"O LE TOFI NA 'AUMAI 'E LE ATUA, 'AE O LE TAU'AVEINA O LE TOFI, O LO 'O IAI LU'ITAU MA FUA LELEI"

Sunu'itao Mavaega R. Puletasi Fuimaono Jr.                                               

TALOFA LAVA SAMOA

 

E fa'atalofa ma fa'afeiloa'i atu i le pa'ia ma le mamalu o Samoa i ona sā ma faigatā e o'o lava i ona tulaga fa'alupelupeina, 'e 'amata mai i le Taisamasama o le Tuimanu'a se'ia pa'ia le Taiulaula o Nafanua. Mālō afua ailao ‘ua maua i le alofa ma le agalelei o le Atua ‘ua mafai ona tatou ‘umufono talatala ma ulumea fatu fala e tauala mai i le tatou Gagana ma le Aganu’u Fa’asamoa. E fa’apenā le agaga o lenei taumafaiga, ina ia toe fafagu mai le tuana’i, o le isi lea o ā ta measina o le ‘ā vave ona mou atu i le masau ma le televave o aga fa’aonapō nei. Oute lē talitonu pe ‘āfai e motu ma le taula galuega ‘a nai o tatou tua’ā ua lagomau mai ti’asa ma saga mai apouli i le mua i malae i aso faigatā ma tauasa mai i tausaga e tele ma se’i va’ava’ai po ‘o le a se manuia o le ‘ā tula’i mai ai Samoa. Le atunu’u e, o le ala lea o le a’e o se manatu, ina ia fau se ‘upega o tafa’ilagi, auā tupulaga lalovaoa i le lumana’i. E omai tupulaga ma toe ō, ‘ae o lo ‘o iai le isi augatupulaga latou te mātau i mea e lelei ai fo’i le isi augatupulaga. Ia to mai lagi ni manū auā lau tapuaiga Sāmoa, ma ia manuia tele lau silasila ma lau maimoa i luga o lenei upega o tafa’ilagi.

 

Soifua

 

                                                                                                                                                               Photo Credit: Martin Franco

Ua foa'iina e le Atua le loto mataala i le tupu o Solomona e faamasino ai le nu'u ma masino ai i le lelei ma le leaga. O le agaga o le tupu, o le e sailiili i le poto faapei ona sailiili i le oloa lilo, e maua lava e ia faatasi ma se lagona gatete ma le maofa tele i galuega mamana ma le lililo a le Atua soifua. Ua ia taunuu ai i le loloto o le mataupu silisili ma faapea ane ai: "O le mata'u lava i le Atua, o le amataga lea o le poto. O le poto ua ia te'i tatou uma lava. O le poto i tu ma aga a Samoa o le tiute ma le matafaioi lea a le tagata Samoa. O le faailoga lea o lona naunau ma lona mitamitaga i le Atua i le avea ai o ia ma tagata Samoa.

Talofa, Talofa lava.

 O le a 'ou le ui atu i le ala ma'a auā e gaoā ma faigatā. O le a 'ou le ui atu fo'i i le ala fata ne'i gausia se la'au faalava ona manu'a ai lea o le vae. Tulou. Ae tau ia ona 'ou ui atu i le ala o le sao, e molimoli fa'ava'a e ofi i le ava, po 'o se tama a se manu, po 'o se tama a se tagata e fafaga i upu ma tala. O a'u o Sunu'itao Mavaega Ronnie Puletasi Fuimaono Jr. mai le motu o Olosega i Manu'a ma Petesa-Tai i Tutuila. Na ou fanau i le Aso luasefulu ma le tolu (23) o le Masina o Aperila i le tausaga Afe Iva Selau Iva Tasi (1991) i totonu o se faasinomaga o se ‘āiga ua uma ona tofia e le Atua, o a'u o le ali'ioāiga. Sa fanaua a'u e ni mātua e maluali'i e pei o (Logoitu'au Fatualoama) Maniti Saumaleato Fuimaono ma Togamoevao Fiatuiga Purcell Puletasi i le tuufaatasiga ma le so'otaga ma e tutupu mai ai e to'avalu i matou:

 

Mavaega Ronnie Fuimaono Jr.   

Anthony Tupu Fuimaono 

Faalua Evelyn Fuimaono 

 Eterei Lorraine Fuimaono 

Elevira Laroya Fuimaono

Tise Tavoi Fuimaono

Seira Junemyra Fuimaono

Evelyn Ianeta Puletasi Fuimaono

 

Na ou faaipoipo atu iā Rosita Togamau Tagaloa i le pitonu'u o Atauloma i le afioaga i Afao. Ua faamanuia ai i ma'ua i ni fanau e to'aono(6):

 

Tagisiafo'ielauluseva'aiagoto Thomas T. Fuimaono

Taapemaonasuli Lorraine Sapina Tuāumu Fuimaono

Gethsemane Tasimaisaualuaimatāutuna'a'ai Fuimaono

Lisi Talafa'autoileafio'aga Tasitolu Fuimaono

Jeremiah Tenari Fuimaono 

Gabriel Tala’isinamanūfa'aifomailagi Failautusi Fuimaono

 

Faafetai i le alofa ma le agalelei o le Atua, ua taunuu ai ni faamoemoega sili o lo'u olaga i le tautuaina o le ‘āiga. Ua a'e ai le tōfā ma le faautaga o ‘āiga, ua tatau ma agatonu a'u i se suafa o le ‘āiga ou te nofo ai. Ua talia e le ‘āiga, ua faamatai ai a'u i le suafa Sunu'itao o le faletama o Tuiolosega Pa'u i le ‘āiga i Lagituaiva i le afioaga o Olosega. E leai se mea e faigatā i le Atua, auā o lona suafa ua vaelua iai. E eseese auala o le Atua i nai o'u mātua i le asaina mai o le vaofilifili, e saili se laolao ma tau tulimata'i po 'o fea o le ‘ā tinitauao ai o matou mo'omo'oga. A'o lenei ua tali faaaliali le Atua e ala i faamanuiaga i le poto ma le atamai, e le gata i le tausiga, peita’i, o le alofa e fusifusia ai mea uma i lona agalelei ma lona faasoasoa mai.

 

O a'oa'oga a Iesu, "... Ia outou saili ona outou maua ai lea, ia outou tu'itu'i atu ona tōina ai lea iā te outou." (Mataio 7:7)