FA'ALUPEGA
Afio mai Faliuila ma lou sa’otā o Te’o
Afio mai fa’asisina o Lesā ma Lesā
Susū mai ‘āiga e lua o Oso ma Seupule
Maliu mai oe le Faleātua ma upu iā te oe Leatitoafaigā
Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.
‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.
VI'IVI'IGA O LE ITŪMĀLŌ O ALEIPATA
Afio maia, afio mai Fagasoaia
O le sa’oaualuma
O ia lava ua tofia, i le faiva o mānaia
Lafo i Aleipata, o le nu’u matagofie
O le suli o le tupu lenā ua filifilia
Malelega o le Tuiatua iā Fagasoaia
O ia lava ua tofia,tofia e le Tuiatua
E su’ea se siapo, mo Fuataga ma Tafua
Ua ou sau nei, se’i ta tou aleaga
I si o’u nu’u moni o Aleipata
I le ta’aloga, o le fa’aagatama
Ma le talutalu fou, o aso ia o le malamalama
O Fepulea’i, ua e’e ai pāpā
O le ‘a feagai ma Tumua
A’o Fagasoaia, o le sa’oaualuma
O ia lenā, o le ‘a maua ai mea uma
VI'IVI'IGA O LE AFIO'AGA O SATITOA
Eseta Opetaia. (2024, May 27). Eseta Opetaia - VII O SATITOA (Official Music Video). YouTube. https://www.youtube.com/watch?v=X_Xgyl8uh2E
Samoa e, ua saveioloolo le seuga i lau tapua’iga
Auā o pa’ia oute lē tau autalaina
Ae oute pese nei ma fa’amatala o si o’u nei fa’asinomaga
Satitoa lo’u nu’u moni, na fa’afailele ai o lo’u tagata
Lo’u nu’u e, o le matāmatagi tula’i mai
Faigatā ua pele tasi oe i la’u va’ai
Oe o le fetu tāua
Le lalelei o Aleipata
Ua numera tasi oe, Satitoa lo’u afio’aga
Afio mai o Faliu, fa’apea Te’o lou sa’otā
Fa’asisina o Lesā, afifio ‘āiga e lua
Le mamalu fo’i iā te oe le faleātua
Ma ‘upu iā te oe, iā te oe Leatitoafaigā
Lou fa’alupega lenā, ua i tala’aga o Sāmoa
O lou malaefono, alaala ai le faleātua
E tolu ona pitonu’u, ua mae’a vaevaeina
O Logonoa, Vaifalesa ma Tāialofa
Oute ‘aumau i atunu’u ‘ese
E manatua lo’u lau’ele’ele
Le oneone pa’epa’e ma laufanua lanulau’ava
Ae tū mai i tumutumu mauga
E te va’aia lona samitioata
Le matāmatagi o le igoa o si o’u va’a
Satitoa lo’u nu’u moni
E liliu ai lo’u taofi
O le Isaraelu moni lava, e susu’e pea lona fa’amalama
E mamao ala, e lē galo lo’u fa’asinomaga
Liliu ane la’ia i le talalelei
E malosi tele ai o le nu’u nei
Metotisi le itu i Logonoa
Katoliko loa i ona autafa
Le EFKS, ma le Assembly i Tāialofa
O le ta aganu’u Samoa, o le fetū pupula i Satitoa
E mamalu pulega a matai, le ‘aumaga i le tautua fai
E o’o fo’i i faiga fa’avae, e mulimulita’i ai tupulaga
A lē usita’ia, ua saofa’i i le fono a matai
O saofa’iga a tama’ita’i
O faletua fo’i ma tausi
Ua vivili tala i Samoana
Satitoa i fa’afiafiaga
O alo fo’i ma tama fanau
O lupe fa’alele i le atunu’u
O le lakapi, le taleni lea o si o’u nu’u
Sau la’ia ta o, se’i momoli lapalapa o mālō
I le Tapa’au Sili i le Lagi, lona alofa ua sautualasi
Teu fatu i si ou loto, le amataga
E tua i le sami ma le vao le tausiga o lo’u alaalafaga.