tauila) ona fa’asolo ai lea o usoali’i i le latou nofoaga i talātuaga.

O le tala i le isi itū, e avanoa pea le pou matuātala. E lē agaia e se tasi o le nu’u le Tuiolosega, vaganā ai se isi ali’i fa’atui po ‘o se ali’i e tulaga tutusa. O le pou pepe aga’i i luma o (Papalauena ma Tagaloa, a’o le pepe aga’i i tua o Tivao). E to’atasi le latou tulafale e nofo i luma pe ‘ā fai atiga o ni nofo fou.

O le afio'aga o Olosega i le tausaga e 1940

Photo Credit: George Hastings "Vaisaili"

SUIGA INA UA TU'UFA'ATASI OLOSEGA MA POUONO/ FA'ATULAGA AIGA O SA'O I TOTONU O LE NU'U

FA’ATULAGA AIGA O SA’O I TOTONU O LE NU’U

O le galuega muamua na fai e le nu’u, o le fa’atulaga o āiga ma latou sa’o i totonu o le nu’u. O le nu’u e fausia mai i āiga ua mau fa’atasi i le ‘ele’ele e tasi i le pulega e tasi ma le latou taulaga e osi fa’atasi.

E lua vaega o le “āiga o le sa’o” i totonu o le nu’u:

Āiga Tau Maota
Āiga Tau Suafa

O le “Āiga Tau Maota” e fa’asino tonu lava lea o le sa’o i totonu lava o le nu’u. E aofia ai matai uma o le suafa ma o latou taito’alua ma a latou fanau, e aofia ai ma le ‘au fai’avā ma le ‘au nofotane. E aofia ai fo’i ma tagata ‘ese o lo ‘o nonofo ai i fanua o lea suafa. Ae le gata i lea, e aofia ai ma latou ua fa’avaetamaina i totonu o le ‘aiga. O i latou uma ia ua i lalo o le pule’aga ma le puipuiga a le sa’o.

E fa(4) itūaiga matai o le lotoifale o le “Āiga Tau Maota o le Sa’o”:

Fofoga fetalai o le sa’o po ‘o se matua e fa’asino iai le sa’o
Pitovao, o le igoa matai lea e se’e iai le sa’o pe ‘ā matua
Tuaigoa, o vaiali’i ia ma tulafale e tua iai le suafa
Atuapa’usisi, o vaitulafale ia e felogoa’ia le āiga i mea e finagalo iai le sa’o

O le “Āiga Tau Suafa” e tolu vasega:

O Suli Tupolata, o suli ia e su’e iai le nofo (tama tane ma tama fafine). E aofia ai e na fananau tonu mai i le suafa. O Suli Tautoto, o latou ia e pulea le suafa, o latou fo’i e pulea fanua o le suafa.
O Suli Saotā, o suli tau suafa talitali manu pe to pule le vaega muamua lea i se isi o latou, e aofia ai latou e leai se toto ae ua au i le suafa. O ē ua au i le suafa ni o latou mātua ona o se fa’a’āiga, ona o se fa’atamafai, pe ua au ona o le tautua po ‘o ua oge tagata lea suafa.
O Suli Tupolo, o latou ia na’o le fa’alogologo lava po ‘o fea o le a i’u iai le filifiliga a Suli Tupolata, e aofia ai latou e lē tau toto, e lē tau suafa fo’i a’o lo ‘o nonofo ai i le āiga ma tautua- o le fai’avā, o le nofotane ma isi tagata ‘ese o lo ‘o nonofo ai. E ta’ua fo’i lea vaega o le “Pola Taufafo”, e lē o se “Pola Tautotonu”.

A’o le’i taunu’u mai le lotu, o ‘āiga nei ua fa’atulaga o “Āiga Tū” po ‘o “Āiga o Sa’o” i totonu o le nu’u o Olosega. O matai fo’i ia na amata ai le nu’u ina ua tasi le nu’u i lalo o Tuiolosega Taele Fatuimoana.

