Ae le ‘i se’e lili’a Ulufanuasese’e i le apitagalu

‘Ou te mua’i fa’atalofa atu i le pa’ia ma le mamalu

‘Ia nu’unu’u atu ia fa’atini o manaia ma tausala

O le ‘ā sunu’i tao ma se’i fagatonu le liu o si o’u va’a

 

Fai mai e iloa le Samoa

I lana tu, savali, ma le tautala

Le aganu’u, agaifanua

‘Aemaise measina mai anamua

 

Toe tepa i le amataga

O nai mātua lava sa latou tauasa

Sa latou gausia le vao

Auā so tatou taeao

 

E upu lasi Samoa

E mau gagana

O ana measina ma galuega taulima

Ua lauiloa ai i le vasa Pasefika

 

A tatou mafaufau i le gagana

O lo tatou lea mitamitaga

Sa tau’ave mai e nai tua’ā

La le ua lagomau ma saga mai i ti’asā

 

E mitamita le agaga

Ona o si a’u gagana

‘Ou te tau’ave pea iai fa’a-tausala

Auā o la’u lea ulafala

 

Taga’i ane la isi o tatou atunu’u

Talofa i le aganu’u ‘ua amata ona tau fa’amāmulu

‘Ā fa’apefea le lumana’i?

Ina ne’i toe apatā atu ‘ua tuai

 

Samoa e, o si agaifanua

E iloa ai le tagata ma si ana tautua

Tautuanā e u’u mau fa’atonutonuga ma fautuaga

Auā aso ‘o i luma ma ona tupulaga

 

Samoa o le atunu’u tofi

O le tagata lava ma si ona matāfaioi

Le saofa’iga a matai ma ali’i o le nu’u

E aofia uma ai tulafale ma le aufai’upu

 

O le tamā o le ulu ia o le ‘āiga

Ae o le tama’ita’i o le i’oimata

Taulele’a lava o le tautua

Tinā o ‘āiga e faufautua

 

A fa’avasega la tiute fai

E maualuga lava tulaga o matai

O ‘i latou ia e fa’auluulu iai ‘āiga

E mai iā te ia fa’ai’uga ma fautuaga uma

 

Faletua ma tausi po ‘o tinā

O le tofi lava o le faufautua

E lagolago iā tamā

Aua se lelei mo le āiga

 

O le tama’ita’i o le i’oimata

Pae ma le auli ia o ‘āiga

Lona mamalu ia u’u mau pea

Ina ne’i mamulu atu i peau lelea

 

Taulele’a o le tautua

Le umukuka lava ma si ana upega

Fai mai ‘e na te puipui i lona i’oimata

Ae mata’ina lava le tama e poto e tautala

 

Taga’i ane i le lotoifale

E tofu lava le tagata ma si ana atina’e

E mau’oloa lava Samoa i ona laufanua

Auā e galulue fiafia uma lava le ‘au tautua

 

O le malu ma le soga’imiti

O ni isi ia o galuega fa’a-atisi

Auā o mamanu uma e taua

Ona o measina fa’apelepele mai anamua

 

Toe tepa i nai a tatou measina

Ia u’u mau pea i o tatou lima

Nai tupulaga ua amata ona fia papalagi

Auā ua tōsina i tekenolosi a le lalolagi

 

A tatou toe mafaufau i nei ona po

Ua pei o le emo o le mata suiga ona o tu mai fafō

La ta gagana ma le aganu’u ua amata ona mou atu

Ona o le agi a le Fisaga aemaise le To’elau

 

Ua i’u la’u solo

Ina ne’i e fa’apea ane ua ou fiapoto

Ae oute ta’utino atu ua na’o ni nai fautuaga mai le loto

Se upu ua sala, ia goto ifo i le sami loloto

 

O le ala lea o lo’u mitamita isi o’u atunu’u

Auā e tumau pea lona fa’avae ma si ana aganu’u

Ne’i vale tu’ulima si o ta tofi

Ae o si fautuaga lava mai le Samoa moni.