LE AFIOGA I LE SA'O IA TOOMATA TUILOMA USO TANIELU
FA'ALUPEGA
Afio mai le sa’o o To’omata ma ou falealo (Amituana’i, Sauitufuga, Fa’autagia, Alofoetutusa) ma le matua iā Seiuli
Susū mai Leulua’iali’i ma le fofoga o Vaifanua
Afio mai alaalagafa(Savaiinaea, Tauanu’u, Paepae)
Mamalu mai oulua tauto’oto’o Gago ma Lalo’ulu ma fetalaiga i Falealili(Taveuveu, Fualauto’alasi, Taloolema’agao, Talauega)
Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.
‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.
EKALESIA FA'APOTOPOTOGA KERISIANO AMERIKA SAMOA (EFKAS) I NUA MA SE'ETAGA
SULU O LE OLA
EKALESIA FA'APOTOPOTOGA A LE ATUA (ASSEMBY OF GOD) I NUA MA SE'ETAGA
AGAPE MINISTRY
"E na'o Alataua na melea Fualau"
O le ‘upu lea sa fa’alele i le ualesi fa’alogologo (WVUV Radio Samoa) i Amerika Samoa iā Novema 7-8, 1986, ina ua lē manumālō Fualauto’alasi i le palota a le itumālō o Alataua i Sisifo - i le tofi Faipule o Alataua i le Maota o Sui, o le Fono Faitulafono a Amerika Samoa mo le 1987-1988. Ua na’ o ‘upu fa’aleaga a tagata o lona lava ‘āiga ma lona lava nu’u o Nua ma Se’etaga; ona o le ita iā Fualau i le faia o le Malumalu(Falesā) i le fanua lava e patino iā Fualau i le afio’aga o Se’etaga- mo ē Lotu Fa’apotopotoga a le Atua (Assembly of God Church) i Samoa. Sa taumafai ‘ia matai o le nu’u e taofi le Falesā, ma lafoa’i le saofa’i o le fotuali’i o le suafa Savai’inaea. I le taimi lea ina ua malilie ‘āiga i le nofolua o Savai’inaea Tanielu ma Savai’inaea Malaelupe. Ae sa fa’ataunu’uina lava le Falesā tapua’i ma le saofa’i o matai a lona ‘āiga i Se’etaga i le tausaga e 1985-1986. Sa fa’ate’aina ai Fualau e le nu’u ia Mati 24, 1985 i le fauina o se isi tapuaiga e ‘ese mai i le LMS. Ona o le manatu e faapea, e tasi lava le tapuaiga i totonu o le nu’u o Nua ma Se’etaga. Peita’i, e le ‘i solomuli ai ma fa’avaivai. Sa fa’asaga loa matai ma tagata o lona nu’u ma lona ‘āiga, ‘ua fa’asesē tagata o Alataua, ‘ina ‘ia lē palota iā Fualau i le tofi Faipule o Alataua. Ae peita’i, sa toe tautala ai ‘uma ‘ina ‘ua toe fo’i Fualau i Amerika- ua lagona le sesē ma le fa’aleaga fua o Fualau ‘ae leai se mea o fa’aletonu i le va o Fualau ma lona ‘āiga ma le nu’u. O ‘upu fa’aleaga ma tala fa’asesē sa fa’alogo ma fa’aaogā e tagata o Alataua, ona lē palota ai lea o le itumālō Alataua iā Fualau. Ona mafua ai lea ona fatu e Fualauto’alasi lenei fuaitau e fa’apea:
“E na’o Alataua na melea Fualau”- ina ua latou misia Fualau i le palota. O mea uma sa latou taumafai e fai, e leai se mea na taunu’u i le taofiga o le falesā tapua’i, fa’ate’aina ma le faigānu’u, tau fa’aleagaina o le saofa’i o le ‘āiga i Se’etaga auā na fa’atasi le Atua ia te ia i le faiga o lona Malumalu e tapua’i ai Nua ma Se’etaga ia te ia (Ali’i). Ua mae’a le falesā, ‘ua toe o’o i totonu o le nu’u e fa’alelei ma teuteu le nu’u, ua uma saofa’i o Savai’inaea ma Savai’inaea o lona ‘āiga, ua mae’a fo’i le palota a Alataua (1985-1986) ma maua ai fo’i le avanoa e tatala aloa’ia ai lana tusi ua fa’aulutala e fa’apea: “Fa’avae o Samoa”