SA'O

Tuiolosega

Ape

Seumaala

Letuli

Tupolo

Malaepule

Mauai

Moa

Atafua

Lepulu

Seiuli

Malemo

Afe

Tauai

Puletasi

Moegu

Poloai

Afoa

Tuiofu

Tausaga

Leau

Silifaiva

Niuatoa

Leatiota

Tiuali’i

Pa’u

Tauimea

Tinoisamoa

Lualemaga

Tivao

Faiai

Tilivala

Afioleolo

Fuega

Leafeafega

Tinoisamoa

‘ĀIGA

Talamoa/Ututoa

Talisau

Falemalama

Falesama Tai

Sakamani

Falesama Uta

Faleniu Uta

Tafola

Taimasa

Lalopua

Faleniu Tai

Asoai/Siasoai

Vaivai

Lalovi

Fatualoama

Tuapa

Faleniu Tai

Tafola

Vaisinago

Tutu

Lagituaiva

Faleulu

Lagituaiva

Iumea

Lealavia

Taulataga

Lemati

Fatualoama

Muaava

Muliautetele

Falemalama

Tutu

FUAIALA/FA’AITŪ

Satui/Falesatui

Pouno/Falepouono

Satui/Falesatui

Pouono/Falepouono

Olosega/Faleolosega/Vaiapi

Olosega/Faleolosega

Satui/Falesatui

Olosega/Faleolosega

Pouono/Falepouono

Satui/Falesatui

Pouono/Falepouono

Satui/Falesatui

Olosega/Faleolosega

Pouono/Falepouono

Olosega/Faleolosega

Satui/Falesatui

Olosega/Faleolosega

Pouono/Falepouono

Olosega/Faleolosega

Pouono/Falepouono

Satui/Falesatui

FA’ATULAGA FUAIALA MA FA’AITŪ

O le tasi lea o galuega tele a le nu’u ina ua mae’a ona tu’ufa’atasi Olosega ma Pouono. O le fa’atulaga o fuaiala ma latou matāfale. O le nofoaga o Tuiolosega ma usoali’i ma to’oto’o o Malemo ma Malaepule ua tu’u e pito i Pouono. A’o le nofoaga o nofoao ma latou tulafale o Lepulu, Atafua ma Milo ua tu’u i le pito i le Asaga.

Fa’ato’ā fono Talāmoa mo le fa’atasiga o nu’u e lua ina ua uma le taua lea na si’i ai e Niu le ifoga a Olosega i le faletolu ma maua ai lona matūpalapala mai iā Tuimanu’a, o le to’oto’o.

Ona fa’apea lea o Tuiolosega i toea’i’ina i Pouono, o le a usu le fono e fa’aofi ai Pouono i Talāmoa ma fa’atasia ai lona ‘āiga ma lona nu’u. Ua potopoto Olosega ma Pouono i Talāmoa. Ua fa’avae ai ma fuaiala po ‘o fale e tolu:

Falesatui
Faleolosega
Falepouono

O le “Falesatui”, o le fuaiala lea a Tuiolosega ma ona usoali’i, a’o failauga o to’oto’o o Malemo ma Malaepule.

O le “Faleolosega”, o le fuaiala o nofoao ma latou tulafale o Lepulu, Atafua, ma Milo.

O le “Falepouono”, o le fuaiala o le itu o le Toga ia Ape, Puletasi, Moegu, a’o le failauga o le to’oto’o ia Niuatoa

E o’o mai i le 1900, ua iai matafale ma latou sa’o i fuaiala ta’itasi.

O matāfale nei i le fuaiala o Satui po ‘o Falesatui:

Tuiolosega, Tupolo, Afe, Seiuli, Mauai, Malaepule, Savei, Tupua, Poloai, Afoa, Malemo, Letuli, Seumaala, To’oto’o, Tausaga, Mauga, Leau, Afioleolo.

