LE AFIOGA I LE MATUA
LE'IATO TOGIOLA PENI AUMOEUALOGO
FA'ALUPEGA
Afio mai le matua iā Togiola
Susū mai le falefiaoali'i (Lemanu)
Afio mai Fiaseu ma Igafo
Susū mai le ali'i o aiga iā Tuinei
Maliu mai oulua o lo 'o nonofo i alafale ( Migi ma Vaesa'u)
faapea le mamalu i aiga.
Tulouna le pa’ia tele o le afio’aga, o pa’ia mai le vavau e o’o i le fa’avavau, tau ia ina ‘ou saua i le va ‘ina ne’i o’u malaga loa ae se’i o’u afeaina lape o upu i sala le gagana, auā e faigatā Samoa o le aomamala i le fa’asouga o ao ma le atufolasa. O le pa’ia ma le mamalu maualuga o le afio’aga i ona tulaga fa’alupelupeina. Aiga o tupu, Aiga o pāpā, Aiga o nofo. E leai se na te gafataulimaina, auā ua ta’o’oto a’o ni alao’o. O le fale tulutulu i tao a’o le fale fo’i e tulutulu i moana. O le vao filifili, o le fue lavelave, o le i’a iviivia, fai mai a sēsē lona auauina, e laoa ai le tagata, tulou. O le ala fo’i lea ua si’i ai lo’u va’a, e ala i le mafua ali’i ua laga, ona o lo’u fia pa’i i le vai o le tama talu ‘ata ua totō o le ‘ava. E i ai ona ‘ou valuvalusia a’a o le la’au pe tēfā le tauala i le tōfā ma le faautaga i le pa’ia o le afio’aga ua mafua ai ona ‘ou le utuvai i le fuiniu, ‘ae ua ‘ou utuvai i le fuisa’a e afua atu i lenei galuega, sa fa’atalatalanoa ai ni isi o tua’ā matutua ma toe ulutaia o le afio’aga ua mafua ai ona tatala le ato ponapona e ala i le fa’asoa.‘E leai se ‘atoa i le liu o lo’u va’a pe ana le o gatasi ma le finagalo o le Atua, semanū e atafasaina fa’afuga o la’au e to’ulu lenei faamoemoe . E matua atu iinā, ‘o ‘oe o le matua faitama.
‘Afai e iai se mea e fa’aletonu i luga i lenei 'upega o tafa’ilagi, ia fa’amagalo le auauna, auā ‘ou te talitonu o lou leo o le a manuia ai lenei taumafaiga vaivai. E poto lava le tautai, ae sēsē ma 'ela ai le va'ai.
EKALESIA FA'APOTOPOTOGA KERISIANO AMERIKA SAMOA (EFKAS) I MASAUSI MA SA'ILELE
TAULAGA OLA I LE ATUA O ATUA
O LE AMATAGA MA LE GATA'AGA
PULEAGA KATOLIKO SAMOA PAGO PAGO I SA'ILELE
SAGATO PETERU(ST. PETER CHANEL)
Le’iatotuāfanua Togiola ae Le'iatoalofi Tu'itu'iotoga
O le va’a o Tatua ma Tanō ‘o le alia; ona ita lea ‘o le uso; ‘o peau oso, ‘o peau ta’oto, ma peau lagavale ma peau asia ma peau ta’alolo, ‘ina ‘ua soli so’o ‘o i latou e le uso. Ona latou lepeti ai lea ‘o le va’a; ona oti ai lea ‘o le uso, ‘a e malepe le va’a. Ona fe’ausi mai lea ‘o tama’ita’i e to’alua; ona lā maua lea ‘o le ‘iato sā o le va’a ‘o tafea. Ona fe’ausi ai lea ‘o tama’ita’i i le ‘iato; ona o’o mai lea i le va o Savai’i ma Upolu.
Ona fa’apea lea ‘o la lā tala, ‘ina ‘ua taumalua ‘o le la’au. ‘O le tila nei ‘ua faifaigā. Ona faapea lea ‘o le isi tama’ita’i: Siulā e, ‘o le a ‘ou igoa iā Tilafaigā. Ona fe’ausi lea ‘o tamaita’i ma afe i Gamo. Ona tulia ai lea ‘o la’ua; ona fa’asaga ai lea ‘o tama’ita’i, ‘ua fasi le nu’u ma ‘ai; ona igoa ai lea ‘o le nu’u ia “Fa’agagamo”.