O matāfale nei i le fuaiala o Vaiapi po ‘o Faleolosega:

Tivao, Silifaiva, Pa’u, Tagaloa, Tiuali’i, Tauai, Lepulu, Atafua, Papalauena, Levao, Milo

O matāfale nei i le fuaiala o Pouono po ‘o Falepouono:

Ape, Lualemaga, Fuega, Leatiota, Niuatoa, Moegu, Pava, Moso, Tilivala, Puletasi, Ulufanua, Moa, Talia, Tuiofu

TOE FA'ATULAGA FA'ALUPEGA O LE NU'U

I le amataga, e leai se nofoaga o Pouono i Talāmoa. O le malaefono o le nu’u o Pouono o “Talisau”. Ona o lea, na le tā’ua ai Pouono i le fa’alupega o le nu’u. O le suiga lenei i le fa’alupega ina ua ofi Pouono i Talāmoa. E muamua fa’alupe le nu’u o Olosega, ‘ae mulimuli fa’alagi le nu’u o Pouono.

E taunu’u atu le lotu, o le fa’alupega sa ola ai le nu’u i le vaitaimi na fa’amaumauina e le faife’au Rarotoga o Taunga. O le fa’alupega o se mea e ola pea ma e tupu pea suiga. E taunu’u atu le lotu ua iai fo’i suiga ua tutupu i le soifuaga o le nu’u. O le tele o ia suiga ua fai ma mea ‘e ‘ese’ese ai talatu’u i āiga ta’itasi o le nu’u. O le tele fo’i o ia suiga na fai e tagata malolosi ma tagata sa faia le nu’u i lea taimi ma lea taimi. O le fa’amaumauga muamua lava o le fa’alupega talu ona taunu’u le lotu, o le tusitusiga a le faifeau Rarotoga sa nofo i Ta’ū na te va’ava’aia le gasologa o le lotu i Manu’a atoa. Na asiasi ane o ia i Olosega i le tele o taimi ma maua ai e ia tala i faigānu’u i Olosega.

Na amata mai i le vaitaimi lenei o le lotu ona fa’amaumau tala i mea na tutupu i le olaga o le nu’u. Na iai fo’i ni isi tusitala na latou aumaia tala mai tua’ā ma ta’ita’i o le nu’u i lea taimi ma lea taimi ma tusia i ni tusi ma fa’asalalau. E ui ina iai nai ‘ese’esega i fa’amaumauga, ae o nei fa’amaumauga e tali tutusa uma ‘i ‘a’ano tāua o le fa’alupega pei o nei:

Malaefono-Talāmoa
Ali’ita’i/Fa’atui/Maleleiga - Tuiolosega
Usoali’i/Nofoao
Malemo ma Malaepule- To’oto’o
Toga- Ape
To’oto’o- Niuatoa
Aumaaga a Olosega ma le Aumaaga i le itū a le Toga.

O tusitusiga nei ua mafai ona maua ma faitau iai ma fa’atusatusa i talatu’u sa ola mai ai le nu’u e o’o mai i aso nei:

Fa’amaumauga a le misionare Rarotoga o Taunga na pulea le lotu i Manu’a mai le 1840-1872. O le fa’alupega lenei o lo ‘o i lana tusitusiga:

“Tulouna a Talamoa. Tulouna lau malelega Tuiolosega ma le usoali’i. Tulouna le falesatui lau fofoga Malemo ma Malae(to’oto’o). Tulouna le fa’aagatonu a le Toga-Ape ma lou to’oto’o Niuatoa. Tulouna le Olosega i luma ma ao. Tulouna le Aumaaga a le Olosega. Tulouna le Aumaaga a le Toga.”

Fa’amaumauga a le foma’i Siamani o Dr. Augustine Kraemer(Kramer) i le 1900. O le foma’i lenei sa i Manu’a ma o le fa’alupega lenei o Olosega ua tusia i lana tusi:

“Tulouna oe le Olosega. Tulouna lau alaala le Tuiolosega. Tulouna lau malelega. Tulouna le usoali’i o lau alaala Vo’a ma Fetui. Tulouna Satui ma lau fofoga Malae ma Malemo. Tulouna oe le Toga. Tulouna lau fofoga Ape ma Niuatoa. Tulouna lau tofa Tivao. Tulouna le Olosega i luma ma ona ao. Tulouna le aumaaga a Olosega. Tulouna le aumaaga a le Toga.

Fa’amaumauga a le faifeau o Kuki na faifeau i Olosega i le 1902 ma o lona faletua o Patupatu o lo ‘o taoto i le tulimanu o le falesā o le nu’u o Olosega:

“Tulouna oe le Olosega. Tulouna lau alaala Tuiolosega ma lau malelega. Tulouna usoali’i. Tulouna Fale-satui ma lou fofoga Malae ma Malemo. Tulouna oe le Toga ia Ape ma lou fofoga Niuatoa. Tulouna lau tofa Tivao. Tulouna le Olosega i luma ma ona ao. Tulouna le aumaaga a Olosega. Tulouna le aumaaga a le Toga.

Fa’amaumauga a le polōfesa(professor) o Margaret Mead i lana tusi ua ta’ua o le “Social Organization of Manu’a i le 1930. O le fa’alupega lenei ua tusia ai:

Acknowledgement of thee, Olosega.

Fa’amaumauga a le pulega a le “Navy” i le 1951:

Tulouna lau malelega Tuiolosega ma lou usoalii. Tulouna nofoao. Tulouna le falesatui i fofoga o Malemo ma Malae. Tulouna le Toga ia Ape ma le fetalaiga iā Niuatoa. Mamalu mai oe le Olosega.

Fa’amaumauga a le Kolisi o Malua i le 1985 i le tusi ua fa’aigoaina o le “Fa’avae o Samoa Anamua.” Ua tusia ai le fa’alupega o Olosega e fa’apea:

Tulouna le fa’atui o Tuiolosega ma le malelega. Tulouna Ape ma lou to’oto’o Niuatoa. Tulouna a nofoao. Tulouna a usoali’i. Tulouna oulua to’oto’o. Tulouna oe le Olosega.”

Fa’amaumauga a le Board of Trustee of Methodist Church in Samoa i le 1985. Ua tusia ai i le Tusi o fa’alupega o Samoa Atoa le fa’alupega lenei:

Afio mai Tuiolosega ma lau malelega. Susū mai lou usoalii (Seumaala, Tupolo, Vo’a). Susū mai le nofoao (Tagaloa, Ena ma Tivao). Maliu mai oulua to’oto’o (Malemo ma Malaepule). Mamalu mai oulua le Toga Ape ma lou to’oto’o o Niuatoa, ma upu iā te oe le Olosega.

Fa’amaumauga a le faiā’oga o Leuluso’o Leatutufu i le 2000 i lana tusi ua ta’ua “Fa’avae o Samoa (The Foundation of Samoa). Ua tusia ai le fa’alupega lenei:

Afio mai Tuiolosega ma lau malelega, o le ali’i fa’atui o Tuimanu’a. Afio mai Tagaloa ma le āiga Sa Tagaloa. Susū mai le Toga o lau Susuga Ape ma lou to’oto’o o Niuatoa. Susū mai nofoao ma ali’i o le usoali’i. Alaala mai to’oto’o o Malaepule ma Malemo. Mamalu mai le taua’ese’ese ma Olosega i luma ma ona ao, ma le fetalaiga iā te oe le Olosega.
Tulouna a ‘oe le Olosega i luma ma ou Ao. Afio mai Tuiolosega ma lau malelega. Afio mai ‘oe le Toga o lau afioga Ape ma lou to’oto’o o Niuatoa. Susu mai nofoao ma usoali’i. Alaala mai oulua to’oto’o o Malaepule ma Malemo. Mamalu mai ‘oe le Olosega.