Ona toe fe’ausi fo’i lea ‘o tama’ita’i; ona pa’ia lea ‘o le vasa fa’atutuila. Ona tafea mai lea ‘o le afīfī o otaota o tamameamea. Ona fai atu lea ‘o Tilafaigā: Siulā e, sau inā va’ai i tae ‘ua mamā. Ona fai atu lea ‘o le tasi tama’ita’i: ‘O le a ‘ou igoa ia Taemamā. Ona ō lea taunu’u i Poloa. Ona fesili lea iā Tuveve i le mulifanua: “O fea le mea ‘o i ai le ali’i e igoa ia To’iololua? Ona tali lea ‘o Tuveve: “O le ali’i e mau i luga o Sa’ilele. ‘Ua ‘ave le ‘iato ua nanā i le matāfaga. Ona toe fe’ausi fo’i lea, taunu’u i Masausi. Ona o a’e lea i le fale ‘ae ua na ‘o tamaiti.
Ona fai atu lea ‘o tama’ita’i: Solē, sau se isi o ‘oulua, inā alu ia To’iololua e fai i ai e sau i le fe’au. ‘A fesili To’iololua: Pe se fe’au a ai? Ona e fai lea i ai: ‘O le malaga ‘o lo ‘o i lalō. Ona alu ai lea ‘o le tama, ‘ua fai atu: Na’u sau ‘e te alu atu i le malaga ‘o i lō tatou fale i lalō. Ona fesili lea ‘o le ali’i: Pe se malaga a ai? Ona tali lea ‘o le tama: ‘Ou te lē iloaina po ‘o ai ia ali’i. Ona alu ifo lea i ai ‘o le ali’i; ‘a ‘o Tilafaigā ma Taemā ‘ua lā tu’u le siapo, ona o lea i totonu. Ona alu ifo lea ‘o le ali’i ‘ua gaogao le fale na ‘o le tainamu ‘ua tu’u.
Ona fa’apea lea ‘o le ali’i: Sē, tama ia, o fea le malaga? Ona fai atu lea ‘o tamaiti: Ta’ilo. Ona toe fai atu lea ‘o le ali’i: Sē, ‘au mai se vai so’u inu. Ona tago ane lea ‘o Tilafaigā i le vai ‘o i tafatafa o le siapo. Ona tu’u atu lea ‘i lona lima ‘o le vai, ‘ua leo itiiti ‘o ia ma fa’apea atu: ‘O le vai lenei. Ona va’ai atu lea i ai ‘o le ali’i ‘o le lima o le taupou ma le ‘ogalima o le tagata ‘aulelei. Ona tago atu lea ‘o le ali’i ‘ua pu’e le lima o le tama’ita’i, ‘a ‘ua le tago i le vai; ona toso mai lea i fafo.
Ona fa’apea lea ‘o le upu a le tama’ita’i: Ali’i, pe a fetoso i fea ma’ua? Ona fai atu ai lea ‘o le ali’i: ‘O le ā le mea ‘ua lua faitogafiti ai? Lo lua ō i le siapo? E le matuā ta’u mai ‘o le malaga a taupou, ‘ua sau i le ‘āiga nei? Ona latou talatala lea ma toē. Ona fai atu lea ‘o le ali’i: ‘O le a tatou ō i lo matou nu’u. Ona tali lea ‘o tama’ita’i: Ua lelei, sau inā maliu atu i uta, ‘a ‘o le a ma ō i lo ma ali’i, ma te ō atu ai.
Ona alu lea ‘o le ali’i i uta, ‘a e ō atu tama’ita’i i tai ma lo la ali’i. Ona o’o lea i le nu’u o le ali’i, ‘o Sa’ilele. Ona o a’e lea i le fale o Togiola, ‘a e nanā le ‘iato i le matafaga; e ō a’e, ‘o nofo Togiola i lona fale. Ona fai atu lea ‘o Togiola i fafine: E o ane la te tu’ia lo’u tua! Ona ō ane ‘ua tu’i le tua o Togiola. Ona va’ai mai lea ‘o le fanau a Togiola mai le faleo’o. Ona fa’apea lea ‘o latou upu: ‘A ‘o tama’ita’i, ‘ua la tu’itu’i Togiola, pei ni tu’itu’i a ni tama’ita’i Toga.
Ona fa’alogo atu lea i ai ‘o Togiola i le ‘upu a lana fanau. Ona fa’apea lea ‘o Togiola: E lelei ona igoa o lo’u atali’i ia Tu’itu’iotoga. Ona fa’apea lea ‘o To’iololua i le afiafi i tama’ita’i: ‘O le a ‘ou alu i lo’u fale, ‘a ‘o le a tou nonofo ‘i’ina ma le ali’i. Ona tali lea ‘o tama’ita’i: ‘Ua lelei lava!