Photo Credit: George Hastings. Leatiota Puipui

Photo Credit: George Hastings

O LE AFI MU SASAO I LE VAINU'U

A’o pisi le aufaigaluega e fa’afilemu le vatau o Olosega ma Ta’ū, na fa’ate’ia tagata o motu e lua i se mafui’e malosi na luluina ai le sami ma le laueleele. O Setema 7, 1866 na tupu ai se mafui’e na fefefe ai tagata. O Setema 13, 1866 na vaaia ai le sami i le vainu’u ua fufula i luga pei ose papa i le va o Ta’ū ma Olosega. Na manatu tagata fa’apea o le afi ua mafua ai. Mulimuli ane ua vaaia e tagata palapala ua lua’i maualuga i le ea. Ua latou manatu, o le mauga mu ua tupu a’e. Na fa’aauau pea le pipisi i le ea o palapala, ma’a ma le asu. A’o le sami ua fola i’a, ua mamate i le vevela o le sami. Ua tafefea i’a i uta ma fola solo i le matafaga i Oge. Fa’ato’ā uma le ma’ema’eā o le mauga mu iā Setema 25, 1866. Fai mai le ripoti a Taunga, pe a ma le 100 futu le lautele, ae ½ maila le umi o le afi mu, ma e latalata i Olosega i lo ‘o Ta’ū.

FA'ALUPEGA

EKALESIA FA'APOTOPOTOGA KERISIANO AMERIKA SAMOA (EFKAS) I OLOSEGA

AO PUPULA

MALEMO

VI'I O OLOSEGA

TALA I LE NIUATOA

O SUAFA MATAI I LE AFIO'AGA O OLOSEGA

O LE ATI TUIOLOSEGA I LUGA I LE OLO

Tuiolosega Pava

Tuiolosega Puka

Tuiolosega Vo’a

Tuiolosega Lagisa

Tuiolosega Silifaiva(1)

Tuiolosega Fatuimoana(Taele)

O LE AUGA TUIOLOSEGA INA UA TASI LE NU'U

Tuiolosega Ulululu

Tuiolosega Silifaiva (2)

Tuiolosega Pa’u

Tuiolosega Amitoelau

Tuiolosega Tagaloa (Pa’u)

Tuiolosega Letuli

Tuiolosega Ino Saiaona'i

Tuiolosega Matāfaga (Ve'e)

Tuiolosega Mafuainu'u (Ali'itasi)

Tuiolosega (Tagaloa) Sioeli

Tuiolosega Soso Tu'umamao

Tuiolosega (Tupuola) Lealava'a Pa'u

FA'AMANUSINA I SE MALIU I TOTONU O LE NU'U O OLOSEGA

VATAU A OLOSEGA MA TA’Ū

VATAU A OLOSEGA MA OFU

O LE IGOA MANAIA MA LE TAUPOU

FAIGA O LE 'AVA O LE AOFIA MA LE ATOA A LE NU'U O OLOSEGA

TU LAU'ELE'ELE LE TALALELEI I LE MOTU O MANU'A

TAUA I TAIMI UA FA'ATU LE LOTU 1866-1872

TAUA NA FASIOTI AI TUIOLOSEGA LETULI I TA’Ū

TU'UFA'ATASI OLOSEGA MA POUONO

ALI'ITA'I O LE NU'U

TOE TOFI NOFOAGA FONO I TALĀMOA

SUIGA INA UA TU'UFA'ATASI OLOSEGA MA POUONO/ FA'ATULAGA AIGA O SA'O I TOTONU O LE NU'U

SA'O

‘ĀIGA

FUAIALA/FA’AITŪ

FA’ATULAGA FUAIALA MA FA’AITŪ

Falesatui

Faleolosega

Falepouono

TOE FA'ATULAGA FA'ALUPEGA O LE NU'U

O LE AFI MU SASAO I LE VAINU'U

E FA PITONU'U/FUAIALA UA VAEVAEINA AI I LE TAIMI NEI I LE VA NONOFO MA LE MOTU O OLOSEGA

O LE PITONU'U O VAIAPI

O LE PITONU'U O SATUI

O LE PITONU'U O POUONO

O LE PITONU'U O VAISAILI

Email Address:

mavaega.fuimaono@doe.as

mavaega.fuimaono@family-genealogy.info