‘Ua o’o i le po, ona alu ane lea ‘o Togiola iā Tilafaigā, toe alu ia Taemamā. ‘Ua fia nonofo tama’ita’i iā Togiola. Ona nofolua ai lea iā Togiola.
Ona o’o lea i le isi afiafi, ona fai atu lea ‘o tama’ita’i: Togiola e, ‘o le a ma ō e ‘aumai si o ma tamā. Ona fai atu ai lea ‘o Togiola: Ō ia e ‘aumai ‘i’inei. Ona ō ai lea ‘o fafine, ‘a ‘ua nofo Togiola ma va’ava’ai i le ali’i, ‘ua ō i ai ana avā e ‘aumai. Ona va’ai atu lea ‘o Togiola, ‘ua tausoa mai le ogala’au. Ona fai atu lea ‘o Togiola: ‘O le a le igoa o lenā mea? Ona tali lea o fafine: ‘O lo ma ali’i lenei, ‘o le ‘iato sā lenei o le va’a o Tatua ma Tanō. Ona fai atu ai lea ‘o Togiola: ‘Ua lelei, ‘ua maua si o’u igoa o ‘Iatosā. ‘O le Le’iato muamua lenei i Tutuila o Le’iato Togiola.
Ona toe ō ai lea ‘o le malaga a tama’ita’i ‘ua fa’asaga i Pulotu; e ō le malaga ‘ua tō Taemā iā Togiola. Ona fa’apea atu ai lea ‘o Le’iato Togiola: ‘O ‘outou ‘āiga ‘o le ‘ā igoa lo’u atali’i iā Le’iato’oletu’itu’iotoga. Ona lua ai lea ‘o Le’iato i Tutuila.
Ona si’i lea ‘o le Le’iato’oletu’itu’iotoga i Luafagā i le maota i Fagaitua. Ona fa’ato’ā ‘ave lea i Fagaitua ‘o le Le’iato ‘ua nofo ai. ‘Ua fa’apea le ‘upu: ‘O le ‘a Le’iatotuāfanua Togiola, ‘ae Le’iatoalofi lona atali’i. ‘Ua ‘ave ‘uma fo’i ‘i ai pa’ia ma mamalu o ‘āiga o Togiola.
Usu Le’iatotu’itu’iotoga iā Vī mai Fagaitua
= Lea’amapula’a
Usu Le’iato Lea’amapula’a iā Vai mai Amaua
= Le’iato Matavao(m)
= Sina(f)
E usuia Sina e Taua’a mai Alofau
= Le’iato
Usu Le’iato ia Fa’avalega le afafine o Uto’ofili
= Pagai(f)
= Tugalaufa’i(f)
E usuia Tugalaufa’i e Mata’utia Suafa’asisina
= Le’iato
“Taupō le fuata ua fotu, ‘o le a maua lo tou ali’i”
Usu Tuiatua le sauali’i iā Lelaumau le afafine o Maeata’anoa i Faleapuna. O lona tinā o Maofa le afafine o Taemanu i Tula
= Le’iatoleali’ilemauga
Usu Le’iatoleali’ilemauga ia _________ le tama’ita’i mai Fagaitua
= Mata’ese
Ona fa’apea lea ‘o Le’iatoleali’ilemauga: ‘O le a sau e asi mai le ‘āiga o lona tamā i le afio’aga i Faleapuna: Ona sau ai lea, ‘avatu le tagata o lona ‘āiga, ‘ua fai mōna atali’i, ‘o Va’aleamā lona igoa. Ona maliu lea ‘o Le’iatoleali’ilemauga, ‘ae nofo ai Va’aleamā i le suafa Le’iato. Ona sau lea i Upolu ‘o Va’aleamā, e le’i uma le nofoaiga ‘ua le toe alu atu, ma taoto ma lagomau ai i le 1700. Ae fa’aui lana ‘ula ia Liulagai. Ona o ane lea ‘o Alataua ‘ua ‘avane Liulagai, ‘ua igoa iā Le’iato; sa i iai ‘o ia i le ‘āiga o Le’iatova’aleamā.
Usu Le’iato Liulagai _______ i le tama’ita’i mai Leloaloa
= Le’iato Tu’ugasala(m) ma lona tuafafine o Sufalī(f)
(O Le’iato lenei na feagai ma le sainia o le feagaiga i le tausaga 1900)
LE AFIOGA I LE MATUA IA TOGIOLA TALALELEI A. TULAFONO
LE AFIOGA IA LEMANU PELETI PALEPOI SIALEGA MAUGA
Comments
Add comment